Jérémi 1 - Kazambale lé Sebe Sauunu 1979

Bale Jérémi laa

¹ Ilkija be Jérémi lé ke Balebanmunu vazan do nya, a dére lé ke ’ko. Fla lé wa laama Anatɔt, ’té é ke Bɛnjamɛn tɛrɛ la bɛ, ana zan lé.

² Amon be Jozias lé ke Juda munu nwiinzan blɛn nya, a plale mi nwiin lɛɛ vu ta yaazan nya, Gakelebale we ’konu fe Jérémi lɛ.

³ Yé é ziin, Jozias be Jojakim lé ke Juda munu nwiinzan blɛn nya, a plale mi nwiin bléyi va, Gakelebale we ’konu fe a lɛ fɔɔ yé é bɔ Juda munu nwiinzan blɛn Jozias be Sédésias plale mi nwiin lɛɛ vu ta dozan lé moné soruzan ma, yé é nyaa bléyian va lé wo go Jérusalɛm munu nya luu gi, a bléyi va.

⁴ Gakelebale we fe an lɛ yé é léma:

⁵ Dé maa ’ka tan i kɛlɛle péli sia lɛ i bu bɔn gi lo, ’té maa i dɔɔ. Yé maa i pa é yɛrama yé maa i dɔ munu faa lé balelayezan nya i bu lé i yaale ’lɛ.

⁶ Maa a zi pa léé: Aa, Mizan, Gakelebale, bé ye, an ’ka bɔa we do fele lɛ lo, naa, maa a nékénéné nya, azama.

⁷ Yé Gakelebale lé an lɛ léé: Té bé fe léé, ’é a nékénéné nya lo. Naa, munu faa lé maa i nwunvɔ wo va, i dan go lɛ wo va, yé we faa lé maa a pa i ’léé, i dan a fe lɛ wo lɛ.

⁸ Té i kana wo lee pelo, naa, maa a i va, i ta béli dɔle we ma. Maa Gakelebale ɛ fe.

⁹ Yé Gakelebale é bɛ soi, yé é bɛ mane an lɔlu ma. Yé é lé an lɛ léé: Bé ye, maa an dérenu pa i ’léé.

¹⁰ Sin, maa i pla migɔnɔnu valé bɛntɛrɛnu nwiin, léé, ’i wo si wo dɔna, yé ’i wo gyɛ; ’i wo guru zana a gi yé ’i wo sɛrɛ tata; ’i wo dɔ ’wo dɔna yé ’i wo nyana ’wo pa gi.

¹¹ Gakelebale we fe yé é lé an lɛ léé: Jérémi, i mɛ fɛ yéé? Maa zi pa léé: Maa amandéyili bɛ do yé. (Amandé gi léé, yuɛpale fɛ va.)

¹² Gakelebale lé an lɛ léé: Bé ye é zima. An yuɛ paan an dére va a tawe kɛlɛle we ma.

¹³ Gakelebale we fe an lɛ a gɔnɔ fiézan nya yé é léé: I mɛ fɛ yéé? Maa zi pa léé: Maa ’yi yé flina bɔ gi yirinwana bɛbolazia.

¹⁴ Yé Gakelebale léé: Dirikiniwe é dan si lɛ yirinwana bɛbolazia yé é sɔɔla tɛrɛ ’ko la munu faa ma.

¹⁵ Gakelebale léé: Naa, bé ye, maa dan yirinwana bɛbolazia bɛntɛrɛ faa laa lɛ; wo dan da lɛ yé wo dan wolé webleblinnu dɔra lɛ Jérusalɛm gɔrɔ ’léénu na; wo dan wo dɔra lɛ a gɔrɔ zi fɛfaana, yee valé Juda lé fla faa la. Maa Gakelebale ɛ ke a fena.

¹⁶ Maa dan Juda munu lé we ble lɛ wo kɛlɛwe plenu lé we ma. Wo sɔn vɔ an ma yé wo lasikɔrɔpo kyɛ ble bale bɛnu lɛ, yé wo ’wo ’wuo tua ’wo bɛ kɛlɛfɛnu lɛ, azama.

¹⁷ Yé bii, ’i nwa, ’i kyɛsidi dɔ i gyɛn, yé we faa lé maa dan a fe lɛ i lɛ bɛ, bé fe wo lɛ. Té gligli é zén i gi wo ’lɛ lo, dé maa ɛ da gligli zén i gi wo ’lɛ.

¹⁸ Bé ye, kyɔ maa i dɔ nyanazan nya bélé kɔn wɛyili lé ke foliɛwɔlɛ nya, a zo, bélé kɔnguru lé ke zéné nya, a zo, Juda munu nwiinzan blɛnnu koo, wolé minwiinzannu koo, wolé Balebanzannu koo, tɛrɛ ’ko lamunu faa koo, wo lɛ.

¹⁹ Wo dan guli dan lɛ i va, yé wo ’ka dan i kele lɛ lo. Naa, maa a i va, i ta béli dɔle we ma. Maa Gakelebale ɛ ke a fena.