SEBE LÉ JAK A GYE (Épitre de Jacques) 3 - Kazambale lé Sebe Sauunu 1979

Mi nɛnɛ lé we

¹ An bwenu, té ka va mi kiɛre ’é kɛlɛ wepaamigizannu nya lo, naa, ka a gi dɔɔ léé, wo dan kolé we ble lɛ yara plɛplɛ nya.

² Kaa faa éé saan gɔnɔ kiɛre nya. Dé mi ’ka saan é dére fele gi lo, ’té gun ’ka a ma lo, ’té éé bɔa ébo kunle lɛ we faa gi.

³ Dé ko foliɛwɔlɛ wɔraan wisoonu ’léé wolé ko lɛdɔmale we gi, ’té ko zi gɔɔn‐an wo kɔlɛnu faa lɛ é ziin.

⁴ Ka ye, ’yitagoronu lé, wo ke blɛnblɛn ’té fu plɛplɛ éé wo nyunuan, wo yaradrɔfɛ lé é ke kiéné, éé wo yara drɔan wo vɔzan blibɔmale yɛrama.

⁵ A zo duo lé, nɛnɛ a kɔlɛvafɛ kiéné nya, ’té ébo tɔ bɔa we blɛnblɛnnu gi. Fɛan zo lé kyɛ kiéné éé bɔa pɔrɔ blɛn kyɛblele lɛ, ka ye do.

⁶ Nɛnɛ a kyɛ nya é ziin yé alé weple a tɛrɛ zo. Nɛnɛ a kaa kɔlɛvafɛnu va, ’té éé kɔlɛ faa tiri dɔa, yé ’té éé mi lé tɛrɛla faa kyɛ dɔa, yé ’té jéɛna kyɛ plɛplɛ éé vɔa yeebozen ma.

⁷ Bwigiwinu gɔnɔ faa koo, miané gɔnɔ faa koo, tawoplɛlawinu gɔnɔ faa koo, wɛyivawinu gɔnɔ faa koo, tɛrɛlamunu éé bɔalɛ léé, wo wo nɔla bélé fla trubɛ zo, yé wa kɛla a zo webozen nya;

⁸ naa, mi do ’ka bɔa plale lɛ nɛnɛ nwiin lo; é a fɛ naané lé, mi ’ka bɔa a drɔle lɛ lo, a nya; é a é fanle migyɛlale nya.

⁹ A nya lé kaa Mizambale, kaa Ti, drɔɔ voo; yé a nya lé kaa bale paan munu lé, Kazambale wo kɛlɛ ébozen zo, wo ma.

¹⁰ Mi ’léé duona lé mi drɔɔ vole valé balepale mi ma éé bɔraan. An bwenu, é ’ka lé é kɛlɛ ’bɛ zo lo.

¹¹ ’Yibɔna éé ’yi néné valé ’yi nyanale bɔraan ’é ’léé duo yee ɛ naa?

¹² An bwenu, bɔrɔyili é bɔaléé, é ɔliviporo baa? Taa, dɔrɔyili é bɔaléé, é bɔrɔyiliporo baa? A zo duo lé ’yibɔna lé, wɛ ke alé ’yi ma, é ’ka bɔaléé, ’é ’yi néné kɛlɛ lo.

Lagi wedɔɔle

¹³ Ka va mi kyɛn ɛ ke wedɔɔzan valé gikinizan nyaa? É a lé é a nagɔɔn ’é giébɛ zin nya léé, ’é kɛlɛwenu éé sié wedɔɔle drɔɔ va.

¹⁴ Naa, dé maawole valé zakɛlɛbli a ka gi, té kabo tɔ bɔ lo; té ka viéwo webozen ma lo.

¹⁵ ’Bɛ zo wedɔɔle ’ka sié lagi loru lo; naa, tɛrɛla zé lé; mi dɔbɛ kyɛn zé lé; yo zé lé.

¹⁶ Fɛana lé maawole valé zakɛlɛle ke, ana lé wele wooo valé kɛlɛwe naané gɔnɔ faa ke.

¹⁷ Wedɔɔle lé éé sié la gi, é a é vinin sauun, ’bɛ zuo é a drɔɔ, é ébo kunwoo, éé mi bli dɔralaan, a nyanai éé zén‐é é baba, a ma tɔnɔ a di, é ’ka glɛ dɔa mi gi lo, é ’ka ébo drɔan lo.

¹⁸ Munu pa ékemazannu lé woo we kɛla bli drɔɔ nya, woo we tegele yé a ma tɔnɔ nya.