Fwile 6 - Kazambale lé Sebe Sauunu 1979

Kazambale blivolɛdére fe wo lɛ

¹ Gakelebale lé Moizi lɛ léé: We lé maa dan a kɛlɛ lɛ Faraɔn lɛ, i dan a ye lɛ sin; an bɛ plɛplɛ ma lé é dan daan lɛ Izraɛl munu ma; an bɛ plɛplɛ ma lé é dan wo bin lɛ é boan élé tɛrɛ la.

² Kazambale we fe Moizi lɛ é ziin yé é lé a lɛ léé: Maa a Gakelebale nya.

³ An bɔra Abraam koo, Izak koo, Jakɔb koo, wo va, Plɛplɛfaazan Bale nya; naa, wo ’ka an dɔɔ lɛ anlé Gakelebale tɔ nya lo.

⁴ Maa gi pa do wo va léé, Kanaan tɛrɛ, wolé dɔwotɛrɛ lé wo ke bɛn nya a ta bɛ, maa dan a nɔ lɛ wo lɛ.

⁵ Izraɛl lé nénu lé Éjipiti munu wo kɛlɛ ’wo wuozannu nya, maa wolé dunnule ’ma, yé anlé gipawe sele dɔ an gi.

⁶ Bɛwemalé bé fe Izraɛl lé nénu lɛ léma: Maa a Gakelebale nya, nyanama blɛnnu lé Éjipiti munu a dɔ ka nwiin, maa dan ka vo lɛ kabo ma ’bɛ ma, maa dan ka si lɛ wolé luu gi yé maa dan ka si lɛ we gi an bɛ soile valé we blɛn blele nya.

⁷ Maa dan ka si lɛ anlé munu nya, maa dan kɛlɛ lɛ kalé Bale nya, yé ka dan a gi dɔɔ lɛ léé, maa, Gakelebale, kalé Bale ɛ ka si nyanama blɛnnu lé Éjipiti munu a dɔ ka nwiin, wo wuo.

⁸ Tɛrɛ lé maa anbo ’nyɔɔn léé, maa dan a nɔ lɛ Abraam koo, Izak koo, Jakɔb koo, wo lɛ, maa dan go lɛ ka nya ana; maa dan a nɔ lɛ ka lɛ kazé nya; maa, Gakelebale ɛ dan a kɛlɛ lɛ.

⁹ Moizi we fe ’bɛ zo Izraɛl lé nénu lɛ. Naa, wolé nyanéblele kaii valé wolé nyanama plɛplɛ zi, wo tɔné ’wii ’té wo ’ka Moizi dére maan lo.

¹⁰ Gakelebale we fe Moizi lɛ yé é léé:

¹¹ ’I go, bé fe Éjipiti mununwiinzan blɛn Faraɔn lɛ léé, ’é daan Izraɛl lé nénu ma, ’wo si alé tɛrɛ la.

¹² Moizi lé Gakelebale lɛ léé: I a yé loo? Izraɛl lé nénu ’ka tɔné dɔ lɛ an lɛ lo; maa lé maa ’ka wefezan nya lo ’naan, Faraɔn é dan é tɔné dɔ lɛ an lɛ kaa?

¹³ Gakelebale we fe Moizi valé Arɔn lɛ yé é wo bélidɔ Izraɛl lé nénu valé Éjipiti mununwiinzan blɛn Faraɔn lé we ma, Izraɛl lé nénu sile Éjipiti tɛrɛ la we gi.

Moizi valé Arɔn gɔnɔlawe

¹⁴ Izraɛlnu lé guniwuonu lé ke ’ko: Izraɛl lé né vininzan Rubɛn benu lé ke Énɔk koo, Palu koo, Esrɔn koo, Kaami koo, wo nya. Rubɛn gɔnɔlamunu lé ke bɛ.

¹⁵ Siméɔn benu a Jɛmuɛl koo, Jamɛn koo, Oad koo, Jakɛn koo, Sosaa koo, wo valé Kanaan le be Saul koo, wo nya. Siméɔn gɔnɔlamunu lé ke bɛ.

¹⁶ Lévi benu valé ’wo kulunu tɔnu lé ke ’ko; Gɛɛsɔn koo, Kéat koo, Mérari koo, woo lé; Lévi lé tɛrɛlalɛɛ a yɔ suiɛdo wɔlɛ vu ta sɔrafié.

¹⁷ Gɛɛsɔn benu a Libini valé Siméi nya, wo valé ’wo gɔnɔlamunu nya.

¹⁸ Kéat benu a Amaram koo, Jiséaa koo, Ébrɔn koo, Uziɛl koo, wo nya. Kéat lé tɛrɛlalɛɛ a yɔ suiɛdo wɔlɛ vu ta yaa.

¹⁹ Mérari benu a Makli valé Musi nya. Lévi gɔnɔlamunu valé ’wo kulunu lé ke bɛ.

²⁰ Amaram é ti buru Jokébɛd si é na nya; é Arɔn valé Moizi yaa a lɛ. Amaram lé tɛrɛlalɛɛ a yɔ suiɛdo wɔlɛ vu ta sɔrafié.

²¹ Jiséaa benu lé ke Koré koo, Néfɛg koo, Zikri koo, wo nya.

²² Uziɛl benu lé ke Misaɛl koo, Elsafan koo, Sitri koo, wo nya.

²³ Aminadab lu Éliséba lé ke Naa?-?sɔn buru nya, Arɔn a si é na nya. Nadab koo, Abiu koo, Éléazaa koo, Itamaa koo, é wo yaa a lɛ.

²⁴ Koré benu a Asii koo, Elkana koo, Abiasafa koo, wo nya. Koré gɔnɔlamunu lé ke bɛ.

²⁵ Arɔn be Éléazaa Putiɛl lu do si é na nya; yé é Finé yaa a lɛ. Lévi munu lé guniwuonu valé wo gɔnɔlamunu a ’bɛ ɛ zo.

²⁶ Arɔn valé Moizi ’ko lé Gakelebale wo bélidɔ a fele nya léé: ’Ka Izraɛl lé nénu si Éjipiti tɛrɛ la wolé sunyanu palu yɛrama.

²⁷ Wo ɛ we fe Éjipiti mununwiinzan Faraɔn lɛ, Izraɛl lé nénu sile Éjipiti tɛrɛ la we gi. Moizi ’ko valé Arɔn ’ko lé.

²⁸ Gakelebale we fe Moizi lɛ Éjipiti tɛrɛ la bléyian va,

²⁹ Gakelebale lé Moizi lɛ léé: Maa a Gakelebale nya. We faa lé maa fé i lɛ, bé fe Éjipiti mununwiinzan blɛn Faraɔn lɛ.

³⁰ Yé Moizi we fe Gakelebale yuɛ va yé é a zi pa léé: ’A, an ’ka wefezan nya lo; Faraɔn é dan tɔné dɔ lɛ an lɛ kaa?