Fwile 30 - Kazambale lé Sebe Sauunu 1979

Balebanna lé woo lasikɔrɔ no a ta Zéné ’wolikana

¹ I dan balebanna do kɛlɛ lɛ, lasikɔrɔ kyɛblele we ma; ’bé kɛlɛ akasiayili nya;

² a sangi ’é kɛlɛ mɛtrɛ buu nya do, yé a ’wuola ’é kɛlɛ mɛtrɛ buu nya do; ’é kɛlɛ é sun nya, yé a nwale loru ’é kɛlɛ mɛtrɛ do. ’I bélinu dɔ balebanna ma, ’té wo valé balebanna a é ke ’léé do.

³ I dan kyan tegele ’yi gié lɛ a ma, a ta loru koo, a bɔn ma faa koo, a bélinu koo, woo lé, yé ’i kyanbale diri a zi.

⁴ I dan kyankpɔwɔlɛ fié kɛlɛ lɛ yé i dan wo vɔ lɛ balebanna bɛ fié la, kyanbale wuo; i dan wo vɔ lɛ balebanna bɛ fié la, a siyilinu wɔrale wo gi we ma.

⁵ ’Bé siyilinu kɛlɛ akasiayili nya, yé ’i kyan ’yi gié wo ma.

⁶ I dan balebanna dɔra lɛ, sɔ lé ke wenayefɛ pagikɛsu ’lɛ, a ’lɛ zia, nyanai zén mi la nyanana lé ke wenayefɛ pagikɛsu ta, ’té maa valé bii é dan kee lɛ ana bɛ, a yɛrama.

⁷ Arɔn é dan lasikɔrɔ ginzan kyɛ ble lɛ ’bɛna; é dan a kyɛ ble lɛ bladi do do ma, bléyian va lé éé fintran ma’lɛra, a bléyi va;

⁸ é dan a kyɛ ble lɛ é ziin nyanadi yiri zɔrɔ nya, bléyian va lé éé fintrannu bié, a bléyi va. ’Bɛ zo lé wo dan lasikɔrɔ kyɛ ble lɛ Gakelebale ’lɛ yifaama a glɛ ’ka lo, ka kulunu faa va.

⁹ Lasikɔrɔ bɛ koo, balebanwi lé wa kyɛ blé koo, Bale blan koo, té ka wo nɔ balebanna ’ko ta lo, dé é a saraka bo ’yioo ’yian nya, té ka zén a ta lo.

¹⁰ Lɛɛ do gɔnɔ do Arɔn é dan wenyané ’yibofɛ gié lɛ balebanna bélinu ma; wenyané ’yibofɛ lé wa gyɛ, a nyɛ nya lé é dan wenyané ’yibowe kɛlɛ lɛ lɛɛ do do gi, ka kulunu faa va. É a fɛ ’lɛzan nya é baba Gakelebale yuɛ gi.

¹¹ Gakelebale lé Moizi lɛ léma:

¹² Dé i Izraɛl lé nénu nɔnɔ, wo faa do do é dan ’wobo tabo lɛ Gakelebale lɛ, léé, dé i a wo nɔnɔna té gyɛ é wo gyɛ lo.

¹³ Munu lé i a wo nɔnɔna, fɛ lé wo dan a nɔ lɛ, yee lé ke ’ko: mi do sikla lɛ do, fɛna sauun lé sikla lé ke géragɔɔli yɔ do nya, a yɛrama; sikla lɛ do a gɔɔli lé wa banwo Gakelebale lɛ, a nya.

¹⁴ Mi faa lé i wo nɔnɔ, ’té wo lɛɛ gié yɔ do ta, wo dan a banwo lɛ Gakelebale lɛ.

¹⁵ Ban lé fuablezan a wo Gakelebale lɛ, té é gié sikla lɛ do ta lo, yé ban lé nyanégyɛzan a wo Gakelebale lɛ, té a ke é si a ta lo, wobo tabole we ma.

¹⁶ I dan Izraɛl lé nénu lé tabo gɔɔli si lɛ wo lee, yé wo tabo gɔɔli nya lé i dan zén‐ékevasɔkɔn ma nyanama pa lɛ; yé ’bɛ é dan a sele dɔ lɛ Gakelebale gi léé, Izraɛl lé nénu ’wobo tabo.

¹⁷ Gakelebale lé Moizi lɛ léma:

¹⁸ I dan ’wolikana kɛlɛ lɛ zéné nya, yé bé gane dɔ zéné nya, munu zurule we ma; i dan a dɔra lɛ zén‐ékevasɔkɔn valé balebanna méléna, yé i ’yi zén a gi

¹⁹ yé Arɔn valé é benu é dan ’wo bɛ valé ’wo gane ma zuru lɛ ’bɛna.

