Fwile 38 - Kazambale lé Sebe Sauunu 1979

Wo gɔrɔ gifɛnu kɛlɛ

¹ Balebanna lé wo dan balebanwi kyɛ ble lɛ a ta, é a kɛlɛ akasiayili nya; a sangi a mɛtrɛ fié é buu, yé a’wuola a mɛtrɛ fié é buu; a sangi valé a ’wuola faa bɔ ékema do, é sun nya, yé a nwale loru kɛlɛ mɛtrɛ do é buu.

² É bélinu dɔ balebanna sun ziɛn ta, ’té woo valé balebanna sun a é vɔle é ke ’léé do, yé é wo ta sɔɔla zéné nya.

³ É balebanna ma nyanama pafɛnu faa kɛlɛ, kyɛyee zéngifɛnu koo, diadianu koo, kananu koo, wiblegaannénu koo, kyɛnyɛ sifɛnu koo, wo nya; é a ma nyanamapafɛnu faa kɛlɛ zéné nya.

⁴ É zéné kɔrané kɛlɛ nyannyanné zo balebanna zé nya, yé é a pla balebanna lɔlu wuo, é sia tɛrɛ zia fɔɔ yé é bɔ balebanna méléna yɛrama.

⁵ É kpɔwɔlɛ ziɛn sele, yé é wo dɔ zéné nyannyanné sun ziɛn ta, a siyilinu wɔrale wo gi we ma.

⁶ É a siyilinu kɛlɛ akasiayili nya, yé é wo ma sɔɔla zéné nya.

⁷ É a siyilinu wɔra kpɔwɔlɛnu lé ke balebanna sannu ta, wo gi. É a kɛlɛ é koro nya, yilifeenu nya.

⁸ É zéné ’wolikana kɛlɛ, yé é a gane dɔ zéné nya, lomu lé woo zén‐é ékeva zén‐ékevasɔkɔn ’léé, wolé vlinvlinnu nya.

⁹ É gɔrɔ kɛlɛ. Yirinwana bɛyilazia, é gɔrɔ kɛlɛ lɛnsɔ zima lé wa tan lɛn nénéle nya, ’té a grɔgrɔ a mɛtrɛ yɔ fié wɔlɛ vu, a nya,

¹⁰ yé a méléna yili kɛlɛ yɔ do, é valé é suruégizéné yɔ do nya; a mélénayili ma ’kɔblanénu valé sɔkunfɛnu a gɔɔlifu nya.

¹¹ Yirinwana bɛbolazia, sɔ grɔgrɔ kɛlɛ mɛtrɛ yɔ fié wɔlɛ vu, yé a mélénayili a yɔ do, é valé é suruégizéné yɔ do nya; a mélénayili ma ’kɔblanénu valé sɔkunfɛnu a gɔɔlifu nya.

¹² Yirivɔnazia, sɔ grɔgrɔ a mɛtrɛ yɔ do wɔlɛ soru, yé a mélénayili a vu, é valé é suruégizéné vu nya; a mélénayili ma ’kɔblanénu valé sɔkunfɛnu a gɔɔlifu nya.

¹³ Yirinwana zia, gɔrɔ ’wuola mɛtrɛ yɔ do wɔlɛ soru gi,

¹⁴ a bɛ do la sɔ grɔgrɔ kɛlɛ mɛtrɛ sɔrafié é buu, yé ’bɛ mélénayili a yaa, é valé é suruégizéné yaa nya,

¹⁵ yé gɔrɔ ’léé bɛ koɛ la, sɔ grɔgrɔ a mɛtrɛ sɔrafié é buu, yé ’bɛ mélénayili a yaa, é valé é suruégizéné yaa nya.

¹⁶ Sɔnu lé wo gɔrɔ zi lɛ sɔɔ, wa lɛnsɔ zima lé wa tan lɛn nénéle nya, a nya.

¹⁷ A mélénayilinu suruégifɛnu a zéné nya, a mélénayilinu ma ’kɔblanénu valé wolé sɔkunfɛnu a gɔɔlifu nya, yé a mélénayili ’wuo ma a é sɔɔlale gɔɔlifu nya. Gɔrɔ mélénayilinu faa a é vɔle é ke ’léé gɔɔlifu sɔkunfɛnu nya.

