Galasi munu 3 - Kazambale lé Sebe Sauunu 1979

Bélidɔwe valé blipale

¹ Galasi munuoo, Galasi munu, ’tugyɛzannu! De ɛ ka gyɛ ’tu nyaa? Ka lé wo Jézu Krist bɔra ka yuɛ va é gyɛle yiliblan ta bɛ, de ɛ ka gyɛ ’tu nyaa?

² ’Ka we ’ko zi pa an lɛ do: ka Kazambale Léli ye bélidɔwe kɛlɛle nya laa, taa, bli vole Wenéné lɛ nya lé ka a yee?

³ ’Tu ɛ ka gyɛ a zoo? A pélisiale Kazambale Léli nya zuo, é dɔ ka gi léé, ka dan a ’wuo pla lɛ ka kɔlɛ lé we kɛlɛle nyaa?

⁴ ’Té kalé nyanéblele kɛlɛ we pla nyaa? É a é pla weboen nyaa?

⁵ Maa a laan ka lee léé, dé Kazambale é Léli nɔ ka lɛ yé é gyɛzorowenu kɛlɛ ka méléna, mɛmalé é a kɛlɛɛ? É a kɛlɛ kalé bélidɔwe kɛlɛle we ma laa, taa, ka bli vole Wenéné lɛ lé we ma lé é a kɛlɛɛ?

⁶ ’Bɛ zo lé Bale lé sɛbɛ a fe Abraam lé we ma. É ’é bli vo Kazambale lɛ, yé ’bɛ kɛlɛ a ma we tegele nya.

⁷ Amalé ’ka we ’ko nyi si ma: munu lé wo bli ke é pale, wo ɛ ke Abraam benu nya.

⁸ É ziin, Kazambale lé sɛbɛ a fale vɔ é kyɛn léé, Kazambale é dan bɛn bɛnu kɛlɛ lɛ tegele blipale nya; yé é wenéné ’ko fe Abraam lɛ a bléyi ’lɛ yé é léé: Bɛnnu faa drɔɔ é dan vo lɛ i gi.

⁹ ’Ko zo lé munu lé woo bli paan, wo drɔɔ a é vole blipazan Abraam zé va.

¹⁰ Munu faa lé wo ke bélidɔwe kɛlɛwenu va, bale a é pale wo ma; naa, é a é gyɛle Kazambale lé sɛbɛ gi léé: We lé ke é gyɛle bélidɔwe sɛbɛ gi bɛ, dé mian é ’ka a faa kɛla yarapalale nya lo, bale a é pale a ma.

¹¹ É a wéiin léé, mi do kpen ’ka é kɛlɛle tegele Kazambale yuɛ gi bélidɔwe nya lo; naa, é a é gyɛle sɛbɛ gi léé: Mian é kɛlɛ tegele blipale ma, é dan béli lɛ.

¹² Bélidɔwe ’ka sié blipale va lo, naa, é a é gyɛle léé: Mian éé we ’konu kɛla, é dan béli lɛ wo ma.

¹³ Krist kaa tabo bélidɔwe lé balepale lee yeebozen kɛlɛle balepamazan nya kaalé we gi we ma; naa, é a é gyɛle sɛbɛ gi léé: Dé wo mian dun yiliblan ta, ’bɛzan a balepamazan nya.

¹⁴ Wean ma lé we ’konu faa bɔ, yee lé é ke ’ko: Abraam drɔɔvole kɛlɛle é ziin bɛnnu zé nya Jézu Krist gi we ma, é valé Kazambale Léli lé, wa nɔle we fe é kyɛn bɛ, kaalé a yele blipale nya we ma.

Bélidɔwe valé blivolɛdére

¹⁵ Bwenu, tɛrɛlawe do lé maa go fe lɛ ka lɛ ’ko, ’é we ’ko gi dɔ ka gi ma. Dé mi fié ’wo gi pa do yé we ’ko kɛlɛ gipawe nya wo méléna, mi do kpen ’ka a sɛra lo, yé mi do kpen ’ka a taa paan lo.

¹⁶ Naa, Bale blivolɛdérenu fe Abraam valé é kulu lɛ. É ’ka a fe lɛ léé, kulunu, lo, bélé fɛan zo lé wa kiɛre, a zo lo, naa, é a fe, i kulu, ’bɛ gi léé, mi do kpen lé, yee lé ke Krist nya.

¹⁷ Wean maa ke a fena, yee lé ke ’ko: gipawe lé Kazambale a kɛlɛ é kyɛn, bélidɔwe lé é da lɛɛ wuru fié yɔ do wɔlɛ vu giéle zuo bɛ, é ’ka bɔa alé blivolɛdére yi gale lɛ lo.

¹⁸ Naa, we lé Kazambale a fe blivolɛdére nya, dé Abraam a ye bélidɔwe ma ’té blivolɛdére yi ga. Naa, duowo, blivolɛdére nya lé Kazambale zin kɛlɛ Abraam lɛ blɛ nya.

¹⁹ Mɛmalé wo bélidɔwe kɛlɛɛ? Wa kɛlɛ é voéla munu lé bélidɔwe sɛrɛlenu nagɔɔnle wo lɛ we ma. Wa kɛlɛ bléyi ke zé nya, fɔɔ yé mi kulu lé Bale blivolɛdére fe azé nya é kyɛn bɛ, yé ’é da a glɛ dɔ. Lanjenu da bélidɔwe nya yé wa nɔ weyuru lɛ, léé, ’é a fe.

²⁰ Dé wa fe léé, weyuru, ’bɛ gi léé, é ’ka mi do lé we nya lo, dɔlé ’té Kazambale a do kpen.

Wean ma lé bélidɔwe da

²¹ ’Té bélidɔwe a Kazambale lé blivolɛdére maa? Gba. Dé é kɛlɛ léé, bélidɔwe éé mi bélié, ’té we tegele éé sié kɔɔn bélidɔwe va webozen nya.

²² Naa, Kazambale lé sɛbɛ a fe léé, tɛrɛlamunu faa a luu nya wenyané wuo, léé, blivolɛdére lé éé sié blikɛlɛle Jézu Krist lɛ va bɛ, yé ’wa nɔ munu lé wo bli vo a lɛ, wo lɛ.

²³ Blipale ’ko dale ’lɛ, ’té kaa a bokɔngizannu nya bélidɔwe wuo, ’té blipale lé é a lé wa bɔra, kaa a a lɛbɛnna.

²⁴ ’Ko zo lé bélidɔwe kɛlɛ zigɔɔnzan nya, gole kaa nya Krist va we gi, kaa kɛlɛle tegele blipale nya we ma.

²⁵ Naa, blipale dale zuo kaa mawe ’ka zigɔɔnzan gi é dɛrɛ lo.

²⁶ Naa, ka faa a Kazambale benu nya, blivole Jézu Krist lɛ we ma.

²⁷ Ka faa lé wo ka batizéwo Krist gi, ka Krist zén ka ta sɔ zo.

²⁸ Juifi mi valé Grɛki mi ’ka é dɛrɛ lo; luu valé migɔné ’ka é dɛrɛ lo; gɔné valé le ’ka é dɛrɛ lo, naa, ka faa a mi do nya Jézu Krist gi.

²⁹ Yé dé ka a Krist zé nya, ’té ka a Abraam kulu nya, tɔnɔblezannu nya, blivolɛdére yɛrama.