²⁰ Dé wa gona zén‐ékevasɔkɔn gi, wo dan zuru lɛ ’yi ’ko nya, té wo ga lo we gi; yé é ziin, dé wo bié balebanna ma, wolé nyanama pale valé Gakelebale banle we ma, ’wo yee duo kɛlɛ.

²¹ ’Wo bɛ valé ’wo ganenu zuru, té wo ga lo we gi. We ’ko a bélidɔwe lé a glɛ ’ka lo, a nya, Arɔn koo, é benu koo, wo kulunu koo, wozé nya.

Nyɔnɔ lé wa zén‐é mi ta Lasikɔrɔ kɛlɛbɛ

²² Gakelebale lé Moizi lɛ léma:

²³ I dan zianbla ginzannu zima si lɛ, miré dɛrɛ sikla wuru fié yɔ soru koo, sinamom ginzan sikla wuru do yɔ fié wɔlɛ vu koo, gyan ginzan sikla wuru do yɔ soru koo,

²⁴ kasé sikla wuru fié yɔ soru koo, woo lé; ’i wo si fɛna sauun lé sikla yɛrama, yé ’i ɔlivi nyɔnɔ si é ziin litré suiɛdo.

²⁵ I dan fɛ ’konu kɛlɛ lɛ nyɔnɔ ’lɛzan lé wa zén‐é mi ta, a nya, lasikɔrɔ nya, lasikɔrɔ kɛlɛzan a kɛla fɛan zo, a zo; é dan kɛlɛ lɛ nyɔnɔ ’lɛzan lé wa zén‐é mi ta, a nya.

²⁶ I dan nyɔnɔ ’ko zén lɛ zén‐ékevasɔkɔn valé wenayefɛ pagikɛsu koo,

²⁷ tablé valé é ma nyanamapafɛnu faa koo, fintran valé é ma nyanamapafɛnu koo, lasikɔrɔ kyɛblena koo,

²⁸ balebanna lé woo balebanwi kyɛ blé a ta, é valé é ma nyanamapafɛnu faa koo, ’wolikana valé é péli koo, wo ta.

²⁹ I dan fɛ ’konu pa lɛ é yɛrama, yé wo ’lɛ é dan dɔ lɛ é baba, yé fɛ faa lé é mane wo ma, a ’lɛ é dan dɔ lɛ.

³⁰ I dan nyɔnɔ zén lɛ Arɔn valé é benu ta, yé i dan bɛ pla lɛ wo ta, yé wo dan balebannyanama pa lɛ an lɛ.

³¹ I dan we fe lɛ Izraɛl lé nénu lɛ léé, anlé nyɔnɔ ’lɛzan lé wa zén‐é mi ta ka kulunu va, yee lé.

³² Té wa zén mi pla ta lo; té ka a zoɛ kɛlɛ lo; té ka lasikɔrɔ kɛlɛfɛnu si anzé ’léé duo yɛrama yé ka lasikɔrɔ kɛlɛ a nya lo; a ’lɛ a, yé é a lé ka ye fɛ ’lɛdɔle nya.

³³ Dé mian é a zoɛ kɛlɛ, dé é a zén bɛn ta, ’wo ’bɛzan si Izraɛlnu va.

³⁴ Gakelebale lé Moizi lɛ léé: ’I zianbla ginzannu si, sakité koo, ɔngla ginzan koo, gaabanu koo, lasikɔrɔpo tegele koo, wo nya; wo faa si’léé ’é kɛlɛ do.

³⁵ ’I fɛ ’konu kɛlɛ lasikɔrɔ nya, lasikɔrɔ kɛlɛzan a kɛla fɛan zo, a zo; ’i wɛ zén a va, bé nɔla é zima, yé ’é kɛlɛ fɛ ’lɛzan plɛplɛ nya.

³⁶ Bé pun dɔ yé bé pla wenayefɛ ’lɛ, zén‐ékevasɔkɔn gi, fɛana lé maa valé bii é dan kee lɛ, ana. É dan kɛlɛ lɛ fɛ ’lɛzan baba nya ka lɛ.

³⁷ Té ka ’bɛ zoɛ lasikɔrɔ kɛlɛ kazé nya lo, té ka lasikɔrɔ kɛlɛfɛnu si anzé ’léé duo zo lo; ka dan a ye lɛ fɛ ’lɛzan baba nya, Gakelebale zé nya.

³⁸ Dé miomian ’bɛ zoɛ lasikɔrɔ kɛlɛ, ’ézé gin sile we ma, ’wo ’bɛzan si Izraɛlnu va.