Fwile 28 - Kazambale lé Sebe Sauunu 1979

Balelasɔnu kɛlɛbɛ

¹ ’I bwe Arɔn valé é benu bié i va, yé ’i wo si Izraɛl lé nénu méléna, yé ’i bɛ pla wo ta wo kɛlɛle balebannyanama pazannu nya an ’lɛ we ma; Arɔn valé é benu Nadab koo, Abiu koo, Éléazaa koo, Itamaa koo, woo lé.

² I dan i bwe Arɔn lé balelasɔnu kini lɛ, a segele gɔɔnle valé a ’lɛrɛle we ma.

³ I dan we fe lɛ blabozannu lé, maa ’wuoatawe paa wo gi, wo lɛ; yé wo dan Arɔn lé sɔ kini lɛ, i bɛ plale a ta we gi yé é balebannyanama pa an lɛ.

⁴ Sɔnu lé wo dan wo kini lɛ, wo lé ke ’ko: golɛgiweblefɛ koo, éfɔdi koo, varɔ grɔgrɔ koo, varɔ bɛ grɔgrɔ lé pɛɛ ke é gyɛle a ta koo, nɔɔn koo, a bɔn‐in kunsɔ koo, woo lé. Wo dan balelasɔnu kini lɛ i bwe Arɔn valé é benu lɛ, wolé balebannyanama pale an lɛ we gi.

⁵ Wo dan wo kɛlɛ lɛ kyan koo, sɔnu lé wo yuɛɛ ke glayivayou vale galunaa valé sɔɔn nya, wo koo, lɛnsɔ zima koo, wo nya.

⁶ Wo dan éfɔdi kɛlɛ lɛ kyan koo, lɛnsɔ zima lé wa tan lɛn nénéle nya, ’té a yuɛɛ ke glayivayou valé galunaa valé sɔɔn koo, a nya; wo dan a yuɛ la gɔrɔla lɛ.

⁷ Wo dan a gɔ fié dɔ lɛ a bɛapanu ta, yé ’bɛ é dan éfɔdi kun lɛ é lɔlu fiénu ma; ’bɛ zo lé é dan a kun lɛ.

⁸ Wo dan a bɔn‐in kunsɔ kɛlɛ lɛ éfɔdi kɛlɛbɛ gi, yé wa pa éfɔdi ta; é dan kɛlɛ lɛ kyan koo, glayivayou kununu valé galunaa kununu valé kununu sɔɔn koo, lɛn nénéle sɔ zima koo, wo nya.

⁹ I dan ɔnisigɔlɛ fié si lɛ, yé i dan Izraɛl benu tɔ guru vɔ lɛ wo ta,

¹⁰ tɔ suiɛdo a gɔlɛ do ta yé tɔ suiɛdo a gɔlɛ koɛ ta, wo yaale yɛrama.

¹¹ I dan Izraɛl benu tɔnu guru vɔ lɛ gɔlɛfee fié ta, woo guru vɔa gɔlɛnu valé bɛmazéné ta fɛan zo, a zo; i dan kyan vɔ lɛ wo zi.

¹² I dan gɔlɛfee fié pa lɛ éfɔdi bɛapa gɔ fié ta, Izraɛl benu seledɔmigifɛ nya, yé a sele ’é dɔ mi gi léé, Arɔn éé goo wo tɔ nya Gakelebale ’lɛ, é bɛapa fié ta.

¹³ I dan wo vɔgikyan kɛlɛ lɛ,

¹⁴ yé i dan gɔgɔbale kénéné fié kɛlɛ lɛ kyan tegele nya, yé i dan wo tan lɛ bale nya, yé gɔgɔbale kénénénu lé bé tan bɛ, i dan a vɔ lɛ wo vɔgikyan ma.

¹⁵ I dan golɛgiweblefɛ kɛlɛ lɛ, é ta gɔrɔlale nya; i dan a kɛlɛ lɛ éfɔdi kɛlɛbɛ gi, i dan a kɛlɛ lɛ kyan koo, glayivayou kununu valé galunaa kununu valé kununu sɔɔn koo, lɛn nénéle sɔ zima koo, wo nya.

¹⁶ É dan kɛlɛ lɛ é sun nya, é boro nya é pale; a sangi é dan kɛlɛ lɛ bɛlaa do yé a ’wuola é dan kɛlɛ lɛ bɛlaa do.

¹⁷ I dan a ’lɛrɛ lɛ gɔlɛwezannu nya, é bale ziɛn nya; a bale vininzan a saadɔanegɔlɛ koo, topazegɔlɛ koo, émérodegɔlɛ koo, wo nya;

¹⁸ a bale fiézan a ɛsikabuklegɔlɛ koo, safiigɔlɛ koo, diamangɔlɛ koo, wo nya;

¹⁹ a bale yaazan a opalgɔlɛ koo, agategɔlɛ koo, amétisegɔlɛ koo, wo nya.

²⁰ A bale ziɛnzan a krisolitegɔlɛ koo, ɔnisigɔlɛ koo, jasipegɔlɛ koo, wo nya. I dan gɔlɛ ’konu vɔ lɛ ’wo vɔgikyan gi.

²¹ Wo dan kɛlɛ lɛ vu ta fié, Izraɛl benu tɔnu yɛrama; i dan wo ta guru vɔ lɛ bélé bɛmazéné zo, bɛn vu ta fié tɔ a wo ta do do ’é guru vɔle nya.

²² I dan gɔgɔbale kénénénu kɛlɛ lɛ kyan tegele nya, yé i dan wo tan lɛ bale nya, golɛgiweblefɛ zé nya.

