Fwile 27 - Kazambale lé Sebe Sauunu 1979

Balebanna valé gɔrɔ kɛlɛbɛ

¹ I dan balebanna kɛlɛ lɛ akasiayili nya; a sangi é dan kɛlɛ lɛ mɛtrɛ fié é buu, yé a ’wuola é dan kɛlɛ lɛ mɛtrɛ fié é buu. Balebanna sangi valé é ’wuola faa é dan bɔ lɛ ékema do yé a nwale loru é dan kɛlɛ lɛ mɛtrɛ do é buu.

² I dan bélinu dɔ lɛ balebanna sun ziɛn ta, ’té wo valé balebanna sun a é vɔle é ke’léé do; yé i dan a ta sɔɔla lɛ zéné nya.

³ Kyɛyeezéngifɛnu koo, diadianu koo, kananu koo, wi ble gaannénu koo, kyɛnyɛsifɛnu koo, i dan wo kɛlɛ lɛ balebanna zé nya. I dan a ma nyanamapafɛnu faa kɛlɛ lɛ zéné nya.

⁴ I dan zénékɔrané kɛlɛ lɛ nyannyanné zo balebanna zé nya, yé i dan zéné kpɔwɔlɛ ziɛn dɔ lɛ nyannyanné sun ziɛn ta.

⁵ I dan a pla lɛ balebanna lɔlu wuo, é sia tɛrɛ zia fɔɔ yé é bɔ balebanna méléna yɛrama.

⁶ I dan balebanna siyilinu kɛlɛ lɛ akasiayili nya, yé i dan wo ta sɔɔla lɛ zéné nya.

⁷ I dan a siyilinu wɔra lɛ kpɔwɔlɛnu gi; yé bléyian va lé wa sina, a siyilinu ’é kɛlɛ balebanna san fiénu ta.

⁸ I dan a kɛlɛ lɛ é koro nya, yilifeenu nya; fɛan zo lé maa a nagɔɔn i lɛ gɔ nwiin, i dan a kɛlɛ lɛ a yɛrama.

⁹ I dan gɔrɔ kɛlɛ lɛ sɔkɔn zi. Yirinwana bɛyilazia, i dan gɔrɔ kɛlɛ lɛ lɛn nénéle sɔ zima nya; a sangi vininzan ’ko é dan kɛlɛ lɛ mɛtrɛ yɔ fié wɔlɛ vu,

¹⁰ yé a méléna yili ’é kɛlɛ yɔ do, é valé é suruégizéné yɔ do nya; i dan a mélénayili ma ’kɔblanénu valé sɔkunfɛnu kɛlɛ lɛ gɔɔlifu nya.

¹¹ Yirinwana bɛbolazia zé sɔ grɔgrɔ é dan kɛlɛ lɛ mɛtrɛ yɔ fié wɔlɛ vu nya é ziin, yé a mélénayili ’é kɛlɛ yɔ do, é valé é suruégizéné yɔ do nya; i dan a mélénayili ma ’kɔblanénu valé sɔkunfɛnu kɛlɛ lɛ gɔɔlifu nya.

¹² Yirivɔnazia, gɔrɔ ’wuola sɔ grɔgrɔ é dan kɛlɛ lɛ mɛtrɛ yɔ do wɔlɛ soru, yé a mélénayili ’é kɛlɛ vu, é valé é suruégizéné vu nya.

¹³ Yirinwanazia, gɔrɔ ’wuola a mɛtrɛ yɔ do wɔlɛ soru;

¹⁴ ’bɛna bɛ do la sɔ grɔgrɔ é dan kɛlɛ lɛ mɛtrɛ sɔrafié é buu nya, yé ’bɛ mélénayili ’é kɛlɛ yaa, é valé é suruégizéné yaa nya,

¹⁵ yé a bɛ koɛ la sɔ grɔgrɔ é dan kɛlɛ lɛ mɛtrɛ sɔrafié é buu nya, yé ’bɛ mélénayili ’é kɛlɛ yaa, é valé é suruégizéné yaa nya.

¹⁶ Gɔrɔ lɛtansɔ é dan kɛlɛ lɛ mɛtrɛ vu nya, lɛnsɔ zima lé wa tan lɛn nénéle nya, ’té a yuɛɛ ke glayivayou valé galunaa valé sɔɔn nya, ’té pɛɛ a é gyɛle a ta, yé a mélénayili ’é kɛlɛ ziɛn, é valé é suruégizéné ziɛn nya.

¹⁷ Sɔkun gɔɔlifunu koo, gɔɔlifu ’kɔblanénu koo, a suruégizénénu koo, wo dan kɛlɛ lɛ gɔrɔ mélénayili faa ma do do.

¹⁸ Gɔrɔ sangi é dan kɛlɛ lɛ mɛtrɛ yɔ fié wɔlɛ vu, yé a ’wuola é dan kɛlɛ lɛ mɛtrɛ yɔ do wɔlɛ soru a bɛ fiénu la, yé a nwale loru é dan kɛlɛ lɛ mɛtrɛ fié é buu; a sɔnu é dan kɛlɛ lɛ lɛn nénéle sɔ zima nya, yé wo suruégifɛnu é dan kɛlɛ lɛ zéné nya.

¹⁹ Sɔkɔn ma nyanamapafɛnu koo, a kunfɛnu faa koo, gɔrɔ kunfɛnu faa koo, i dan wo kɛlɛ lɛ zéné nya.

²⁰ Bé fe Izraɛl lé nénu lɛ léé, ’wo da fintran zé nyɔnɔ nya i lɛ, ɔlivi wɔlɛ lé wa zɔn, a nyɔnɔ bozen nya, fintran bile yifaama we gi;

²¹ Arɔn valé é benu é dan a ma’lɛrɛ lɛ zén‐ékevasɔkɔn gi, sɔ lé ke wenayefɛ ’lɛ é dɔle, a ’lɛ zia, fintrannu bile we gi Gakelebale yara, nyanadi fɔɔ yé bladi é pa. É a bélidɔwe lé a glɛ ’ka lo, a nya, Izraɛl lé nénu kulunu é kulunu zé nya, yé é a lé wa lɛdɔma yifaama.