Fwile 31 - Kazambale lé Sebe Sauunu 1979

Nyanamapazannu sile

¹ Gakelebale we fe Moizi lɛ yé é léé:

² Uru be Uri, ’bɛ be Bɛsaléɛl, Juda bɛngizan, maa a si a va.

³ Maa a fan Kazambale Léli koo, gi kinile koo, ’wuoatawe koo, wedɔɔle koo, wo nya, nyanama gɔnɔ faa pale we ma.

⁴ We dɛrɛ kɛlɛle koo, kyan valé gɔɔlifu valé zéné gyɛle koo,

⁵ gɔlɛwezannu lé wa gona wo vɔna fɛ gi, guru vɔle wo ta koo, yili nyaale koo, nyanama gɔnɔ faa pale koo, maa wolé gi kini nɔ a lɛ.

⁶ Yé maa Dan bɛngizan Aisamak be Ooliab nɔ a lɛ a bɔlu do nya. Maa blabozannu faa fan ’wuoatawe nya, fɛnu faa lé maa i bélidɔ, wolé a kɛlɛle we ma,

⁷ zén‐ékevasɔkɔn koo, wenayefɛ pagikɛsu koo, a ta nyanai zén mi ta nyanana koo, sɔkɔn gi nyanamapafɛnu faa koo,

⁸ tablé valé é ma nyanamapafɛnu koo, kyan tegele fintran valé é ma nyanamapafɛnu faa koo,

⁹ balebanna lé woo lasikɔrɔ kyɛ blé a ta koo, balebanna lé woo balebanwi kyɛ blé a ta, é valé é ma nyanamapafɛnu faa koo, ’wolikana valé é péli koo,

¹⁰ nyanama pa varɔnu koo, Balebanzan Arɔn lé balelasɔnu koo, sɔnu lé Arɔn benu a zén‐é ’wo ta balebannyanama pale we ma koo,

¹¹ nyɔnɔ lé wa zén‐é mi ta koo, fɛna sauun lé lasikɔrɔ ginzan koo, woo lé. Bélidɔwe faa lé maa a fe, wo dan a kɛlɛ lɛ ’bɛ zo ’kyɛ.

Flinyi lé we

¹² Gakelebale lé Moizi lɛ léma:

¹³ ’Bé fe Izraɛl lé nénu lɛ léé: Té anlé flinyi tawe kɛlɛle é vuru ka ma lo, naa, é a tɔmase nya maa valé ka méléna, maa valé ka kulunu méléna, yé tɔmase ’ko nya lé wo dan a gi dɔɔ lɛ léé, maa a Gakelebale lé, éé ka kɛla sauun, a nya.

¹⁴ Ka dan flinyi kɛlɛ lɛ, naa, é dan kɛlɛ lɛ kalé yi nyané baba nya. Mi lé é flinyi sɔnné sɛrɛ, wo dan ga dɔ lɛ a nwiin; mi lé é nyanama pa ’bɛ yi la, wo dan a si lɛ Izraɛl va.

¹⁵ ’Ka nyanama pa yi suiɛdo; naa, yi sɔrafiézan a flinyi nya, Gakelebale lé yi lé. Mi lé é nyanama pa flinyi nya, wo dan ga dɔ lɛ a nwiin.

¹⁶ Izraɛl lé nénu é dan flinyi kɛlɛ lɛ, wo valé ’wo kulunu nya, gipawe lé a glɛ ’ka lo, a nya.

¹⁷ We ’ko é dan kɛlɛ lɛ tɔmase nya maa valé Izraɛl lé nénu méléna, tɔmase lé éé mɔn‐o lɛɛfaama, a glɛ ’ka lo, a nya; naa, Gakelebale lanu valé tɛrɛ kɛlɛ yi suiɛdo gi, yé a yi sɔrafiézan nya é daan élé nyanama ma yé é flin, azama.

¹⁸ Gakelebale nyaa aan wo wefele nya Moizi lɛ Sinai gɔ nwiin, é wenayefɛ fié nɔ a lɛ, gɔlɛfén nya, ’té Kazambale sɛbɛ gyɛ wo ta ’é bɛnwɔlɛ nya.