²³ I dan kyankpɔwɔlɛné fié kɛlɛ lɛ golɛgiweblefɛ zé nya, yé i dan kpɔwɔlɛné fié ’ko vɔ lɛ golɛgiweblefɛ san fié ta.

²⁴ I dan kyanbale fié vɔ lɛ kpɔwɔlɛné fié gi golɛgiweblefɛ san fié ta;

²⁵ yé i dan kyanbale fié zɔ polu dɔ lɛ wo vɔgifɛ fié lé, bé pla éfɔdi bɛapa gɔ fié ta, wo ma.

²⁶ I dan kyankpɔwɔlɛné fié kɛlɛ lɛ é ziin, yé i dan wo vɔ lɛ golɛgiweblefɛ wuozan lé ke éfɔdi ma zia, a sun fié ma.

²⁷ Yé i dan kyankpɔwɔlɛné fié kɛlɛ lɛ é ziin, yé i dan wo vɔ lɛ éfɔdi lé bɛapa gɔ fié wuo, a ’lɛ zia, fɛ vɔle é ke ’lééna sɔnɔ, éfɔdi lé bɔn‐in kunsɔ ta loru.

²⁸ I dan glayivayou bale polu dɔ lɛ golɛgiweblefɛ lé kpɔwɔlɛnu valé éfɔdi lé kpɔwɔlɛnu ma, golɛgiweblefɛ kɛlɛle éfɔdi lé bɔn‐in kunsɔ ta loru we ma, yé é ’ka sié éfɔdi ta lo.

²⁹ Dé Arɔn wɔra fɛna sauun na, ’té éé goo Izraɛl benu tɔnu nya é bli ta, ’té wo guru a é vɔle a golɛgiweblefɛ ta, yé wo kɛlɛ wo sele?-?dɔfɛ nya lɛɛfaama Gakelebale gi.

³⁰ I dan urim valé tumim pa lɛ golɛgiweblefɛ ma, yé dé Arɔn go Gakelebale ’lɛ, ’té wa a bli ta. ’Bɛ zo lé, dé Arɔn go Gakelebale ’lɛ, ’té éé goo Izraɛl lé nénu lé weblele nya é bli ta yifaama.

³¹ I dan éfɔdi lé varɔ kini lɛ glayivayou sɔ tegele nya.

³² I dan a ’léé pa lɛ a méléna, a ’wuo wɔrale a gi we ma; yé i dan sɔbɛ tanle béé lɛ a lɔlu ’léé, bélé gulidanvarɔ ’léé zo, té varɔ é fia lo we gi.

³³ Grénadéyili poro foto lé wo yuɛɛ ke glayivayou valé galunaa valé sɔɔn, i dan wo dɔ lɛ varɔ ’léé, ’té i wo vɔɔan kyanpannénu nya;

³⁴ kyanpanné do, grénadéyili poro do, kyanpanné do, grénadéyili poro do, bé diri varɔ lɔlu faa zi.

³⁵ Dé Arɔn go élé nyanama pa lɛ, é dan varɔ ’ko zén lɛ ’é ta, munu lé kyanpannénu vun ’male we ma; dé é wɔra fɛna sauun na Gakelebale ’lɛ, dé é bɔra ana, ’té wa gi maan; ’bɛ zo lé, Arɔn ’ka gaan lo.

³⁶ I dan kyan tegele gyɛ lɛ lɛlɛné, yé i dan a ta guru vɔ lɛ bélé bɛmazéné ta guru vɔle zo, léé, Gakelebale sauun zé lé.

³⁷ I dan a yere lɛ glayivayou bale nya nɔɔn ma, é ’lɛ zia.

³⁸ É dan kɛlɛ lɛ Arɔn yarapɛla; yé wenyanénu lé Izraɛl lé nénu a kɛlɛ, Arɔn é dan wo faa kɔné si lɛ, wolé saraka sauunnu faa bole nya; kyan lɛlɛné é dan kɛlɛ lɛ a yarapɛla Gakelebale ’lɛ, alé wolé we nyi sile we ma.

³⁹ I dan varɔ bɛ grɔgrɔ kɛlɛ lɛ lɛnsɔ zima nya; i dan nɔɔn kɛlɛ lɛ lɛnsɔ zima nya, yé i dan bɔn‐in kunsɔ kɛlɛ lɛ, ’té pɛɛ a a ta é gyɛle.

⁴⁰ Varɔ bɛ grɔgrɔnu koo, bɔn‐in kunsɔnu koo, sɔ koronu koo, i dan wo kɛlɛ lɛ Arɔn benu zé nya, wo segele gɔɔnle valé wo ’lɛrɛle we ma.

⁴¹ I dan wo zen lɛ i bwe Arɔn valé é benu ta. I dan nyɔnɔ zén lɛ wo nwiin, i dan bɛ pla lɛ wo ta, i dan wo pa lɛ é yɛrama Bale zé nya, yé wo dan kɛlɛ lɛ balebannyanama pazannu nya an lɛ.

⁴² I dan wolé kyɛkoto kini lɛ lɛnsɔ nya, té wo vo é porole lo we gi; é sia wo gyɛn fɔɔ yé é bɔ wo boro yuɛ la.

⁴³ Dé Arɔn valé é benu wɔra zén‐ékevasɔkɔn gioo, dé wo bié balebanna ma wolé nyanama pale we gi fɛna sauun naoo, wo dan wo zén lɛ ’wo ta; ’bɛ zo lé we ’ka é dɔle wo nwiin lo, yé wo ’ka gaan lo. We ’ko a bélidɔwe lé a glɛ ’ka lo, a nya, Arɔn valé é kulunu lé wo dan kɛlɛ lɛ a zuo, wozé nya.