SEBE LÉ JAK A GYE (Épitre de Jacques) 1 - Kazambale lé Sebe Sauunu 1979

Weale lé

¹ ’Kaa bɛn vu ta fié lé ka ke é kinile ékema, maa Jak lé an ke Kazambale valé Mizan Jézu Krist lé lugɔnéné nya, an we ka va.

Blipale valé bo kiéné

² An bwenu, wa ka gi danna bɛ faa ma fɛan zo bɛ, ka gi ’é nana a we ma ma.

³ Ka gi dɔɔ léé, kalé blipale gidanle é dan ka bli kɛlɛ lɛ tiéé, azama.

⁴ Yé é a lé bli tiéé é kɛlɛwe lɛ sɔɔ ka gi, gun sile ka ma valé ka tinle we gi, ’té we do kpen ’ka vuruan ka ma lo.

⁵ Dé ka va mi do ’ka we dɔɔa lo, é a lé ’é a laa Kazambale lee yé é dan a nɔ lɛ a lɛ. Kazambale éé fɛ no mi faa lɛ é pla é bli drɔɔ nya.

⁶ Naa, é a lé é a laa blivole a yele lɛ nya, té a bli é kɛlɛ fié lo; mi lé a bli éé kɛla fié fɛ laale ma, é a bélé wɛyinwale lé, fu a nanoan ’té éé a nwaan bɛ, a zo.

⁷ Té é dɔ mi ’ko zo gi léé, é dan fɛ do ye lɛ Mizambale va lo;

⁸ é a bli fiézan nya, yé a yuɛgi éé blaan we faa gi, azama.

⁹ Bwe lé fɛ kiéné ke a lee, é a lé a gi ’é nana é tɔ nwale we ma.

¹⁰ Naa, é a lé fuablezan gi ’é nana élé fuatɔ sanle é lee we ma. Naa, alé we é dan nyaa lɛ bélé bwigilu vwi zo.

¹¹ Fɛan zo lé yiri éé nwaan é san plɛplɛ nya, yé lu éé zɔrɔan, yé a vwi éé diaan, yé a dɔbɛ zima é san bɛ, a zo duo lé fuablezan é dan zɔrɔ lɛ élé nyanamanu méléna.

Mi gi danle‐wenyané lɔrɔ lé mi gyɛle

¹² Mian éé dɔa é gidanwenu wuo bli tiéé nya, azé a néné. Naa, a gi danle zuo, wo dan vole é yuɛma nɔ lɛ a lɛ bélé tɔkoro zo; tɔkoro lé Mizan a ma blivolɛdére fe munu lé, Mizan sɔ wo lɛ, wo lɛ bɛ, wo dan a nɔ lɛ a lɛ.

¹³ Dé wenyané lɔrɔ a mi ma, té azan a fe léé, Kazambale ’é gyɛ a lɔrɔ nya lo. Naa, wenyané lɔrɔ ’ka Kazambale gya lo, yé yeebozen ’ka mi gya a lɔrɔ nya lo.

¹⁴ Wenu lé a lɔrɔ éé mi gya bɛ, woo ɛ mi gi daan. Woo ɛ mi sian ana yé woo ɛ mi kunwo.

¹⁵ Yé yee we lɔrɔ bɛ, éé bɔn sié yé éé né yaan wenyané nya, yé wenyané lɛ éé sɔɔan gale nya.

¹⁶ An bwenu lé ka sɔ an lɛ, té ka dabli kɛlɛ kabo lɛ lo.

¹⁷ Blan zima faa valé blɛ tegele faa éé sié loru, lagi san bilenu Kɛlɛzan va. A dɔbɛ ’ka nɔlaan lo, yé alé we do kpen ta ’ka vɔɔan lo.

¹⁸ É kaa yaa élé blibɔmawe yɛrama webozen dére nya, kaa kɛlɛle a kɛlɛfɛ vininzannu nya we gi.

Tɔné dɔle Dére lɛ valé tawole a ta

¹⁹ An bwenu lé ka sɔ an lɛ, ’ka we ’ko dɔɔ ma; é a lé mi faa ’wo tɔné dɔ we lɛ é kele; té wo we zi pa é kele lo, té wo bli é fli é kele lo.

²⁰ Naa, blami lé bliflile ’ka Kazambale lé we tegele lɛ sɔɔan lo.

²¹ Bɛwemalé, ’ka daan we tiridɔle faa valé miblifliwe faa kɛlɛle ma, yé Kazambale dére lé wa vɔ ka bli gi, ’té éé bɔa ka sile lɛ we gi bɛ, ’ka ’bɛ si bli drɔɔ nya.

²² Naa, we do ana, é a lé ka tawo Kazambale dére ta, té ka tɔné dɔ a lɛ é pla saawo lo, dé ’bɛ kaan lo, ’té ka a dabli kɛlɛna kabo lɛ.

²³ Mi lé éé tɔné dɔa Kazambale dére lɛ yé é ’ka a ta tawo lo, é a bélé mi lé ébo yara gini vlinvlin gi, a zo.

²⁴ É a gini, yé é go, yé kele tɔɔn a yara dɔbɛ ke fɛan zo, ’bɛ saan a gi.

²⁵ Naa, bélidɔwe lé gun ’ka a ma lo, ’té éé mi voo éboma, mi lé éé a gi kulian pɛnpɛnpɛn yarapalale nya, ’té é ’ka é tɔné dɔa a lɛ é pla yé ’bɛ zuo yé éé saan a gi lo, ’té éé a tawe kɛla tegele, ’bɛzan gi é dan nana lɛ, é a lɛdɔma, ’bɛzama.

²⁶ Dé é dɔ mi do gi léé, ’é a bazorozi do ta, dé kɔ ’ka é vɔle a nɛnɛ wuo lo, ’té é a ’ébozen saanna, ’té mi ’ko lé bazorozi a zi pla nya.

²⁷ Mi lé éé bɔa ti valé bugalanénu koo, gyɛzaralomu koo, wo va, wolé nyanéblele gi, ’té é ’ka tɛrɛlamunu lé mitiridɔwe kɛla lo, kaa Ti Bale yuɛ gi, ’bɛzan a bazorozi tegele boen ta tawona.