Fwile 7 - Kazambale lé Sebe Sauunu 1979

Moizi valé Arɔn go Faraɔn va é ziin

¹ Gakelebale lé Moizi lɛ léé: Maa i kɛlɛ Bale nya Faraɔn lɛ; yé i bwe Arɔn é dan kɛlɛ lɛ ilé balelayezan nya.

² Bii, we faa lé maa dan a fe lɛ i lɛ, i dan a fe lɛ, yé i bwe Arɔn é dan we fe lɛ Faraɔn lɛ léé, ’é daan Izraɛl lé nénu ma yé ’wo si alé tɛrɛ la.

³ Yé maa dan Faraɔn bli kɛlɛ lɛ plɛplɛ yé maa dan anlé tɔmasenu valé anlé gyɛzorowenu gi gyɛ lɛ Éjipiti tɛrɛ la. Faraɔn ’ka dan tɔné dɔ lɛ ka lɛ lo.

⁴ Maa dan an bɛ nwa lɛ Éjipiti ma, yé maa dan anlé sunyanu palunu, anlé munu, Izraɛl lé nénu si lɛ Éjipiti tɛrɛ la we blɛn blele nya.

⁵ Éjipiti munu é dan a gi dɔɔ lɛ léé, maa a Gakelebale nya, ’té dé maa an bɛ soi Éjipiti tɛrɛ la yé maa Izraɛl lé nénu si wo va.

⁶ We lé Gakelebale Moizi valé Arɔn bélidɔ a nya, wa kɛlɛ; wa kɛlɛ ’bɛ zo.

⁷ Wo we fe Faraɔn lɛ bléyian va, ’té Moizi lɛɛ a yɔ ziɛn, yé Arɔn lɛɛ a yɔ ziɛn wɔlɛ yaa.

Arɔn lé yili kinin méné nya

⁸ Gakelebale lé Moizi valé Arɔn lɛ léé:

⁹ Dé Faraɔn we fe ka lɛ léé, ’ka gyɛzorowe kɛlɛ, i dan a fe lɛ Arɔn lɛ léé, ’élé tawomayili si, ’é a vuli Faraɔn ’lɛ. É dan kinin lɛ méné nya.

¹⁰ Moizi valé Arɔn go Faraɔn va yé we lé Gakelebale a fe, wa kɛlɛ. Arɔn élé tawomayili vuli Faraɔn valé é wuomunu ’lɛ, yé é kinin méné nya.

¹¹ Naa, Faraɔn wedɔɔmunu valé ’monédɔzannu laa; yé Éjipiti yokɛlɛzannu é ziin, wo ’wozé kɛlɛ ’bɛ zo wolé yo kɛlɛle nya.

¹² Wo faa ’wolé tawomayili vuli yé wo kini ménénu nya. Yé Arɔn lé tawomayili wolé tawomayilinu mini.

¹³ Faraɔn bli kɛlɛ plɛplɛ yé é ’ka é tɔné dɔ lɛ Moizi valé Arɔn lɛ lo, Gakelebale a fe fɛan zo, a zo.

’Yi kinin nyɛ nya

¹⁴ Gakelebale lé Moizi lɛ léé: Faraɔn bli a plɛplɛ; é ’ka nyi sié léé, é daan munu ma lo.

¹⁵ ’I go Faraɔn va tɛlɛ bladi; é dan bɔra lɛ gole yuu bai we gi, yé i dan go lɛ a zuo yuu gɔ ta. Tawomayili lé é nɔla méné nya, i dan go lɛ a nya i lee

¹⁶ yé bé fe Faraɔn lɛ léma: Gakelebale, Ébrunu lé Bale maa nwunvɔ i va, a fele i lɛ we gi léé, ’i daan élé munu ma, yé wo ’é bɔ nyéné lé fɛna. Yé fɔɔ bléyi ’ko va i ’ka tɔné dɔ lɛ lo.

¹⁷ Gakelebale léma: We ’ko ma lé i dan a gi dɔɔ lɛ léé, ’é a Gakelebale nya. Maa dan fɛ duun lɛ yuu lɛ tawomayili lé ke an lee, a nya; yé é dan kinin lɛ nyɛ nya.

¹⁸ Pɔnu lé ke yuu va, wo dan ga lɛ, yuu gin é dan dɔ lɛ, yé Éjipiti munu é dan kwa kuli lɛ léé, ’wo yuu minian, yé wo ’ka dan bɔ lɛ a lɛ lo.

¹⁹ Gakelebale lé Moizi lɛ léé: Bé fe Arɔn lɛ léé, ’élé tawomayili si yé ’é bɛ soi Éjipiti munu lé ’yinu ta, wolé yuunu koo, wolé ’yibalenu koo, wolé ’yigurunu koo, wolé ’yibaanu faa koo, wo ta. Wo dan kinin lɛ nyɛ nya; nyɛ é dan kɛlɛ lɛ Éjipiti tɛrɛ faa la, yilibɔnu valé gɔlɛbɔnu koo, wo gi.

²⁰ We lé Gakelebale a fe Moizi valé Arɔn lɛ, wa kɛlɛ. Arɔn tawomayili nwa yé é fɛ duun yuu lɛ Faraɔn valé é wuomunu yuɛ va; yé yuu faa kinin nyɛ nya.

²¹ Yuu va pɔnu ga, yuu gin dɔ, Éjipiti munu ’ka bɔa yuu minile lɛ é dɛrɛ lo, yé nyɛ kɛlɛ Éjipiti tɛrɛ faa la.

²² Naa, Éjipiti yokɛlɛzannu yee duo kɛlɛ wolé yo kɛlɛle nya. Faraɔn bli kɛlɛ plɛplɛ, yé é ’ka tɔné dɔ lɛ Moizi valé Arɔn lɛ lo, Gakelebale a fe fɛan zo, a zo.

²³ Faraɔn é po yéli yé é go élé kɔn ’léé; yé we ’konu ’ka a yuɛ gi bɔ lɛ lo.

²⁴ Éjipiti munu faa guru bo yuu sɔnɔ, mini’yi yele we gi, wo ’ka bɔa yuu lé ’yi minile lɛ lo, azama.

²⁵ Gakelebale lé yuu gyɛle zuo, yi gié sɔrafié.

Yolunu bɔra

²⁶ Gakelebale lé Moizi lɛ léé: ’I go Faraɔn va ma, bé fe a lɛ léma: Gakelebale léma: ’I daan élé munu ma, ’wo é bɔ.

²⁷ Dé i ’ka a nyi sié léé, i daan wo ma wo go lo, é dan yolunu bɔra lɛ ilé tɛrɛ faa la.

²⁸ Yolunu é dan kɛlɛ lɛ yuu va kiɛre kiɛre; wo dan si lɛ yuu va yé wo dan wɔra lɛ ilé kɔn gi koo, ilé yigyɛkɔn gi koo, ilé yialafɛ ta koo, i wuomunu valé ilé munu lé kɔnnu gi koo, ilé kurunu gi koo, ilé buruyɔɔ dɔ kananu gi koo, wona.

²⁹ Yolunu é dan vɔ lɛ biiboen koo, ilé munu koo, i wuozannu faa koo, ka ma.