Jérémi 11 - Kazambale lé Sebe Sauunu 1979

Wo gipawe sɛrɛ

¹ Wenu lé Gakelebale a fe Jérémi lɛ, yee lé ke ’ko.

² ’I gipadére ’konu ’ma ma, yé bé fe Juda munu valé Jérusalɛm munu lɛ.

³ ’Bé fe wo lɛ léma: Gakelebale, Izraɛl lé Bale léma: Mi lé é ’ka é tɔné dɔa gipadére ’konu lɛ lo, bale a é pale ’bɛzan ma.

⁴ Maa gipadére ’ko fe ka tranu lɛ, yian nya lé maa wo si Éjipiti tɛrɛ la foliɛwɔlɛ gɔrɔ gi, a yi nya, yé maa léé: ’Ka tɔné dɔ an dére lɛ yé we faa lé maa dan ka béli dɔ lɛ a nya, ’ka kɛlɛ. ’Bɛna lé ka dan kɛlɛ lɛ anlé munu nya yé maa dan kɛlɛ lɛ kalé Bale nya.

⁵ Anbo kundére lé maa a fe ka tranu lɛ, maa dan a lɛ sɔɔ lɛ; maa léé, maa dan tɛrɛ nyɔnɔzan nɔ lɛ wo lɛ bélé ka yé kyɔ fɛan zo, a zo. Yé maa a zi pa léé: Gakelebale, amɛɛn!

⁶ Gakelebale lé an lɛ léma: ’I dére ’konu zana dɔɔ Juda flanu valé Jérusalɛm zinu ta, léé: ’Ka tɔné dɔ gipadére ’konu lɛ, yé ’ka wo ta tawo.

⁷ Naa, maa we ’ko lɛ kini ka tranu lɛ, yian nya lé maa wo si Éjipiti tɛrɛ la, a yi nya fɔɔ yi ’ko nya; maa vo we plana wo lɛ bladi yifaama, a fele nya wo lɛ léé: ’Ka tɔné dɔ an dére lɛ.

⁸ Naa, wo ’ka ’wo tɔné dɔ lɛ an lɛ lo, yé wo ’ka an ban lɛ wo tɔné nya lo; wo faa do do vo tawona ’wo bligiwe naané yɛrama. Naa, dérenu faa lé maa a fe gipawe ’ko ma, maa a lɛ sɔɔ wo lɛ, ’té maa a fe léé, ’wo a tawe kɛlɛ, yé wo ’ka a tawe do kpen kɛlɛ lɛ lo bɛ, yee lé.

⁹ Gakelebale lé an lɛ léma: Juda munu valé Jérusalɛm munu wo péli vɔ do an ma.

¹⁰ Wo nɔla wo tranu vininnu lé wo sɔn vɔ tɔné dɔle ma an dérenu lɛ, wolé weplenu zuo, yé wo go bale bɛnu zuo yé wo ’bɛnu bɔ; anlé gipawe lé maa a kɛlɛ wo tranu va bɛ, Izraɛl munu valé Juda munu a sɛrɛ.

¹¹ Bɛwemalé Gakelebale léma: Ka ye, maa dan we tɔntɔnnu bɔ lɛ wo ma, ’té wo ’ka dan bɔ lɛ ’wobo sile lɛ a gi lo. Wo dan siaa lɛ an lɛ, yé maa ’ka dan tɔné dɔ lɛ wo lɛ lo.

¹² Juda tɛrɛ la flamunu valé Jérusalɛm munu é dan go lɛ bale bɛnu lé woo lasikɔrɔpo kyɛ blé wo lɛ, wo zuo, naa, dé we tɔntɔn bɔ wo ma yian nya, ’bɛ yi nya ’bɛnu ’ka dan wo si lɛ we gi lo.

¹³ Oo Juda munu, kalé flanu ’léé a kiɛre fɛan zo, a zo lé kalé balenu ’léé ke. Yé Jérusalɛm zinu ’léé a fɛan zo, a zo lé ka miyilinu bannanu kɛlɛ, yé ka lasikɔrɔ kyɛblenanu kɛlɛ Baal lɛ.

¹⁴ Jérémi, té bii é dɔ munu ’ko lé we gi lo; té i dére nwa wo ma zanté vɔlenu valé wo ma bazorolenu nya lo. Naa, dé we tɔntɔn bɔ wo ma, dé wo an laa, maa ’ka dan tɔné dɔ lɛ wo lɛ lo.

¹⁵ An sɔlɛzan baba é dan mɛ fɛ kɛlɛ lɛ anlé kɔn gii? Éé weple kiɛre kɛla ana. Saraka bowi éé bɔa i sile lɛ we tɔntɔn gii? Dé i wenyané kɛlɛ, ’té ibo kɛla blɛn.

¹⁶ Ɔliviyililaa drɔɔdrɔɔzan lé wa ze vɔa é poro zima ma, bii lé; tɔ lé Gakelebale a pa i ma, yee lé é ke bɛ. Vun blɛɛn plɛplɛ wele nya, kyɛnɛnɛ éé vɔa a ma, ’té a bɛnu kyɛ éé blé.

¹⁷ Lai sunyanu lé Gakelebale lé é i suru, yee ɛ we tɔntɔn laa i ma, Izraɛl munu valé Juda munu lé we lɛrɛlɛrɛ kɛlɛle we ma; wo an blifliwe kɛlɛ lasikɔrɔpo kyɛblele nya Baal lɛ, azama.

Wo Jérémi ma we ble

¹⁸ Gakelebale we gi fe an lɛ yé maa a ’ma, yé bé se kɛlɛ an lɛ léé, an wo kɛlɛwenu ye.

¹⁹ Maa a bélé ’blané drɔɔ lé wo go a nya wigyɛna, a zo, yé ’wuo gi naanénu lé wo ke a bɔrɔna an ma, maa ’ka a do kpen dɔɔ lɛ lo. Wo léé: Kaa yili valé a poro sɛrɛ. Kaa a soowɔla mi yuɛmalenu lé tɛrɛ la, yé té a tɔ sele é dɔ mi gi é dɛrɛ lo.

²⁰ Naa, lai sunyanu lé Gakelebale lé é ke weblezan tegele nya, ’té éé mi bli valé mi giwe dɔɔan. Maa dan ilé we lɛgi pana ye lɛ wo ma, naa, anlé we bɛ paan bii ɛ lee.

²¹ Anatɔt munu lé é sɔ wo lɛ léé, wo i gyɛ, yé wo léé: Té i balelawe fe Gakelebale tɔ gi lo, dé ’bɛ kaan lo, ko i gya, Gakelebale we fe wo lɛ.

²² Gakelebale lé wo lɛ léma: Ka ye, maa dan we lɛdɔ lɛ wo gi; pɛniɛnu é dan ga lɛ gwɔun lee; wo benu valé wo lunu é dan ga lɛ lɔrɔ lee.

²³ Wo va mi do kpen ’ka dan so lɛ a gi lo. Naa, maa dan we tɔntɔn bɔ lɛ Anatɔt munu ma, lɛɛ lé maa we lɛdɔa wo gi, ’bɛ lɛɛ nya.