Fwile 40 - Kazambale lé Sebe Sauunu 1979

Sɔkɔn dɔle

¹ Gakelebale we fe Moizi lɛ yé é léé:

² Moné vinin lé yi vininzan nya, i dan zén‐ékevasɔkɔn dɔ lɛ.

³ I dan wenayefɛ pagikɛsu dɔra lɛ a gi, yé i dan kɛsu ta bua lɛ élé sɔ nya.

⁴ I dan da lɛ tablé nya yé bé ta fɛnu faa pa ’wo pana. I dan da lɛ kyan fintran nya yé i dan alé bɔnénu ma’lɛrɛ lɛ.

⁵ Balebanna lé wa kɛlɛ kyan nya, ’té woo lasikɔrɔ no a ta bɛ, i dan ’bɛ dɔra lɛ wenayefɛ pagikɛsu ’lɛ, yé i dan sɔkɔn lɛtansɔ dun lɛ sɔkɔn ’léé.

⁶ Balebanna lé woo balebanwi kyɛ blé a ta, i dan a dɔra lɛ zén‐ékevasɔkɔn ’léé.

⁷ I dan ’wolikana dɔra lɛ zén‐ékevasɔkɔn valé balebanna méléna, yé ’i ’yi zén a gi.

⁸ I dan gɔrɔ bo lɛ fɛnu faa zi, yé ’i gɔrɔ lɛtansɔ dun gɔrɔ ’léé.

⁹ Nyɔnɔ lé wa zén‐é mi ta, i dan a si lɛ yé bé zén sɔkɔn valé é gifɛnu faa ta, yé ’i bɛ pla yee valé élé nyanamapafɛnu faa ta; yé a ’lɛ é dan dɔ lɛ.

¹⁰ Nyɔnɔ lé wa zén‐é mi ta, i dan a zén lɛ balebanna lé woo balebanwi kyɛ blé ana, a ta, yé ’i bɛ pla balebanna ta; yé balebanna ’lɛ é dan dɔ lɛ.

¹¹ Nyɔnɔ lé wa zén‐é mi ta, i dan a zén lɛ ’wolikana valé é gane ta, yé i dan i bɛ pla lɛ a ta Bale zé nya.

¹² I dan Arɔn valé é benu bié lɛ zén‐ékevasɔkɔn ’léé, yé i dan wo zuru lɛ ’yi nya.

¹³ I dan balelasɔ zén lɛ Arɔn ta, i dan nyɔnɔ zén lɛ a ta, yé i dan i bɛ pla lɛ a ta, alé balebannyanama pale an lɛ we gi.

¹⁴ I dan Arɔn benu bié lɛ, yé i dan varɔ bɛ grɔgrɔ zén lɛ wo ta,

¹⁵ yé i dan nyɔnɔ zén lɛ wo ta, i nyɔnɔ zén wo ti ta fɛan zo, a zo, wolé balebannyanama pale an lɛ we gi. Nyɔnɔ zénle wo ta ’ko, ’bɛ é dan balebannyanama pale kɛlɛ lɛ wo kulunu zé nya sɔbɛla we nya lɛɛfaama, a glɛ ’ka lo.

¹⁶ We faa lé Gakelebale a fe Moizi lɛ, Moizi a kɛlɛ. É a kɛlɛ ’kyɛ.

¹⁷ Lɛɛ fiézan gi, moné vininzan lé yi vinin nya, wo sɔkɔ dɔ.

¹⁸ Moizi sɔkɔn dɔ, é a ganevɔgifɛnu dɔra, yé é yilifeenu dɔ, yé é wo sɛedɔmayilinu wɔra wo gi yé é wɛyilinu dɔ.

¹⁹ É sɔkɔn tabuafɛ bua é ta, yé é ’bɛ ta loru tabuafɛ bua é ta é ziin, Gakelebale a fe Moizi lɛ fɛan zo, a zo.

²⁰ É wenayefɛ si yé é a dɔra kyankɛsu gi. É kɛsu siyilinu wɔra, yé é nyanai zén mi la nyanana dɔra kɛsu ta loru.

²¹ É go kyankɛsu nya sɔkɔn gi; é kɔnmikɛlɛsɔ dun yé é wenayefɛ pagikɛsu ta yɔɔ a nya, Gakelebale a fe Moizi lɛ fɛan zo, a zo.

²² É tablé dɔra zén‐ékevasɔkɔn gi, sɔkɔn lé yirinwana bɛbolazia kɔnmikɛlɛsɔ ’lɛzia;

²³ yé é burunu pla a ta ’wo bale nya, Gakelebalé ’lɛ, Gakelebale a fe Moizi lɛ fɛan zo, a zo.

²⁴ Yé é fintran dɔra zén‐ékevasɔkɔn gi, tablé yara, sɔkɔn lé yirinwana bɛyilazia;

²⁵ yé é fintran lé bɔnénu ma’lɛrɛ Gakelebale ’lɛ, Gakelebale a fe Moizi lɛ fɛan zo, a zo.

²⁶ Balebanna lé wa kɛlɛ kyan nya, é a dɔra zén‐ékevasɔkɔn gi, kɔnmikɛlɛsɔ ’lɛzia;

²⁷ yé é lasikɔrɔ ginzan kyɛ ble a ta, Gakelebale a fe Moizi lɛ fɛan zo, a zo.

²⁸ É sɔkɔn lɛtansɔ dun sɔkɔn ’léé.

²⁹ Balebanna lé woo balebanwi kyɛ blé a ta, é a dɔra zén‐ékevasɔkɔn ’léé; yé é balebanwi kyɛ ble a ta, yé é Bale blan nɔ a ta, Gakelebale a fe Moizi lɛ fɛan zo, a zo.

³⁰ É ’wolikana dɔra zén‐ékevasɔkɔn valé balebanna méléna, yé é ’yi zén a gi, munu zurule we ma;

³¹ Moizi koo, Arɔn koo, é benu koo, wo ’wo bɛnu valé ’wo ganenu zuru ’bɛna;

³² dé wo wɔra zén‐ékevasɔkɔn gi yé wo bié balebanna ma, wo zuru, Gakelebale a fe Moizi lɛ fɛan zo, a zo.

³³ É gɔrɔ bo sɔkɔn valé balebanna zi, yé é gɔrɔ lɛtansɔ dun gɔrɔ ’léé. ’Bɛ zo lé Moizi nyanama pale lɛ sɔɔ.

Gakelebale lé fuasan sɔkɔn fan

³⁴ Yé lati bua zén‐ékevasɔkɔn ta, yé Gakelebale lé fuasan sɔkɔn fan.

³⁵ Lati vo zén‐ékevasɔkɔn ta, yé Gakelebale lé fuasan sɔkɔn fan, amalé Moizi ’ka bɔa wɔrale lɛ zén‐ékevasɔkɔn gi lo.

³⁶ Izraɛl lé nénu lé tawole faa gi, dé lati si sɔkɔn ta, woo zi sian.

³⁷ Dé lati ’ka tan nwa lɛ lo, wo ’ka zi sian lo, fɔɔ ’té lati nwa é wo.

³⁸ Gakelebale lé lati a sɔkɔn ta é yiéyi; yé kyɛ a a ta é béli, Izraɛl lé munu faa yuɛ va, wolé tawole faa gi.