¹⁸ Wo gɔrɔ lɛtansɔ kɛlɛ lɛnsɔ zima lé wa tan lɛn nénéle nya, ’té a yuɛɛ ke glayivayou koo, galunaa koo, sɔɔn koo, a nya; wo pɛɛ gyɛ a ta; a sangi a mɛtrɛ vu yé a nwale loru a mɛtrɛ fié é buu, sɔgɔrɔ ’wuola a fɛan zo, a zo;

¹⁹ a mélénayili ziɛn valé wo vɔgifɛ a zéné nya; alé ’kɔblanénu valé sɔkunfɛnu a gɔɔlifu nya, yé wo ’wuo ma a é sɔɔlale gɔɔlifu nya.

²⁰ Sɔkɔn valé gɔrɔ kunfɛnu faa a zéné nya.

Sɔkɔn dɔgɔɔli ’léé

²¹ Zén‐ékevasɔkɔn lé Lévinu a dɔ Moizi lé bélidɔwe yɛrama, ’té Balebanzan Arɔn be Itamaa ɛ ke nyanama nwiinzan nya bɛ, wo gɔɔli sɛrɛ fɛan zo a kɛlɛle ma, yee lé ke ’ko.

²² We faa lé Gakelebale Moizi bélidɔ a nya, Uru be Uri, ’bɛ be Bɛsaléɛl, Juda bɛngizan a kɛlɛ.

²³ Dan bɛngizan Aisamak be Ooliab a Bɛsaléɛl bɔluzan nya; guru vɔle gɔlɛ ta koo, we dɛrɛ kɛlɛle koo, sɔ lé wo yuɛɛ ke glayivayou valé galunaa valé sɔɔn, pɛɛ gyɛle wo valé lɛnsɔ zima ta koo, Ooliab a kɛla é zua.

²⁴ Kyan lé wa si fɛna sauun lé fɛnu kɛlɛle we ma, ’té munu da a nya Bale blan nya bɛ, é kɛlɛ talan yɔ do wɔlɛ sɔraziɛn, é valé sikla wuru yaa yɔ suiɛdo wɔlɛ vu, fɛna sauun lé sikla yɛrama.

²⁵ Gɔɔlifu lé wa ye munu nɔnɔle we ma, é kɛlɛ talan yɔ soru valé sikla wuru sɔraa yɔ sɔraa wɔlɛ vu ta soru, fɛna sauun lé sikla yɛrama.

²⁶ Munu lé wo wo nɔnɔ, ’té wo lɛɛ gié yɔ do ta, wo faa do do sikla lɛ do nɔ, fɛna sauun lé sikla yɛrama; wa mi baa wuru do é ta lé mi baa yɔ soru wɔlɛ do, é ta lé mi wuru sɔrafié yɔ sɔrafié wɔlɛ vu.

²⁷ Wo gɔɔlifu sikla yɔ soru sele fɛna sauun lé ganevɔgifɛ valé kɔnmikɛlɛsɔ ganevɔgifɛ nya, ganevɔgifɛ yɔ soru, talan yɔ soru, ’bɛ gi léé, talan do ganevɔgifɛ do.

²⁸ ’Kɔblanénu koo, gɔrɔ mélénayili lé sɔkunfɛnu koo, wo wo kɛlɛ gɔɔlifu sikla wuru yaa yɔ sɔraa wɔlɛ vu ta soru nya yé wo wɛyili ’wuonu ma sɔɔla a nya é ziin.

²⁹ Zéné lé wa nɔ Bale blan nya, é kɛlɛ talan yɔ yaa wɔlɛ vu, é valé sikla baa do wuru fié.

³⁰ Zén‐ékevasɔkɔn ’léé wɛyilinu ganevɔgifɛnu koo, balebanna lé wa kɛlɛ zéné nya, é valé é ta nyannyanné koo, a ma nyanamapafɛnu faa koo,

³¹ gɔrɔ mélénayili vɔgifɛnu faa koo, gɔrɔ ’léé yili vɔgifɛnu koo, sɔkɔn kunfɛnu valé a gɔrɔ kunfɛnu koo, wo wo kɛlɛ zéné ’ko nya.