Fwile 34 - Kazambale lé Sebe Sauunu 1979

Moizi go gɔ nwiin Bale va é ziin

¹ Gakelebale lé Moizi lɛ léé: ’I gɔlɛ fié ma nyaa bélé a vininzannu zo, yé gɔlɛ vininnu lé bé ’wii bɛ, dérenu lé ke é gyɛle wo ta, maa dan yee duo gyɛ lɛ a koɛnu ta.

² ’Ibo ma’lɛrɛ tu kinile ’lɛ, yé bladi tutu i dan Sinai gɔ gié lɛ; i dan dɔ lɛ an ’lɛ gɔ nwiin.

³ Té mi do kpen é gɔ gié i va lo, té wo mi do kpen ye gɔ ma lo; dé é a ’blanu nyaoo, dé é a dirinu nyaoo, té wo lu ble gɔ ’ko sɔnɔ lo.

⁴ Moizi gɔlɛ fié ma nyaa bélé a vininzannu zo; é nwa bladi tutu, yé é Sinai gɔ gié, Gakelebale a fe fɛan zo, a zo, yé é go gɔlɛfén fié nya é lee.

⁵ Gakelebale zun lati méléna, yé é dɔ Moizi sɔnɔ yé Gakelebale ’é tɔ fe.

⁶ Yé Gakelebale gié a ’lɛ yé Gakelebale siaa léé: Gakelebale, Gakelebale, é a mimawe vo Bale valé nyanaizénmila Bale nya; éé we lɛbɛn‐é faa yé a bli é fli, yé zin valé yarapalale a a lee kiɛre.

⁷ Mi sɔ an lɛ fɔɔ a kulu wuru soruzan ma; weple koo, nwale mi ma koo, wenyané koo, dé mi a kɛlɛ, Gakelebale a ma we voo, naa, é ’ka wegyɛzan yé weanwiinlozan nya lo. Éé we lɛdɔa nénu gi wo tinu lé weple ma, yé éé we lɛdɔa wolé nénu é nénu gi, fɔɔ yé é bɔ wo kulu yaazan valé wo kulu ziɛnzan ma.

⁸ Tɔɔn, Moizi bua tɛrɛ va, yé é dia é bli la.

⁹ É léé: Mizan, dé maa i yuɛi bɔ, Mizan ’é tawo ko va ma, naa, munu ’ko a wemaplɛplɛzannu nya; weplenu valé wenyanénu lé ko kɛlɛ, ’i ko ma we vo yé ’i ko si izé nya.

Wo gipawe kɛlɛ é ziin

¹⁰ Gakelebale léé: ’Maa gi pa do ka va ma. We blɛnblɛnnu lé wo ’ka tan a kɛlɛ lɛ tɛrɛ do kpen ta lo, ’té wo ’ka tan a kɛlɛ lɛ bɛn do va lo, maa dan a kɛlɛ lɛ ilé munu yuɛ va; i zimunu faa é dan Gakelebale panyanama ye lɛ, yé wo dan a ye lɛ léé, bii ɛ nya lé maa dan we blɛnblɛnnu ’ko lɛ sɔɔ lɛ.

¹¹ We lé maa i bélidɔ a nya kyɔ, bé kɛlɛ ma. Amoré munu koo, Kanaan munu koo, Éti munu koo, Férézi munu koo, Éévi munu koo, Jébusi munu koo, maa dan wo bin lɛ ka ’lɛ.

¹² Tɛrɛ lé i dan go lɛ ana bɛ, ’i yuɛ pa ibo va léé, té i gi pa do ana munu va lo, dé wo da kɛlɛ i kunsan nya.

¹³ Ka dan wolé balebannanu yara bua lɛ, ka dan wolé yofotonu ’wii lɛ yé ka dan wolé miyilinu yéli lɛ.

¹⁴ Té i dia i bli la bale bɛ do kpen ’lɛ lo; naa, Gakelebale tɔ lé Maabozan, iin, é a maabo Bale nya.

¹⁵ ’I yuɛ pa ibo va, té i gi pa do ana tɛrɛlamunu va lo, dé wa gona ’wolé balenu zuo, bélé bɔrɔdɛ le éé goo gɔnénu zuo fɛan zo, a zo, ’té woo ’wolé balenu baan, dé wo da ka laa yé ka wolé balebanwi ble;

¹⁶ dé ka da wo lunu si ka benu nanu nya, yé wo lunu lé woo goo wolé balenu zuo bélé bɔrɔdɛ le éé goo gɔnénu zuo fɛan zo, a zo, dé wo da ka benu sia ana yé wo go wolé balenu zuo, bɔrɔdɛ le éé goo gɔnénu zuo fɛan zo, a zo.

