Fwile 33 - Kazambale lé Sebe Sauunu 1979

Kazambale we fe Moizi lɛ é yara

¹ Gakelebale lé Moizi lɛ léé: ’I go, bii valé munu lé i si wo nya Éjipiti tɛrɛ la, ’ka si ’ko, yé tɛrɛ lé maa anbo ’nyɔɔn léé, maa dan a nɔ lɛ Abraam koo, Izak koo, Jakɔb koo, wo kulu lɛ, ’ka go ana zia.

² Maa dan lanje do pa lɛ zia ka ’lɛ, yé Kanaan munu koo, Amoré munu koo, Éti munu koo, Férézi munu koo, Éévi munu koo, Jébusi munu koo, maa dan wo bin lɛ.

³ ’I go tɛrɛnyɔnɔzan na zia. Naa, maa ’ka dan go lɛ ka va lo, dé maa da ka guru zana a gi zia, ka a wemaplɛplɛzannu nya, azama.

⁴ Munu dére tɔntɔn ’konu ’ma aan wo, wo bli kyɛ dɔ é baba, yé mi do kpen ’ka é’lɛrɛfɛnu pa lɛ ’é ma yi ’ko nya lo.

⁵ Yé Gakelebale lé Moizi lɛ léé: Bé fe Izraɛl lé nénu lɛ léma: Ka a wemaplɛplɛzannu nya, dé maa go ka va bléyi do kpen nya, maa dan ka guru zana lɛ a gi. Sin, ’ka ka ’lɛrɛfɛnu si ka ta, yé we lé maa dan a kɛlɛ lɛ ka lɛ yé maa dan a ye lɛ.

⁶ Bléyian va lé Izraɛl lé nénu si Orɛb gɔ ma, ’bɛ bléyi va wo ’wo ’lɛrɛfɛnu si ’wo ta.

⁷ Moizi sɔkɔn fwi yé é a dɔ sɔkɔnnu ma baa sɛ; é a laa, zén‐ékevasɔkɔn. Munu faa lé, woo we laan Gakelebale lee, woo goo zén‐ékevasɔkɔn lé ke sɔkɔnnu ma baa sɛ, ana.

⁸ Dé Moizi a gona zén‐ékevasɔkɔn ’léé bléyian va, munu faa éé nwaan; mi faa do do éé dɔa ’ébo lé sɔkɔn ’léé, ’té wo yuɛ a Moizi zuo fɔɔ yé é wɔra sɔkɔn gi.

⁹ Dé Moizi wɔra sɔkɔn gi, lati pɔrɔlɔ éé zunwo yé éé dɔa sɔkɔn ’léé, yé Gakelebale éé we fé Moizi lɛ.

¹⁰ Lati pɔrɔlɔ lé, éé zunwo sɔkɔn ’léé, dé munu faa a ye, woo nwaan yé woo diaan ’wo bli la ’wobo lé sɔkɔn ’léé.

¹¹ Gakelebale éé we fé Moizi lɛ ’é yara, mi éé we fé é béé lɛ fɛan zo, a zo. ’Bɛ zuo Moizi éé dan sɔkɔn dɔna é ziin; naa, a wuozan, mi boroné Nɛn be Jozué, é ’ka sié sɔkɔn gi lo.

¹² Moizi lé Gakelebale lɛ léé: Maa léma: bii lé an lɛ léé, ’an go munu ’ko nya. Yé dé i dan mi kyɛn pa lɛ an vaa? i ’ka a fe lɛ an lɛ lo, dɔlé té bé fe léé, ’é an dɔɔ an tɔ nya, yé ’é an ye mi zin nya ’é yuɛi.

¹³ Sin, dé maa i yuɛi bɔ, ’i giébɛnu gɔɔn an lɛ; ’bɛna lé maa dan i dɔɔ lɛ, yé maa dan kɛlɛ lɛ mi zin nya i yuɛi. ’I gi bɔrɔ léé, bɛn ’ko a ilé munu nya.

¹⁴ Gakelebale léé: Maabozen é dan go lɛ i va, yé maa dan flinle nɔ lɛ i lɛ.

¹⁵ Moizi lé a lɛ léé: Dé biibozen ’ka go an va lo, té i ko si fɛkona lo.

¹⁶ Dé maa valé ilé munu kɛlɛ mi zinnu nya i yuɛioo, dé ko ’ka kɛlɛ lɛ mi zinnu nya i yuɛi looo, dé i ’ka tawoo ko va lo, wo dan a gi dɔɔ lɛ kaa? Ilé tawole ko va lé we ma lé wo dan maa valé ilé munu dɔɔ lɛ tɛrɛlamunu faa méléna.

¹⁷ Gakelebale lé Moizi lɛ léé: I an yuɛi bɔ, yé maa i dɔɔ i tɔ nya, amalé we lé bé laa an lee, maa dan a kɛlɛ lɛ.

¹⁸ Moizi léé: ’Ilé fuasan gɔɔn an lɛ ma.

¹⁹ Gakelebale a zi vɔ léé: Maa dan anlé zin faa gié lɛ i ’lɛ, yé maa dan Gakelebale tɔ fe lɛ i lɛ; dé é sɔ an lɛ léé, maa zin kɛla mian lɛ, a lɛ lé maa zin kɛla, yé dé é sɔ an lɛ léé, an nyanai zén mian ta, a ta lé an nyanai éé zén‐é.

²⁰ Gakelebale léé: I ’ka bɔa an yara yele lɛ lo, naa, mi ’ka bɔa an yele lɛ yé é vo é yuɛma lo.

²¹ Gakelebale léé: Fɛkona a an sɔnɔ; ’i dɔ gɔlɛ ta.

²² Dé anlé fuasan gié, maa dan i dɔ lɛ gɔlɛkoro gi yé maa dan an bɛ bua lɛ i ta fɔɔ yé an gié.

²³ Dé an bɛ si ana bléyian va, i dan an zuozia ye lɛ, naa, wo ’ka an yara yé lo.