Fwile 36 - Kazambale lé Sebe Sauunu 1979

Wo sɔkɔn kɛlɛ

¹ Bɛsaléɛl koo, Ooliab koo, blabozannu faa koo, woo lé Gakelebale gi kinile valé ’wuoatawe nɔ wo lɛ wedɔɔle valé we kɛlɛle we ma bɛ, nyanamanu lé wa pa sɔkɔn gi nyanama pale we ma, wa pa, we faa lé Gakelebale a fe, a yɛrama.

² Bɛsaléɛl koo, Ooliab koo, blabozannu faa lé Gakelebale ’wuoatawe paa wo gi koo, munu faa lé é a wo bli gi léé, ’wo yara pa nyanama ’ko pale ta koo, Moizi wo laa.

³ Blannu faa lé Izraɛl lé nénu da wo nya, nyanamanu lé wa pa, sɔkɔn gi nyanama pale we ma, wo we ma, Bɛsaléɛl wo si Moizi va. Bladi faa do do ma woo dan blannu nya Moizi lɛ wolé blibɔmale nya.

⁴ Yé blabozannu faa lé wo ke sɔkɔn gi nyanamanu faa pana, wo faa do do nwa wolé nyanama ’léé,

⁵ yé wo da a fe lɛ Moizi lɛ léé: Nyanamanu lé Gakelebale ko bɔɔ pa a ma, fɛnu lé munu da a nya a pale we ma, é a kiɛre; ko mawe ’ka a faa gi lo.

⁶ Yé Moizi a zana dɔɔ léé, dé é a gɔné nyaoo, dé é a le nyaoo, té mi do kpen da sɔkɔn dɔfɛ nya é dɛrɛ lo. ’Bɛ zo lé wo munu dale blannu nya yi ga.

⁷ Fɛnu lé wa ma’lɛrɛ nyanamanu faa pale we ma, wo lɛ sɔɔ yé a ke vo.

⁸ Blabozannu faa lé wo ke nyanama ’ko pana, wo sɔkɔn kɛlɛ lɛn nénéle sɔ zima vu valé kununu lé a yuɛɛ ke glayivayou valé galunaa valé sɔɔn, wo nya; wo sérubɛn fotonu dɔ a ta pɛɛ gyɛle nya.

⁹ Sɔ do sangi kɛlɛ mɛtrɛ vu ta ziɛn, yé sɔ do ’wuola kɛlɛ mɛtrɛ fié; sɔ faa kinibɛ kɛlɛ do.

¹⁰ Wo sɔ soru béé é ke ’léé; yé wa soru koɛnu béé é ke ’léé é ziin.

¹¹ Wo sɔbɛ koroibole kɛlɛ glayivayou sɔ nya, yé wo wo béé sɔ soru lé wa béé é ke ’léé é vinin, a voélazan san gi; wa kɛlɛ yee duo zo a soru koɛnu voélazan san gi.

¹² Wo sɔbɛ koroibole yɔ fié wɔlɛ vu béé sɔ vininzan ma, yé wo sɔbɛ koroibole yɔ fié wɔlɛ vu béé sɔ koɛzan voélazan san gi; sɔbɛ koroibolenu ’ko, wo kɛlɛ é ke yɛrama.

¹³ Wo kyan nyawɛnnénu kɛlɛ yɔ fié wɔlɛ vu, yé wo sɔ fié vɔ é ke ’léé wo nya. Yé sɔ faa kɛlɛ kɔn do nya.

¹⁴ Wo sɔnu kɛlɛ bolikyɛɛ nya, a buale sɔkɔn ta we ma; wo sɔnu ’ko kɛlɛ vu ta do.

¹⁵ Sɔ do sangi kɛlɛ mɛtrɛ vu ta soru, yé sɔ do ’wuola kɛlɛ mɛtrɛ fié; sɔ vu ta do faa kinibɛ kɛlɛ do.

¹⁶ Wo sɔ soru béé é ke ’léé, yé wo sɔ suiɛdo béé é ke ’léé.

¹⁷ Wo fɛ koroibole yɔ fié wɔlɛ vu dɔ sɔ soru lé wa béé é ke ’léé, a ’léé, yé wo fɛ koroibole yɔ fié wɔlɛ vu dɔ sɔnu lé wa béé é ke ’léé é voéla, a ’léé.

