SEBE LÉ JAK A GYE (Épitre de Jacques) 4 - Kazambale lé Sebe Sauunu 1979

Béé blele tɛrɛlawe va

¹ Gulidanlenu valé zɔdɔlenu lé wo ke ka méléna bɛ, woo sié kyɛɛn? Wo ’ka sié fɛyelɔrɔ lé woo guli daan ka kɔlɛnu gi bɛ, wo va loo?

² Fɛyelɔrɔ éé ka gya yé ka ’ka fɛ yé lo; ka mi gya ’té ka maawo, yé kalé we va ’ka gya lo; amalé ka we sian yé ka guli daan. Ka ’ka fɛ laan lo, amalé ka ’ka fɛ yé lo.

³ Ka fɛ laan é naané, fɛyɛlɔrɔ sile ka ma we gi, amalé ka fɛ laan yé ka ’ka a yé lo.

⁴ Ka a bélé le bɛ valé gɔné bɛ ginizannu zo. Ka ’ka a gi dɔɔa léé, tɛrɛla sɔle mi lɛ éé mi kɛla Kazambale nyanézan nya loo? Bɛwemalé, dé mian éé tɛrɛlawe kɛla ’é béé nya, ’té é a ébo kɛlɛna Kazambale nyanézan nya.

⁵ É a ka gi léé, Kazambale lé sɛbɛ éé we fé é plaa? Léli lé Kazambale a pa ka gi, éé maawoo.

⁶ Naa, Kazambale éé zin taa kɛla kaa lɛ, bɛwemalé Kazambale lé sɛbɛ léé: Kazambale éé dɔa boblɛnmunu ma plɛplɛ; Naa, éé zin kɛla bokiénémunu lɛ.

⁷ Bɛwemalé, ’ka pla Kazambale wuo; ’ka dɔ yonufaatagɔné ma plɛplɛ, yé é dan vlan buru lɛ ka lee baa.

⁸ ’Ka bié Kazambale sɔnɔ yé é dan bié lɛ ka sɔnɔ. ’Kaa wenyanékɛlɛmunu, ’ka bɛ ma foli. Ka lé ka vɔa we faa ’lɛ, ’ka ka bli kɛlɛ tegele.

⁹ É a lé ka gi dɔɔ léé, ka a nyanaizénlazannu nya. ’Ka wuvɔ yé ka yuɛyi ’é so. ’Ka kalé yérisile tavɔɔ gyɛbole nya, yé ka ginanale ’é kɛlɛ gi kyɛ nya ma.

¹⁰ ’Kabo kɛlɛ kiéné Mizambale ’lɛ, yé é dan ka kɛlɛ lɛ blɛn.

I bwe ma we blele

¹¹ Bwenu, té ka wenaané fe ka ke ma lo. Dé mian wenaané fe é bwe ma, dé mian é bwe ma we ble, ’té é a wenaané fena bélidɔwe ma, ’té é a bélidɔwe ma we blena. Yé dé i a bélidɔwe ma we blena, ’té i ’ka a ta tawozan nya lo, ’té i a a ma we blezan nya.

¹² Bélidɔwe bɔrazan valé weblezan a do kpen; yee ɛ bɔa mi sile lɛ we gi; yee ɛ bɔa mi sanle lɛ. Naa, bii, de ɛ ke bii nya yé i i bɔluzan ma we bléé?

Té ka tɛlɛ tɛlama we fe kabo wuoi lo

¹³ Ka kenu a fena léé: Dé kyɔ léé, dé tɛlɛ léé, ko dan go lɛ fla koɛ valé fla koɛ la, yé ko lɛɛ kɛlɛ ’bɛna do, yé ko yaawo yé ko tɔnɔ ye. Ka lé ka ke a fena ’bɛ zo, ’ka tɔné dɔ an lɛ.

¹⁴ We lé é dan bɔ lɛ tɛlɛ, ka ’ka a gi dɔɔa lo. Kalé tɛrɛla a kaa? Ka a fɛfulu lé éé bɔraan bléyi sɛ nya, yé ’bɛ zuo yé é san, a nya.

¹⁵ É a lé ka fe léé: Dé é sɔ Mizan lɛ, ko dan vo lɛ é yuɛma, yé ko dan koɛ valé koɛ kɛlɛ lɛ.

¹⁶ Naa, sin, ka a kabo tɔ kɛlɛna blɛn ’wuogibɔrɔle blɛnnu nya. Botɔkɛlɛlɛ blɛn ’bɛ zo a we lɛrɛlɛrɛ nya.

¹⁷ Bɛwemalé, dé mian é wezin kɛlɛle dɔɔ yé é ’ka a kɛla lo, ’té é a wenyané kɛlɛna.