Fwile 8 - Kazambale lé Sebe Sauunu 1979

¹ Gakelebale lé é ziin Moizi lɛ léé: Bé fe Arɔn lɛ léé, ’é bɛ valé tawomayili soi yuunu koo, ’yibalenu koo, ’yigurunu koo, wo ta, yé ’é da yolunu nya Éjipiti tɛrɛ la.

² Arɔn é bɛ soi Éjipiti lé ’yinu ta; yolunu da yé wo sɔɔla Éjipiti tɛrɛ la.

³ Naa, yokɛlɛzannu yee duo kɛlɛ ’wolé yo kɛlɛle nya. Wo da yolunu nya Éjipiti tɛrɛ la.

⁴ Faraɔn Moizi valé Arɔn laa yé é léé: ’Ka zanté vɔ Gakelebale lɛ léé, ’é yolunu si maa valé anlé munu ma baa, maa dan daan lɛ kalé munu ma, léé, ’wo sarakanu bo Gakelebale lɛ.

⁵ Moizi lé Faraɔn lɛ léé: I tɔ kɛlɛ blɛn an nwiin; bii koo, i wuozannu valé ilé munu koo, bléyi kyɛn va lé maa dan zanté vɔ lɛ, bii valé ilé kɔnnu sile yolunu lee we gi, yé wo vo yuu do kpen ɛ vaa?

⁶ Faraɔn léé: Tɛlɛ. Moizi léé: É dan kɛlɛ lɛ i dére yɛrama, ilé a gi dɔɔle we gi léé, Gakelebale, kolé Bale bɔmazan ’ka lo.

⁷ Bii koo, ilé kɔnnu koo, i wuozannu valé ilé munu koo, yolunu é dan si lɛ ka ma baa; wo dan vo lɛ yuu do kpen ɛ va.

⁸ Yé Moizi valé Arɔn si Faraɔn lé kɔn ’léé. A zuo, yolunu lé Gakelebale a pa zia Faraɔn ma, Moizi a ma zanté vɔ Gakelebale lɛ.

⁹ Gakelebale we kɛlɛ Moizi dére yɛrama; yolunu ga kɔnnu gi koo, gɔrɔ gi koo, féinu koo, wona.

¹⁰ Wo wo zun dɔ, yé tɛrɛ gin dɔ.

¹¹ Naa, Faraɔn a ye aan wo léé, we ’ko nyaa ’é ma, a bli kɛlɛ plɛplɛ yé é ’ka tɔné dɔ lɛ Moizi valé Arɔn lɛ lo, Gakelebale a fe fɛan zo, a zo.

Vungoi kinin gɔanu nya

¹² Gakelebale lé Moizi lɛ léé: Bé fe Arɔn lɛ léé, ’élé tawomayili soi yé ’é fɛ duun tɛrɛ lé vun lɛ; é dan nɔla lɛ gɔanu nya Éjipiti tɛrɛ faa la.

¹³ Wa kɛlɛ a zo; Arɔn é bɛ soi, ’té alé tawomayili a a lee, é fɛ duun tɛrɛ lé vun lɛ yé é nɔla gɔanu nya munu valé winu ma. Vun faa nɔla gɔanu nya Éjipiti tɛrɛ faa la.

¹⁴ Yokɛlɛzannu ’wolé yo kɛlɛ gɔanu bɔrale we gi, naa, wo ’ka bɔ lɛ a lɛ lo. Gɔanu vo munu valé winu ma.

¹⁵ Yé yokɛlɛzannu lé Farɔn lɛ léé: Bale bɛnwɔlɛ lé. Naa, Faraɔn é bli kɛlɛ plɛplɛ yé é ’ka tɔné dɔ lɛ wo lɛ lo, Gakelebale a fe fɛan zo, a zo.

Dirimabounu bɔra

¹⁶ ’Bɛ zuo Gakelebale lé Moizi lɛ léé: ’I nwa bladi tutu yé ’i go Faraɔn va; é dan bɔra lɛ gole yuu bai we gi. I dan a fe lɛ a lɛ léé: Gakelebale léma: ’I daan élé munu ma, ’wo ’é bɔ.

¹⁷ Dé i ’ka daan lɛ élé munu ma lo, é dan dirimabounu pa lɛ zia, bii koo, i wuozannu koo, ilé munu valé ilé kɔnnu koo, ka ma; dirimabounu é dan fan lɛ Éjipiti munu lé kɔnnu nya, yé wo dan tɛrɛ la sɔɔla lɛ.

¹⁸ Naa, yi ’ko la Gozɛn tɛrɛ lé yee Gakelebale lé munu éé nyanaan a ta bɛ, é dan wo glɛ dɔ lɛ ’bɛna yé dirimabounu ’ka dan kɛlɛ lɛ ’bɛna lo, ilé a gi dɔɔle we gi léé, yee Gakelebale, yee a tɛrɛ ’ko la.

¹⁹ É dan glɛ dɔ lɛ élé munu valé ilé munu gi. Tɔmase ’ko é dan kɛlɛ lɛ tɛlɛ.

²⁰ Gakelebale a kɛlɛ a zo. Dirimabounu kiɛre kiɛre da Faraɔn valé é wuozannu lé kɔnnu gi, yé dirimabounu Éjipiti tɛrɛ faa sɛrɛ.

²¹ Faraɔn Moizi valé Arɔn laa yé é léé: ’Ka go, ’ka sarakanu bo kalé Bale lɛ kolé tɛrɛ la.

²² Moizi léé: ’Bɛ zo we ’ka ana nyɛɛ lɛ lo; sarakanu lé ko dan wo bo lɛ Gakelebale, kolé Bale lɛ, é ’ka dan sɔ lɛ Éjipiti munu bli lɛ lo, azama. Dé ko Éjipiti munu lé balenu bo saraka nya wo yuɛ va, ’naan, wo ’ka dan gɔlɛ vuli lɛ ko va loo?

²³ Ko dan tawo lɛ yi yaa nyéné la, yé ko dan sarakanu bo lɛ Gakelebale, kolé Bale lɛ ’bɛna, é dan fe lɛ ko lɛ fɛan zo, a zo.

²⁴ Yé Faraɔn léé: Maa dan daan lɛ ka ma, sarakanu bole Gakelebale kalé Bale lɛ we gi nyéné la; naa, dé ka go, té ka go baa lo. ’Ka bazoro an tɔ ma.

²⁵ Moizi léé: Dé an si i va tɔɔn, maa dan bazoro lɛ Gakelebale lɛ i tɔ ma. Tɛlɛ, dirimabounu é dan si lɛ Faraɔn koo, é wuozannu koo, élé munu koo, wo ma baa. Naa, té Faraɔn é dabli kɛlɛ é dɛrɛ lo, munu gole sarakanu bole Gakelebale lɛ yi gale nya lo.

²⁶ Moizi si Faraɔn lé kɔn ’léé, yé é bazoro Gakelebale lɛ.

²⁷ We lé Moizi a laa, Gakelebale a kɛlɛ; dirimabounu si Faraɔn koo, é wuozannu koo, élé munu koo, wo ma baa. A do kpen ’ka vo lɛ lo.

²⁸ Naa, gɔnɔ ’ko nya é ziin, Faraɔn é bli kɛlɛ plɛplɛ, yé é ’ka daan lɛ wo ma, ’wo go lo.