¹⁸ Wo zéné nyawɛnné yɔ fié wɔlɛ vu kɛlɛ, sɔkɔn dɔle é ke ’léé we ma, a faa kɛlɛle do we gi.

¹⁹ Wo sɔkɔn tabuafɛ do kɛlɛ ’blagɔné kɔlɛ lé wa vɔ zéri’yi sɔɔn va, a nya, yé wa tabuafɛ do kɛlɛ dofɛn kɔlɛ nya, a plale a ta loru we ma.

²⁰ Wo yilifee gyɛ sɔkɔn zé nya; wo wo kɛlɛ akasiayili nya, yé wo wo dɔ loru.

²¹ Yilifee do sangi kɛlɛ mɛtrɛ soru, yé a ’wuola kɛlɛ mɛtrɛ buu do bɛlaa do.

²² Yilifee faa gane a fié fié, é dɔle é ke yɛrama; wa kɛlɛ yee duo zo sɔkɔn lé yilifee faa lɛ.

²³ Wo sɔkɔn lé yilifee yɔ do kɛlɛ yirinwana bɛyilazia.

²⁴ Wo ganevɔgi gɔɔlifu yɔ fié pla yilifee yɔ do wuo, yilifee do ganevɔgi gɔɔlifu a fié, a gane fié vɔgifɛ nya.

²⁵ Wo yilifee yɔ do kɛlɛ sɔkɔn san koɛ zé nya, yirinwana bɛbolazia,

²⁶ é valé é ganevɔgi gɔɔlifu yɔ fié nya, ganevɔgi gɔɔlifu fié a yilifee do do wuo.

²⁷ Wo yilifee suiɛdo kɛlɛ sɔkɔn nwunzi zé nya, yirivɔnazia.

²⁸ Wo yilifee fié kɛlɛ sɔkɔn nwunzi sunnu la;

²⁹ wa pa ékema fié, é sia tɛrɛ zia, wa yere é zima é ’wuo ma kpɔwɔlɛ nya; wa kɛlɛ yee duo zo kɔnsun fié zé nya.

³⁰ ’Bɛ zo lé yilifee kɛlɛ sɔraa, wo valé ’wo ganevɔgi gɔɔlifu nya, ganevɔgi gɔɔlifu a vu ta suiɛdo, ganevɔgi gɔɔlifu fié a yilifee do do wuo.

³¹ Wo sɔkɔn sɛedɔmayilinu kɛlɛ akasiayili nya,

³² sɔkɔn san do lé yilifee zé kɛlɛ soru, sɔkɔn nwun zi lé yilifee zé kɛlɛ soru, yirivɔnazia;

³³ wa sɛedɔmayili mélénazan kɛlɛ, é sia a sun do la fɔɔ yé é bɔ a sun koɛ la we gi.

³⁴ Wo yilifeenu ma sɔɔla kyan nya, yé wo wolé kyankpɔwɔlɛnu kɛlɛ a siyilinu wɔrale wo gi we ma, yé wo wo siyilinu ta sɔɔla kyan nya.

³⁵ Wo kɔnmikɛlɛsɔ kɛlɛ lɛnsɔ zima lé wa tan lɛn nénéle nya, ’té a yuɛ ké glayivayou koo, galunaa koo, sɔɔn koo, a nya; wa yuɛ la gɔrɔla yé wo sérubɛn fotonu dɔ a ta pɛɛ gyɛle nya.

³⁶ Wo wɛyili ziɛn kɛlɛ azé nya; wo wo kɛlɛ akasiayili nya yé wo wo ta sɔɔla kyan nya; wolé ’kɔblanénu a kyan nya, yé wo gɔɔlifu sele wo ganevɔgifɛ ziɛn nya.

³⁷ Wo sɔ do kɛlɛ sɔkɔn ’léé zé nya, lɛnsɔ zima lé wa tan lɛn nénéle nya, ’té a yuɛɛ ke glayivayou koo, galunaa koo, sɔɔn koo, a nya; yé wo pɛɛ gyɛ a ta.

³⁸ Wo alé wɛyili soru valé ’wolé ’kɔblanénu kɛlɛ, yé wo wɛyili ’wuonu valé wolé sɔkunfɛnu ta sɔɔla kyan nya; wo ganevɔgifɛ soru a zéné nya.