Fwile 39 - Kazambale lé Sebe Sauunu 1979

Wo Balelasɔnu kɛlɛ

¹ Sɔnu lé munu a zén ’wo ta yé wo go nyanama pa fɛna sauun na, ’bɛnu koo, Arɔn lé balelasɔnu koo, wo wo kɛlɛ glayivayou sɔ koo, galunaa sɔ koo, sɔ sɔɔn koo, wo nya, Gakelebale a fe Moizi lɛ fɛan zo, a zo.

² Wo éfɔdi kɛlɛ kyan koo, glayivayou kununu valé galunaa kununu valé kununu sɔɔn koo, lɛn nénéle sɔ zima koo, wo nya.

³ Wo kyan gyɛ lɛlɛné, yé wa fee bo kyanbale kenekenene nya yé wo pɛɛ gyɛ a nya, sɔ lé a yuɛɛ ke glayivayou valé galunaa valé sɔɔn koo, a ta, yé wo pɛɛ gyɛ a nya lɛnsɔ zima ta é ziin; wa yuɛɛ la gɔrɔ la.

⁴ Wa gɔnu kɛlɛ a bɛapa ta yé ’bɛ éfɔdi kun ékema, ’bɛ zo lé wo éfɔdi kun ékema é lɔlu fié ma.

⁵ Wo éfɔdi nyanama pa fɛan zo, wo bɔn‐in kunsɔ kɛlɛ yee duo zo yé wa dɔ a ta; wa kɛlɛ kyan koo, glayivayou kununu valé galunaa kununu valé kununu sɔɔn koo, lɛn nénéle sɔ zima koo, wo nya, Gakelebale a fe Moizi lɛ fɛan zo, a zo.

⁶ Wo ɔnisigɔlɛ vɔ kyan gi yé wo Izraɛl benu tɔ guru vɔ wo ta, woo guru vɔa bɛmazéné ma fɛan zo, a zo.

⁷ Wo wo pla éfɔdi bɛapa gɔnu ta, Izraɛl benu seledɔmigifɛ nya, Gakelebale a fe Moizi lɛ fɛan zo, a zo.

⁸ Wo éfɔdi nyanama pa fɛan zo, wo golɛgiweblefɛ kɛlɛ yee duo zo, kyan koo, glayivayou kununu valé galunaa kununu valé kununu sɔɔn koo, lɛn nénéle sɔ zima koo, wo nya, ’té wo yuɛ la a é gɔrɔlale.

⁹ Golɛgiweblefɛ a é sun nya, é boro nya; a sangi a bɛlaa nya do, yé a ’wuola a bɛlaa nya do; é a é boro nya.

¹⁰ Wa ’lɛrɛ golɛ wezan bale ziɛn nya: a bale vininzan a saadwanégɔlɛ koo, topazégɔlɛ koo, émérodégɔlɛ koo, wo nya;

¹¹ a bale fiézan a ɛsikabuklégɔlɛ koo, safiigɔlɛ koo, diamangɔlɛ koo, wo nya;

¹² a bale yaazan a opalgɔlɛ koo, agatégɔlɛ koo, amétiségɔlɛ koo, wo nya;

¹³ a bale ziɛnzan a krisolitégɔlɛ koo, ɔnisigɔlɛ koo, jasipégɔlɛ koo, wo nya. Wo gɔlɛwezannu ’ko vɔ ’wo vɔgikyan gi.

¹⁴ Wa vu ta fié, Izraɛl benu tɔnu yɛrama; wo guru vɔ wo ta, bélé woo bɛmazéné ta guru vɔa fɛan zo, a zo, bɛn vu ta fié tɔ a wo ta do do.

¹⁵ Wo gɔgɔbale kenenenu kɛlɛ kyan tegele nya, yé wa tan bale nya.

¹⁶ Wo kyanvɔgifɛ fié valé kyankpɔwɔlɛné fié kɛlɛ, yé wo yee kyan kpɔwɔlɛné fié vɔ golɛgiweblefɛ sun fié ta.

¹⁷ Wo kyanbale fié vɔ kpɔwɔlɛné fié gi golɛgiweblefɛ sun fié ta;

¹⁸ yé wo kyanbale fié zɔ polu dɔ, é vɔgifɛ fié lé wa pla éfɔdi bɛapa gɔ fié ta, wo ma.

¹⁹ Wo kyankpɔwɔlɛné fié kɛlɛ é ziin, yé wo wo vɔ golɛgiweblefɛ wuozan lé ke éfɔdi ma zia, a sun fié ma.

²⁰ Wo kyankpɔwɔlɛné fié kɛlɛ é ziin, yé wo wo vɔ éfɔdi lé bɛapa gɔ fié wuo, a ’lɛ zia, fɛ vɔle é ké ’lééna sɔnɔ, éfɔdi lé bɔn‐in kunsɔ ta loru.

²¹ Wo glayivayou bale polu dɔ golɛgiweblefɛ lé kpɔwɔlɛnu valé éfɔdi lé kpɔwɔlɛnu ma, golɛgiweblefɛ kɛlɛle éfɔdi lé bɔn‐in kunsɔ ta loru we ma, ’té é ’ka sié a ta lo, fɛan zo lé Gakelebale a fe Moizi lɛ, a zo.