¹⁷ Té i fɛ do kpen sele yé é kɛlɛ ilé bale nya pelo.

¹⁸ Buru lé lévɛn ’ka a va lo, i dan alé fɛti kɛlɛ lɛ; yi sɔrafié nya, bléyi lé wa dɔ ’sa sola moné nya, a nya; buru lé lévɛn ’ka a va lo, i dan a ble lɛ, maa i bélidɔ fɛan zo, a zo, naa, ’sa sola moné nya lé ka fwi Éjipiti tɛrɛ la.

¹⁹ Négɔné vininzannu faa a anzé nya, dé é a wi blɛn nyaoo, dé é a wi kiéné nyaoo, wolé négɔné vinin faa a anzé nya.

²⁰ I dan sokofale lé né vinin tabo lɛ ’blané nya; dé i ’ka a tabo lɛ lo, i dan a bɔrɔ yéli lɛ. I dan ilé négɔné vininzannu faa tabo lɛ; té i da an ’lɛ i lee koro nya lo.

²¹ I dan nyanama pa lɛ yi suiɛdo yé i dan flin lɛ yi sɔrafiézan nya; dé féipabléyi lé oo, dé fɛgyɛbléyi lé oo, i dan flin lɛ.

²² ’Sa vinin gyɛbléyi va, i dan flɛyinu lé fɛti kɛlɛ lɛ, yé lɛɛnyaabléyi va i dan fɛ sile féi lé fɛti kɛlɛ lɛ.

²³ Lɛɛ do gɔnɔ yaa gɔnénu faa é dan da lɛ Mizan, Gakelebale, Izraɛl lé Bale ’lɛ.

²⁴ Naa, maa dan bɛnnu bin lɛ ka ’lɛ, yé maa dan ilé tɛrɛglɛnu buru so lɛ é zuo; bléyian va lé i go Gakelebale, ilé Bale ’lɛ, lɛɛ do gɔnɔ yaa bɛ, mi do kpen bli ’ka dan bɔ lɛ ilé tɛrɛ ma lo.

²⁵ Buru lé lévɛn ke a va, té i saraka bo a nya, wi lé bé gyɛ an tɔbɔle we gi, a nyɛ nya lo; té wo Taboyi lé fɛti lé sarakawi tadɔ fɔɔ yé tu é kini a ma lo.

²⁶ Ilé féifɛ vinin lé ke é zima, i dan da lɛ a nya Gakelebale, ilé Bale lé kɔn gi. Té i boliné dɔne é bu nyɔyi va lo.

²⁷ Gakelebale lé Moizi lɛ léé: ’I dére ’konu gyɛ; naa, dére ’konu yɛrama lé maa dan an gi pa lɛ do bii valé Izraɛl va.

²⁸ Moizi vo ana bɛ Gakelebale va yi yɔ fié, bladi nyanadi. É ’ka fɛ blɛ lɛ lo, yé é ’ka ’yi mini lɛ lo. Gakelebale gipadérenu gyɛ gɔlɛfénnu ta. We vu lé.

Moizi yara bi

²⁹ Moizi si Sinai gɔ nwiin yé é zun, ’té wenaye gɔlɛfén fié a a lee; bléyian va lé é a gɔ zunna, ’té a yara éé bié alé wefele Gakelebale lɛ we ma, ’té é ’ka a gi dɔɔa lo.

³⁰ Arɔn valé Izraɛl lé nénu faa Moizi nagini, ’té a yara éé bié, yé wo kana biéle ma a sɔnɔ.

³¹ Moizi wo laa; Arɔn valé munu va mi segele faa da a va yé é we fe wo lɛ.

³² ’Bɛ zuo, Izraɛl lé nénu faa bié, yé bélidɔwenu lé é si a nya Gakelebale va Sinai gɔ nwiin, é a fe wo lɛ.

³³ Moizi nyaa wefele nya wo lɛ aan wo, é sɔ zén é yara.

³⁴ Dé Moizi wɔra Gakelebale ’lɛ, wefele a lɛ we gi, éé sɔ sié é yara fɔɔ yé é bɔra; dé é bɔra, we faa lé Bale a fe a lɛ, é a zuo fé Izraɛl lé nénu lɛ.

³⁵ Izraɛl lé nénu éé Moizi yara naginian, yé wa ye léé, a yara éé bié; yé Moizi é sɔ vo é zénle é yara fɔɔ yé é wɔra, wefele Gakelebale lɛ we gi.