Jérémi 10 - Kazambale lé Sebe Sauunu 1979

Miyilinu valé Gakelebale

¹ ’Kaa Izraɛl munu, dére lé Gakelebale a fena ka lɛ, ’ka tɔné dɔ a lɛ.

² Gakelebale léma: Té ka bɛnnu lé tawobɛ zuosona lo, Té ka lagi tɔmasenu kana pa lo Dɔlé ’té bɛnnu a kanana wo lee.

³ Naa, munu gɔnɔlawenu a boawe nya, Woo yili bɔié pɔrɔ gi; Nyanamapazan a ma nyanama paan zaa nya,

⁴ Wa ma nyɔɔ gya gɔɔlifu valé kyan nya, Woo pɔnténu valé maato sié yé wa blin a nya, Léé, té a ma é nyɔɔn lo.

⁵ Bale ’konu a bélé wɛyili blɛn zo, yé wo ’ka we fé pelo; Wo ’ka bɔa tawole lɛ lo, amalé woo wo kɔné sié. Té ka wo kana pa lo, naa, wo ’ka bɔa wenaané do kpen kɛlɛle lɛ lo, Yé wo bɛ ’ka sɔa wezin gɔ do kpen kɛlɛle nya lo.

⁶ Bii Gakelebale, i danmafɛ do kpen ’ka lo; I a blɛn yé i tɔ a é bɔle ilé plɛplɛ ma.

⁷ Bɛnnu nwiinzan, de ɛ ’ka kanaan i lee loo? Kanale i lee yara lé; Naa, bɛnnu lé wedɔɔmunu faa koo, bɛngɔnɔnu faa koo, I danmazan do kpen ’ka wo va lo.

⁸ Wo faa a ékeva tanyilazannu valé tavozannu nya; Wolé wedɔɔle a boawe nya, wa yili nya é pla.

⁹ Munu éé sié Taasis gɔɔlifu feenu nya yé woo kyan sié Ufaz yé wo da wo nya; Nyanamapazan valé folibozan éé nyanama paan. Bale ’konu tasɔnu a glayiayou sɔ valé galunaa sɔ nya, Wo faa a blabozan babanu kɛlɛfɛnu nya.

¹⁰ Naa, Gakelebale a Bale nya webozen nya; É a Bale yuɛmale valé minwiinzan lé, éé voo ana lɛɛfaama, ’Té a glɛ ’ka dɔa lo, a nya. Tɛrɛ ma éé nyɔɔn‐an alé bliflile we ma, Yé bɛnnu ’ka dɔa a wɛwɛ wuo lo.

¹¹ ’Ka fe wo lɛ léma: Balenu lé wo ’ka lanu valé tɛrɛ kɛlɛ lɛ lo, Wo dan san lɛ tɛrɛ la, yé wo dan san lɛ lanu wuo.

¹² É tɛrɛ kɛlɛ é bɛ plɛplɛ nya; Alé wedɔɔle nya lé é tɛrɛ gane vɔ, É lanu fwila élé gikini nya.

¹³ ’Yinu a dére ’ma tɔɔn, wo vun we lanu gi. Éé latinu nwaan tɛrɛ glɛ sina, Éé lɛɛ yuɛ wuo vɔa yé éé lɛɛné dan, Éé fu sié élé fɛwezannu va.

¹⁴ Munu faa éé kɛla tavozannu nya alé wedɔɔle lee, Yara éé folibomunu faa gya wolé miyili nyaale we ma; Naa, miyili ’konu a vié nya, azama, Flinfu do kpen ’ka wo gi lo.

¹⁵ Wa fɛnu lé wo ’ka we do nyian wo mi ma lo, wo nya; wa dabli panyanama nya; Dé we lɛdɔ mi gi yi bɔ, wozé é dan nyaa lɛ.

¹⁶ Bale lé é ke Jakɔb zé nya, ’bɛ ’ka wozé zo lo; Naa, ’bɛ ɛ fɛnu faa kɛlɛ, Yé Izraɛl ɛ ke alé tɔnɔ nya; A tɔ lé lai sunyanu lé Gakelebale.

We lɛdɔle mi gi bɔ é pu

¹⁷ Jérusalɛm munu, ka lé ka ke kle blena, fɛnu lé ke kazé nya, ’ka wo si tɛrɛ ’ko la.

¹⁸ Naa, Gakelebale léma: Ka ye, sin maa dan go lɛ tɛrɛ ’ko la munu nya baa, bélé paalu lé gɔlɛ vulile zo; maa dan wo kun lɛ léé, wo nyanézannu ’é bɔ wo ma.

¹⁹ Jérusalɛm léé: We tɔntɔn bɔ an ma; maa zana a gi. An manɔn vo tɔntɔn. Naa, maa léé: Dirikinié mi lɛ we bɔ an ma, An dan an ’wuo dɔ lɛ a wuo.

²⁰ Wo anlé sɔkɔn sɛrɛ, Wo an ma balenu kini, An benu si an va yé wo ’ka ana é dɛrɛ lo; Mi bɛ ’ka an lɛ yé ’bɛ é anlé sɔkɔn dɔ é ziin lo.

²¹ ’Blatabinzannu kɛlɛ tavozannu nya, Wo ’ka Gakelebale nagini lɛ lo, Amalé wolé we va ’ka gyɛ lɛ lo, Yé wolé trubɛnu faa fwila.

²² Ka ye, ko a ’ma léé, wa fena léé, Fla bɔgyɛwe a sina yirinwana bɛbolazia, Yé é Juda tɛrɛ la flanu kɛlɛ é ’bin nya, Yé é wo kɛlɛ gwenu yiɛna nya.

²³ Oo Gakelebale maa a gi dɔɔ léé, A se ’ka blami lɛ léé, é ’ébo lé zi si a va lo, A se ’ka tawozan lɛ léé, é ’ébo lé tawogane drɔ lo.

²⁴ Oo Gakelebale, ’i we lɛdɔ an gi, naa, té é gié é glɛ la lo, Té bé kɛlɛ i bli flile nya lo, dé i da an kulu ga.

²⁵ ’I wɛwɛ dɔ bɛnnu lé wo ’ka i dɔɔa lo, wo ma, Yé munu lé wo ’ka i tɔ laan lo, ’i wɛwɛ dɔ wo ma. Naa, wa Jakɔb kulu gana, kulu ganaoo, wa kulu gana! Wa a nyanana sɛrɛna.