Fwile 26 - Kazambale lé Sebe Sauunu 1979

Sɔkɔn bozen dɔbɛ

¹ I dan sɔkɔn kɛlɛ lɛ lɛnsɔ vu nya; lɛnsɔ zima lé wa tan lɛn nénéle nya, ’té a yuɛɛ ke glayivayou valé galunaa valé sɔɔn nya; i dan sérubɛnnu foto dɔ lɛ a ta pɛɛ gyɛle nya.

² Sɔ do sangi é dan kɛlɛ lɛ mɛtrɛ vu ta ziɛn, yé a ’wuola é dan kɛlɛ lɛ mɛtrɛ fié; sɔ faa kinibɛ é dan kɛlɛ lɛ do.

³ Wo dan sɔ soru béé lɛ é ke ’léé; yé wa soru koɛnu béé é ke ’léé é ziin.

⁴ I dan sɔbɛ koroi bo lɛ glayivayou sɔ nya, yé i dan wo béé lɛ sɔ soru lé bé béé é ke ’léé é vinin, a voélazan gane la; yé i dan a kɛlɛ lɛ yee ɛ zo a soru koɛnu é voélazan gane la.

⁵ I dan sɔbɛ koroibole yɔ fié wɔlɛ vu béé lɛ sɔ vininzan ma, yé i dan sɔbɛ koroibole yɔ fié wɔlɛ vu béé lɛ sɔ fiézan gane la; sɔbɛ koroibolenu ’ko, ’wo kɛlɛ é ke yɛrama.

⁶ I dan kyan nyawɛnnénu kɛlɛ lɛ yɔ fié wɔlɛ vu, yé ’i sɔ fié vɔ é ke ’léé wo nya. Yé sɔ faa é dan kɛlɛ lɛ kɔn do nya.

⁷ I dan sɔnu kɛlɛ lɛ bolikyɛɛ nya, a buale sɔkɔn ta we ma; i dan sɔ ’konu kɛlɛ lɛ vu ta do.

⁸ Sɔ do sangi é dan kɛlɛ lɛ mɛtrɛ vu ta soru, yé a ’wuola é dan kɛlɛ lɛ mɛtrɛ fié; sɔ vu ta do faa kinibɛ é dan kɛlɛ lɛ do.

⁹ I dan sɔ soru béé lɛ é ke ’léé, yé i dan sɔ suiɛdo béé lɛ é ke ’léé, yé i dan sɔ suiɛdozan po yéli lɛ sɔkɔn yara.

¹⁰ I dan fɛ koroibole yɔ fié wɔlɛ vu dɔ lɛ sɔ soru lé, bé béé é ke ’léé é vinin, a voélazan san gi, yé i dan fɛ koroibole yɔ fié wɔlɛ vu dɔ lɛ sɔnu lé bé béé é ke ’léé é voéla, a san gi.

¹¹ I dan zéné nyawɛnné yɔ fié wɔlɛ vu kɛlɛ lɛ, yé ’i nyawɛnnénu vɔ fɛ koroibolenu gi. ’Bɛ zo lé i dan sɔ faa kɛlɛ lɛ kɔn do nya.

¹² Sɔ blɛn é mini kɔn ta fɛan zo, a sɔ do buu é dan zana lɛ kɔn zuo zia mɛtrɛ do;

¹³ sɔ é dan zana lɛ sɔkɔn sannu la, mɛtrɛ buu do do, sɔkɔn ta buale we ma.

¹⁴ I dan sɔkɔn tabuafɛ do kɛlɛ lɛ ’blagɔné kɔlɛ lé wa vɔ zéri’yi sɔɔn va, a nya, yé i dan a tabuafɛ do kɛlɛ lɛ ’bɛ ta loru dofɛn kɔlɛ nya.

¹⁵ I dan yilifee gyɛ lɛ sɔkɔn zé nya; i dan wo kɛlɛ lɛ akasiayili nya, yé i wo dɔ loru.

¹⁶ Yilifee do sangi é dan kɛlɛ lɛ mɛtrɛ soru, yé a ’wuola é dan kɛlɛ lɛ mɛtrɛ buu do bɛlaa do.

¹⁷ I dan a gane fié dɔ lɛ ’wo ke yɛrama; i dan a kɛlɛ lɛ yee duo zo sɔkɔn lé yilifee faa lɛ.

¹⁸ I dan sɔkɔn lé yilifee yɔ do kɛlɛ lɛ yirinwana bɛyila zia.

¹⁹ I dan a ganevɔgi gɔɔlifu yɔ fié pla lɛ yilifee yɔ do wuo, yilifee do ganevɔgi gɔɔlifu a fié, a gane fié vɔgifɛ nya.

²⁰ I dan yilifee yɔ do kɛlɛ lɛ sɔkɔn san koɛ zé nya, yirinwana bɛbolazia,

²¹ é valé é ganevɔgi gɔɔlifu yɔ fié nya, ganevɔgi gɔɔlifu fié a yilifee do wuo.

²² I dan yilifee suiɛdo kɛlɛ lɛ sɔkɔn nwun zi zé nya, yirivɔnazia.

²³ I dan yilifee fié kɛlɛ lɛ sɔkɔn nwun zi sunnu la;

²⁴ bé pa ékema fié, é sia tɛrɛ zia, bé yere é zima é ’wuo ma kpɔwɔlɛ nya; é dan kɛlɛ lɛ yee duo zo wo fié zé nya, yé i wo dɔ a sun fié ta.

²⁵ ’Bɛ zo lé alé yilifee é dan kɛlɛ lɛ sɔraa, wo valé wo ganevɔgi gɔɔlifu nya, a ganevɔgi gɔɔlifu a vu ta suiɛdo, a ganevɔgi gɔɔlifu fié a yilifee do do wuo.

²⁶ I dan sɔkɔn sɛedɔmayilinu kɛlɛ lɛ akasiayili nya, sɔkɔn san do lé yilifee zé é dan kɛlɛ lɛ soru,

²⁷ sɔkɔn san koɛ lé yilifee zé é dan kɛlɛ lɛ soru, sɔkɔn nwun zi lé yilifee zé é dan kɛlɛ lɛ soru, yirivɔnazia.

²⁸ A sɛedɔmayili mélénazan ’é sia a sun do la fɔɔ yé é bɔ a sun koɛ la.

²⁹ I dan yilifeenu ma sɔɔla lɛ kyan nya; yé i dan kyankpɔwɔlɛ kɛlɛ lɛ a sɛedɔmayilinu wɔragifɛnu nya, yé i dan a sɛedɔmayilinu ma sɔɔla lɛ kyan nya.

³⁰ I dan sɔkɔn nwa lɛ a kɛlɛbɛ lé maa gɔɔn i lɛ gɔ nwiin, a yɛrama.

³¹ I dan sɔ do kɛlɛ lɛ lɛnsɔ zima lé wa tan lɛn nénéle nya, ’té a yuɛɛ ke glayivayou valé galunaa valé sɔɔn nya; a yuɛ la ’é kɛlɛ é gɔrɔlale yé wo dan sérubɛnnu foto dɔ lɛ a ta pɛɛ gyɛle nya.

³² I dan a dun lