Fwile 29 - Kazambale lé Sebe Sauunu 1979

Balebanmunu pale é yɛrama

¹ We lé i dan a kɛlɛ lɛ, bɛ plale wo ta we ma yé wo balebannyanama pa an lɛ, yee lé ke ’ko: Dirigɔné boroné valé ’blagɔné fié lé we do kpen ’ka wo ma lo, ’i wo si.

² Buru koo, buru kurukuruné lé wa vɔɔan nyɔnɔ nya koo, buru pɛtoropɛtoroné lé woo nyɔnɔ nwɛɛn‐an wo ma koo, ’i wo kɛlɛ burupun zima nya, ’té lévɛn ’ka wo va lo.

³ I dan wo pa lɛ kyɛɛ gi, yé i dan wo valé dirigɔné boroné valé ’blagɔné fié nɔ lɛ ékeva.

⁴ I dan Arɔn valé é benu bié lɛ zén‐ékevasɔkɔn’léé zia, yé i dan wo zuru lɛ ’yi nya.

⁵ I dan sɔnu si lɛ; varɔ bɛ grɔgrɔ koo, éfɔdi lé varɔ koo, éfɔdi valé golɛgiweblefɛ koo, i dan wo zén lɛ Arɔn ta yé i dan éfɔdi lé bɔn‐in kunsɔ yere lɛ a ma.

⁶ I dan nɔɔn vuru lɛ a ’wuo ma, yé i dan nɔɔn ta kyan sauun dɔ lɛ é ta.

⁷ Nyɔnɔ lé wa zén‐é mi ta, i dan a si lɛ yé i dan a zén lɛ a nwiin.

⁸ I dan a benu bié lɛ yé i dan varɔ bɛ grɔgrɔ zén lɛ wo ta.

⁹ I dan kyɛsidi dɔ lɛ Arɔn valé é benu gyɛn, yé i dan sɔkoro wo lɛ Arɔn benu ’wuo ma. Balebannyanama a wozé nya bélidɔwe lé a glɛ ’ka lo, a yɛrama. ’Bɛ zo lé i dan Arɔn valé é benu bɛ pa lɛ Bale banle ta.

¹⁰ I dan da lɛ dirigɔné nya zén‐ékevasɔkɔn ’lɛ, yé Arɔn valé é benu é dan ’wo bɛnu pla lɛ dirigɔné ’wuo la.

¹¹ I dan dirigɔné bɔrɔ bo lɛ Gakelebale ’lɛ, zén‐ékevasɔkɔn’léé.

¹² I dan dirigɔné nyɛ si lɛ yé i dan i bɛnwɔlɛ wɔra lɛ a va yé i dan a gié lɛ balebanna bélinu ma, yé i dan nyɛ faa zana lɛ balebanna bɔn ma.

¹³ Diri nyɔnɔ faa lé ke a bun‐an ma koo, a bli fee blɛn koo, a kolimayerewɔlɛ fié valé é ma nyɔnɔ koo, i dan wo si lɛ yé i dan wo kyɛ ble lɛ balebanna ta.

¹⁴ Naa, dirigɔné wi koo, a kɔlɛ koo, a bo koo, i dan wo kyɛ ble lɛ sɔkɔn dɔna gini lɔ ma; wenyané ma ban lé.

¹⁵ I dan ’blagɔné do si lɛ, yé Arɔn valé é benu é dan ’wo bɛnu pla lɛ ’blagɔné ’wuo ta.

¹⁶ ’I ’blagɔné bɔrɔ bo; bé nyɛ si, yé bé zén balebanna la fɛfaana.

¹⁷ ’I ’blagɔné wi kini yé bé bun‐annu valé a ganenu zuru, yé ’i wo pla wi kurunu valé a ’wuo ta.

¹⁸ ’I ’blawi faa kyɛ ble balebanna ta; wi lé wa kyɛ blé Gakelebale zé nya, yee lé; saraka lé kyɛ a blé, ’té a gin sɔ Gakelebale lɛ, yee lé.

