SEBE LÉ JAK A GYE (Épitre de Jacques) 5 - Kazambale lé Sebe Sauunu 1979

We vɔle fuablezannu lɛ

¹ ’Kaa fuablezannu, ’ka tɔné dɔ an lɛ do. ’Ka wuvɔ, yé ’ka siaa, wenaanénu lé wo dan bɔ lɛ ka ma bɛ, wolé we ma.

² Kalé fuafɛnu a é sɛrɛle, yé boworonu kalé sɔnu ble.

³ Gyan vɔ kalé kyan valé kalé gɔɔlifu ma; yé wo ma gyan é dan ka ma we fe lɛ, yé é dan ka nɛ ble lɛ bélé kyɛ zo. Ka fɛwezannu zun dɔ kazé nya yi voélazannu ’ko gi.

⁴ Ka ye, nyanamapamunu lé wo kalé féifɛnu gyɛ, yé ’té ka ’ka wo gooli pa lɛ bɛ lo, wo ban a siaana, yé féifɛgyɛmunu lé siaalenu bɔ Sunyanuzan tɔné gi.

⁵ Ka kalé tɛrɛla kɛlɛ Kabozen lé ginanawenu kɛlɛle valé tɔnɔ blele nya; bléyian va lé wa munu gyɛna ’té ka kalé nyɔnɔfɛnu blé.

⁶ Ka ga dɔ mi tegele nwiin, yé ka a gyɛ, yé é ’ka nyana vɔ lɛ lo.

Bli kɛlɛle tiéé valé bazorole

⁷ Bɛwemalé, bwenu, ka bli ’é kɛlɛ tiéé fɔɔ yé Mizan é da. Ka ye, féipazan é élé féifɛwezan lɛbɛn‐é é bli tiéé nya fɔɔ yé lɛɛ vininzan valé lɛɛ voélazan é da alé féi.

⁸ Mizan bɔ é pu; bɛwemalé ka é ziin, ’ka bli kɛlɛ tiéé, yé ’ka dɔ gligli.

⁹ Bwenu, té ka gun gyɛ ka ke ma lo, té wo kalé we ble lo we gi. Ka ye, Weblezan bɔ é pu.

¹⁰ An bwenu, Balelayemunu lé wo we fe Mizan tɔ gi, ’ka wo si kalé wekɛlɛmazannu nya, nyanéblele valé bli tiéé gi.

¹¹ Ka ye, munu lé, wo nyané ble bli tiéé nya, ko fé léé, wozé a néné é baba. Ka Job lé bli tiéé we zuo fele ’ma; yé Mizambale alé we kɛlɛ fɛan zo é voéla, ka ’bɛ ye, naa, Mizambale éé mi mawe dɔɔan é baba yé a nyanai éé zén‐é mi ta di.

¹² An bwenu, we faa va we blɛn lé é ke ’ko: té ka fɛ ’nyɔɔn lo. Dé é a la nyaoo, dé é a tɛrɛ nyaoo, dé é a fɛofɛan nyaoo, té ka a do kpen ’nyɔɔn lo. Naa, kalé iin ’é kɛlɛ iin nya ma, yé kalé gba ’é kɛlɛ gba nya ma, dé we é da dɔ ka nwiin.

¹³ Ka va mi do a nyané blenaa? ’É bazoro ma. Yé mi do gi a nananaa? ’Bɛ ’é lɛrɛ vɔ ma.

¹⁴ Gyɛ a ka va mi do maa? ’É léglizi gi mi segelenu laa, yé mi segelenu ’é nyɔnɔ zén a nwiin Mizan tɔ gi, yé ’wo bazoro a ma ma.

¹⁵ Yé ba lé wa zoro blipale nya é dan gyɛkɛlɛzan béli lɛ, yé Mizambale é dan a nwa lɛ, yé dé é wenyanénu kɛlɛ, Bale é dan a ma we vo lɛ.

¹⁶ Bɛwemalé, ’ka kalé wenyanénu fe ka ke lɛ, yé ’ka bazoro ka ke lé we ma, ka bélile we gi. Mi tegele lé bli faa nya bazorole ’lɛ éé dɔa é baba.

¹⁷ Éli a blami nya bélé kaa zo. É bazoro é bli faa nya léé, té lɛɛ é da é dɛrɛ lo, yé lɛɛ yaa moné suiɛdo gi lɛɛ ’ka da lɛ tɛrɛ la lo.

¹⁸ ’Bɛ zuo é bazoro é ziin, yé lɛɛ da yé tɛrɛ fɛ dɔ.

¹⁹ An bwenu, dé ka va mi do si webozen zuo, yé mi do da a nya é ziin,

²⁰ ’ka we ’ko dɔɔ ma: mian é wenyanékɛlɛzan si zi lé é saan a ta, ana, yé é da a nya é ziin, é dan mi boen si lɛ ga lee, yé é dan wenyané kiɛre ta bua lɛ.