²² Wo éfɔdi lé varɔ kɛlɛ, wa tan glayivayou sɔ saa nya.

²³ Wo varɔ ’wuo ’léé pa é méléna, bélé gulidan varɔ ’wuo ’léé zo, yé wo sɔbɛ béé a lɔlu ’léé, té varɔ é fia lo we gi.

²⁴ Wo grénadéyili poro fotonu kɛlɛ lɛn nénéle nya, ’té wo yuɛ a glayivayou valé galunaa valé sɔɔn, yé wo wo dun varɔ ’léé;

²⁵ wo pannénu kɛlɛ kyan tegele nya, yé wo pannénu dun grénadéyili poro méléna varɔ ’léé faa na, grénadéyili poro méléna;

²⁶ kyanpanné do, grénadéyili poro do, kyanpanné do, grénadéyili poro do, wa dun varɔ ’léé faa na, balebannyanama pale we ma, Gakelebale a fe Moizi lɛ fɛan zo, a zo.

²⁷ Wo lɛnsɔ zima tan yé wa kini varɔ bɛ grɔgrɔ nya Arɔn valé é benu zé nya;

²⁸ nɔɔn lé wa kɛlɛ lɛnsɔ zima nya koo, wo ’lɛrɛkoro lé wa kɛlɛ lɛnsɔ zima nya koo, kyɛkoto lé wa kini lɛn nénéle sɔ zima nya koo,

²⁹ bɔn‐in kunsɔ lé wa kini lɛn nénénle sɔ zima nya, ’té wo pɛɛ gyɛ a ta bɛ, ’té a yuɛɛ a glayivayou valé galunaa valé sɔɔn, ’bɛ bɔn‐in kunsɔ ’ko koo, wo wo kɛlɛ, Gakelebale a fe Moizi lɛ fɛan zo, a zo.

³⁰ Wo kyan tegele gyɛ lɛlɛné, balelanɔɔn ta kyan nya, yé wo sɛbɛ gyɛ a ta, woo bɛmazéné ta guru vɔa fɛan zo, a zo, léé: Gakelebale sauun zé lé.

³¹ Wa dɔ nɔɔn ta loru glayivayou bale nya, Gakelebale a fe Moizi lɛ fɛan zo, a zo.

Wo ’wolé nyanama gɔɔn Moizi lɛ

³² ’Bɛ zo lé wo zén‐ékevasɔkɔn ma nyanama faa lɛ sɔɔ. We lé Gakelebale a fe Moizi lɛ, Izraɛl lé nénu a faa kɛlɛ; wa kɛlɛ a zo.

³³ Wo da zén‐ékevasɔkɔn nya Moizi va; wo da sɔkɔn valé a mafɛnu faa nya; nyawɛnnénu koo, yilifeenu koo, sɛedɔmayilinu koo, wɛyilinu valé ’wo ganevɔgifɛnu koo,

³⁴ sɔkɔn tabuafɛ lé ke ’blagɔné kɔlɛ lé wa vɔ zéri’yi va, a nya, ’bɛ koo, a tabuafɛ lé ke dofɛn kɔlɛ nya, ’bɛ koo, kɔnmikɛlɛsɔ koo,

³⁵ wenayefɛ pagikɛsu valé é siyilinu koo, nyanai zé mi la nyanana koo,

³⁶ tablé valé é ma nyanamapafɛnu valé Bale ’lɛburunu koo,

³⁷ kyan tegele fintran valé alé bɔnénu, ’té wo ma a é ’lɛrɛle, wo valé fintran ma nyanamapafɛnu valé alé nyɔnɔ koo,

³⁸ balebanna lé wa kɛlɛ kyan nya koo, nyɔnɔ lé wa zén‐é mi ta valé lasikɔrɔ ginzan koo, sɔkɔn lɛtansɔ koo,

³⁹ balebanna lé wa kɛlɛ zéné nya, é valé élé kɔrané valé é siyilinu valé é ma nyanamapafɛnu faa koo, ’wolikana valé é gane koo,

⁴⁰ gɔrɔ lé sɔnu koo, a mélénayilinu koo, a vɔgifɛnu koo, gɔrɔ lɛtansɔ koo, a balenu valé a kunfɛnu koo, sɔkɔn gi nyanamapafɛnu faa koo,

⁴¹ sɔnu lé woo wo zén‐é ’wo ta yé wo nyanama pa fɛna sauun na koo, balebanzan Arɔn lé balelasɔnu koo, sɔnu lé a benu a zén ’wo ta balebannyanama pale we ma koo, wo da wo faa nya.

⁴² Izraɛl lé nénu nyanama ’konu faa pa, yé we faa lé Gakelebale a fe Moizi lɛ, wa lɛdɔma.

⁴³ Moizi nyanama faa nagini; yé bé ye, wa kɛlɛ Gakelebale dére yɛrama, wa kɛlɛ ’kyɛ. Yé Moizi wo drɔɔ vo.