Fwile 5 - Kazambale lé Sebe Sauunu 1979

Moizi valé Arɔn go Faraɔn va

¹ ’Bɛ zuo Moizi valé Arɔn go Faraɔn va yé wo lé a lɛ léé: Gakelebale, Izraɛl lé Bale léma: ’I daan ’élé munu ma, ’wo go fɛti kɛlɛ nyéné la ’é tɔ bɔle we gi.

² Faraɔn a zi pa léé: De ɛ ke Gakelebale nya yé maa a dére lɛdɔma yé maa daan Izraɛl maa? Maa ’ka Gakelebale dɔɔa lo yé maa ’ka dan daan lɛ Izraɛl ma pelo.

³ Wo léé: Ébrunu lé Bale bɔra ko va. ’I zi nɔ ko lɛ léé, ko yi yaa tawo nyéné la yé ko sarakanu bo Gakelebale lɛ, té é ko gyɛ migyɛgyɛ valé gwɔun nya lo we gi.

⁴ Éjipiti mununwiinzan blɛn lé wo lɛ léé: Moizi valé Arɔn, mɛmalé ka munu si wolé nyanama laa? ’Ka go kalé nyanama pa.

Faraɔn nyané taa pa Izraɛlnu ta

⁵ Faraɔn léé: Bé ye, munu ’ko kɛlɛ kiɛre kolé tɛrɛ la yé ka ’ka wo vona flee yé wo ’wolé nyanama pa lo.

⁶ ’Bɛ yi duo nya munu lé nyanama taginizannu valé Izraɛlnu lé wo wo dɔ kominu nya ’wo bwenu zuo, Faraɔn wo bélidɔ léé:

⁷ Té ka lɔɔ nɔ munu lɛ é dɛrɛ briki gyɛle we ma bélé é vinin zo lo; wobozen ’wo go lɔɔ so.

⁸ Naa, briki ’léé lé wa gya é vinin, ’wo yee ’léé duo gyɛ, té ka a do kpen si a ta lo; wa kun‐anwozannu nya, bɛwemalé woo siaan léé, ’wo go ’wolé Bale ban lɛ.

⁹ ’Ka nyanama taa nɔ wo lɛ yé wa pa, yé té ’wo tɔné dɔ vié dére lɛ é dɛrɛ lo.

¹⁰ Munu lé nyanama taginizannu valé kominu lé munu lɛ léé: Faraɔn léma: Wo ’ka lɔɔ no ka lɛ é dɛrɛ lo;

¹¹ kabozen ’é go lɔɔ so, dé ka a ye fɛana, ana, naa, wo ’ka kalé nyanama do kpen sina a ta lo.

¹² Munu nwɛɛn Éjipiti tɛrɛ faa la ’sapun soowɔlale we gi lɔɔ lɛi.

¹³ Nyanama taginizannu wo tunu yé wo léé: ’Kalé nyanama lɛ sɔɔ yi do do ma, ka kɛla turu ’té wo lɔɔ no ka lɛ fɛan zo bɛ, a zo.

¹⁴ Izraɛlnu lé kominu lé Faraɔn lé nyanama taginizannu wo dɔ Izraɛlnu zuo, wo ’bɛnu bla yé wo léé: Briki ’léé lé wa fe ka lɛ, mɛmalé ka ’ka a lɛ sɔɔ lɛ yese valé kyɔ bélé é vinin zo loo?

¹⁵ Izraɛlnu lé kominu go ’wo ma dunnu lɛ Faraɔn lɛ, yé wo lé a lɛ léé: Mɛmalé i we kɛlɛ i wuozannu lɛ a zoo?

¹⁶ Wo ’ka lɔɔ no i wuozannu lɛ lo, yé wo lé ko lɛ léé, ’ko briki gyɛ. Yé bé ye, wo i wuozannu bla bélé fɛan zo lé ilé munu a wegyɛmunu nya, a zo.

¹⁷ Faraɔn léé: Ka a kun‐anwozannu nya. Bɛwemalé ka léé, ’wo go Gakelebale ban lɛ.

¹⁸ Sin, ’ka go nyanama pa; wo ’ka dan lɔɔ nɔ lɛ ka lɛ lo, yé ’ka yee briki ’léé duo gyɛ.

¹⁹ Izraɛlnu lé kominu a ye léé, dé wa fe léé, té ’wo briki do kpen si a ta lo, ’wo yi do do zé gyɛ, ’té wo ’wo kɛlɛ nyanéblezannu baba nya.

²⁰ Wo si Faraɔn va aan wo, wo kee Moizi valé Arɔn nya, ’té ’bɛnu a wo lɛbɛnna.

²¹ Wo lé wo lɛ léé: Gakelebale ’é ka ye ma, yé é a we ble ma. Ka ko gin dɔ Faraɔn valé é wuomunu nyé gi, yé ka gwɔun pa wo lee ko gyɛle we gi.

²² Moizi go Gakelebale va é ziin yé é léé: Mizan, mɛmalé i we tɔntɔn kɛlɛ munu ’ko lɛɛ? Mɛmalé i an nwunvɔɔ?

²³ É sia bléyian va lé maa go Faraɔn va wefele i tɔ nya we gi, éé nyané paan munu ’ko ta, yé i ’ka ilé munu si lɛ we gi lo.