¹⁹ ’I ’blagɔné koɛzan si, yé Arɔn valé é benu ’wo bɛnu pla ’blagɔné ’wuo ta.

²⁰ ’I ’blagɔné bɔrɔ bo; bé nyɛ si yé bé gié Arɔn bɛyila tɔné bɛné koo, a benu bɛyila tɔné bɛné koo, wo bɛyila bɛnwɔlɛgɔné koo, wo bɛyila ganewɔlɛgɔné koo, wo ma, yé bé nyɛ zén balebanna la fɛfaana.

²¹ Nyɛ lé ke balebanna ta valé nyɔnɔ lé wa zén‐é mi ta, bé si, yé bé nwɛɛn Arɔn valé ’élé sɔnu koo, a benu valé ’wolé sɔnu koo, wo ta. Arɔn valé ’élé sɔnu koo, a benu valé ’wolé sɔnu koo, ’i wo pa é yɛrama ’bɛ ɛ zo.

²² ’Blagɔné nyɔnɔ koo, a woli koo, a bun‐an ma nyɔnɔ koo, a bli fee blɛn koo, a kolimayerewɔlɛ fié valé wo ma nyɔnɔ koo, a bɛyila bɛapaboro koo, ’i wo si, naa, mi bɛ pale Bale banle ta ’blagɔné lé;

²³ kyɛɛ lé wa dɔra Gakelebale ’lɛ, ’té buru lé lévɛn ’ka a va lo, ’té é ke a gi bɛ, buru do koo, buru kurukuruné lé wa vɔɔan nyɔnɔ nya, a do koo, buru pɛtoropɛtoroné do koo, ’i wo si a gi.

²⁴ ’I fɛ ’konu faa pa Arɔn valé é benu lee, yé i wo dia i bɛ fié la Gakelebale ’lɛ.

²⁵ ’Bɛ zuo yé bé si wo lee, yé bé kyɛ ble balebanna ta, wi lé wa kyɛ blé, a ta loru; saraka lé kyɛ a blé Gakelebale ’lɛ, ’té a gin sɔ Gakelebale lɛ, yee lé.

²⁶ ’I Arɔn bɛ pale Bale banle ta ’blagɔné tɔn si, yé bé dia i bɛ fié la Gakelebale ’lɛ; izé bɛ.

²⁷ ’Blagɔné tɔn valé a bɛapaboro lé ke Arɔn valé é benu bɛ pale Bale banle ta fɛ nya, ’i bɛ pla wo ta, ’i a tɔn zé kɛlɛ diale bɛ fié la nya, yé ’i bɛapaboro zé kɛlɛ é nwale valé é tuale nya.

²⁸ Wa Arɔn valé é benu zé nya, bélidɔwe lé a glɛ ’ka lo, a yɛrama; é a lé Izraɛl lé nénu ’é tawo bélidɔwe ’ko ta, naa, nwale valé tuale blan lé; bɔvɔ sarakanu lé Izraɛl lé nénu a boo, wo va saraka lé ke a nwale valé a tuale blan nya, é a Gakelebale zé nya.

²⁹ Arɔn lé balelasɔ é dan kɛlɛ lɛ a benu zé nya a zuo, yé wo dan wo zén lɛ ’wo ta, ’té dé wo nyɔnɔ zén wo nwiin yé wo wo bɛ pa Bale banle ta.

³⁰ Arɔn be lé wo dan dɔ lɛ a pa gi Balebanzan nya, ’té éé wɔraan zén‐ékevasɔkɔn gi balebannyanama pale we ma, wo dan sɔ ’konu zén lɛ a ta yi sɔrafié.

³¹ I dan mi bɛ pale Bale banle ta ’blagɔné si lɛ, yé bé wi dɔne fɛna plɛplɛ do na.

³² ’Blagɔné wi koo, buru lé ke kyɛɛ gi koo, Arɔn valé é benu é dan a ble lɛ, zén‐ékevasɔkɔn ’léé.

³³ Fɛnu lé ke wolé wenyané ’yibofɛ nya, ’té wo wo bɛ pa Bale banle ta yé wo kɛlɛ é zima wo nya bɛ, ’bɛ zo lé ’wo wo ble; fɛ ’lɛzan lé, amalé té bɛn do kpen é wo ble lo.

³⁴ Dé mi bɛ pale Bale banle ta wi pɔné valé buru vo fɔɔ yé bladi pa a ma, i dan a kyɛ ble lɛ; fɛ plɛplɛ lé, amalé té wa ble lo.

³⁵ Wenu faa lé maa i bélidɔ a nya Arɔn valé é benu zé nya, bé kɛlɛ. ’I wo bɛ pale Bale banle ta we ’ko kɛlɛ yi sɔrafié.

³⁶ ’I saraka bo dirigɔné nya yi do do ma, wenyané lé we ma, wenyané ’yibofɛ nya; wenyané ’yibofɛ ’ko ɛ balebanna ’lɛ dɔa, yé i dan nyɔnɔ zén lɛ a ta, a pale é yɛrama we gi.

³⁷ Yi sɔrafié nya i dan wenyané ’yibofɛ nɔ lɛ balebanna ta yé a ’lɛ é dan dɔ lɛ; balebanna ’lɛ é dan dɔ lɛ é baba, yé fɛ faa lé é mane balebanna ma, a ’lɛ é dan dɔ lɛ.

Balebanfɛ lé wa no yi faa do do ma

³⁸ Fɛnu lé i dan wo nɔ lɛ balebanna ta, wo lé ke ’ko: ’blané fié lé wo lɛɛ ke do, ’i vo a nɔna yi do do ma, té a glɛ é dɔ lo.

³⁹ ’I ’blané do nɔ bladi yé i ’blané do nɔ nyanadi yiri zɔrɔ nya.

⁴⁰ ’I burupun zima si suoné nya do, yé bé vɔɔ ɔlivi wɔlɛnu lé wa zɔn, a nyɔnɔ litré do nya, yé i dɔrɔ litré do si saraka bo’yi nya, yé ’i da wo fiénu nya yé ’i ’bɛ valé ’blané vininzan nɔ ékeva.

⁴¹ ’I ’blané fiézan nɔ nyanadi yiri zɔrɔ nya, yé baleblan valé saraka bo’yi lé bé nɔ bladi, ’i yee duo nɔ ’blané fiézan va; saraka lé kyɛ a blé, ’té a gin sɔ Gakelebale lɛ, yee lé.

⁴² Balebanwi lé wa kyɛ blé, ’té a nɔle glɛ ’ka lo, ’té ka kulunu é kulunu é dan a nɔ lɛ zén‐ékevasɔkɔn ’léé, Gakelebale ’lɛ, yee lé ke bɛ; ana lé maa valé ka é dan kee lɛ yé maa dan we fe lɛ ka lɛ.

⁴³ Ana lé maa valé Izraɛl lé nénu é dan kee lɛ, yé an kɛlɛle ana lé we ma lé fɛkona ’lɛ é dan dɔ lɛ.

⁴⁴ Maa dan zén‐ékevasɔkɔn valé balebanna ’lɛ dɔ lɛ, yé maa dan an bɛ pla lɛ Arɔn valé é benu ta, wolé balebannyanama pale an ’lɛ we gi.

⁴⁵ Maa dan nyana lɛ Izraɛl lé nénu va, yé maa dan kɛlɛ lɛ wolé Bale nya.

⁴⁶ Wo dan a gi dɔɔ lɛ léé, maa a Gakelebale nya, wolé Bale lé é wo si Éjipiti tɛrɛ la nyanale wo va we ma, a nya. Maa a Gakelebale, wolé Bale nya.