Fwile 37 - Kazambale lé Sebe Sauunu 1979

Wo sɔkɔn gifɛnu kɛlɛ

¹ Bɛsaléɛl kyankɛsu kɛlɛ akasiayili nya; a sangi kɛlɛ mɛtrɛ do bɛlaa do, a ’wuola kɛlɛ mɛtrɛ buu do bɛlaa do, yé a nwale loru kɛlɛ mɛtrɛ buu do bɛlaa do.

² É a ta sɔɔla kyan tegele nya, é a gi valé a lala sɔɔla yé é kyanbale diri a lɔlu zi.

³ É kyankpɔwɔlɛ sele azé nya, yé é wo vɔ a sun ziɛn ta, a fié a bɛ do la yé a fié a bɛ do la.

⁴ É a siyilinu kɛlɛ akasiayili nya yé é wo ma sɔɔla kyan nya.

⁵ É a siyilinu wɔra kyankpɔwɔlɛnu gi, kyankɛsu bɛ fié ta, kyankɛsu sile we ma.

⁶ É nyanai zén mi la nyanana kɛlɛ kyan tegele nya; a sangi kɛlɛ mɛtrɛ do bɛlaa do, a ’wuola kɛlɛ mɛtrɛ buu do bɛlaa do.

⁷ É sérubɛn foto fié kɛlɛ kyan nya; é wo kɛlɛ, kyan lé wa gyɛ, a nya, nyanai zén mi la nyanana ’wuo fiénu ta;

⁸ sérubɛn do a a ’wuo do la yé sérubɛn do a a ’wuo koɛ ta; sérubɛnnu koo, nyanai zén mi la nyanana koo, a faa kɛlɛ é ke ’léé do.

⁹ Sérubɛnnu ’wo bɛa soi a ta loru yé wo nyanai zén mi la nyanana ta bua a nya, ’té wa wo ke yara ma; sérubɛnnu wo yara dɔ nyanai zén mi la nyanana ta.

¹⁰ É tablé kɛlɛ akasiayili nya; a sangi kɛlɛ mɛtrɛ do, a ’wuola kɛlɛ mɛtrɛ buu do, yé a wuo vɔle kɛlɛ mɛtrɛ buu do bɛlaa do.

¹¹ É a ta sɔɔla kyan tegele nya, yé é kyanbale diri a lɔlu zi.

¹² É tablé lɔlu dɔ é ta loru bɛnwɔlɛ ziɛn pale ékema zo, yé é kyanbale diri é ziin ’bɛ zi.

¹³ É kyankpɔwɔlɛ ziɛn sele tablé zé nya, yé é kyankpɔwɔlɛ vɔ a sun ziɛn lé ke a gane ziɛn yɛrama, wo ta.

¹⁴ Kyankpɔwɔlɛnu kɛlɛ tablé lɔlu ma, yé é tablé siyili wɔra wo gi.

¹⁵ É a siyilinu kɛlɛ akasiayili nya, yé é wo ma sɔɔla kyan nya; wo kɛlɛ tablé sifɛ nya.

¹⁶ Tablé ma nyanamapafɛnu lé wa plaan tablé ta, alé planu koo, alé gaannénu koo, alé bééné bɔnu koo, alé palaganeanénu koo, ’té woo saraka bo’yi zén‐é wo gi bɛ, é wo kɛlɛ; é wo kɛlɛ kyan tegele nya.

¹⁷ É fintran kɛlɛ, kyan tegele lé wa gyɛ, a nya; a gane koo, a pun koo, a bɔnu koo, a ma ginninnu koo, a vwinu koo, wo faa kɛlɛ é ke ’léé do.

¹⁸ A blan suiɛdo kɛlɛ a sannu ta, fintran blan yaa kɛlɛ a san do la, yé fintran blan yaa kɛlɛ a san koɛ la.

¹⁹ Bɔ yaa lé ke bélé amandé wɔlɛ zo, wa a blan do ma, é ma ginnin do do valé vwi do do nya; bɔ yaa lé ke bélé amandé wɔlɛ zo, wa a blan fiézan ma, é ma ginnin do do valé vwi do do nya; a blan suiɛdo lé é kɛlɛ fintran ma, a zo duo lé é kɛlɛ wo faa zé nya.

²⁰ Bɔ ziɛn lé ke bélé amandé wɔlɛ zo, é ’bɛ kɛlɛ fintran pun ma, é ma ginnin do do valé vwi do do nya.

²¹ A blan fié lé é bɔra fintran gi, a ma ginnin do a wo wuo, a ma ginnin do a a blan fié koɛ wuo, yé a ma ginnin do a a blan fié pɔné wuo; blan suiɛdo lé wo bɔra fintran pun gi, wa yee ɛ zo.

²² Fintran ma ginninnu valé é blannu a é ke ’léé do; a faa a kyan gyɛle nya, kyan tegele nya.

²³ Alé bɔné sɔrafié koo, a dirifɛnu koo, a yeezéngifɛ koo, é a kɛlɛ kyan tegele nya.

²⁴ Kyan tegele talan do ɛ fintran valé é ma nyanama pafɛnu faa kɛlɛ.

²⁵ Balebanna lé woo lasikɔrɔ no a ta, wa kɛlɛ akasiayili nya; a sangi a mɛtrɛ buu do, yé a ’wuola a mɛtrɛ buu do; a sangi valé a ’wuola faa bɔ ékema do, ’é sun nya, yé a wuo nwale loru a mɛtrɛ do. Bélinu a balebanna sun ziɛn ta, ’té woo valé balebanna sun a é vɔle é ke ’léé do.

²⁶ A ta loru koo, a sannu faa koo, a bélinu koo, é wo ta sɔɔla kyan tegele nya, yé é kyanbale diri a zi.

²⁷ É kyankpɔwɔlɛ fié dɔ a san fiénu ma, kyanbale wuo; é wo dɔ a bɛ fié la, a siyilinu wɔrale wo gi we ma.

²⁸ É a siyilinu kɛlɛ akasiayili nya, yé é wo ma sɔɔla kyan nya.

²⁹ É nyɔnɔ kɛlɛ, nyɔnɔ ’lɛza lé wa zén‐é mi ta, a nya, yé é lasikɔrɔ ginzan tegele kɛlɛ; é a kɛlɛ lasikɔrɔ kɛlɛzan lé lasikɔrɔ kɛlɛbɛ yɛrama.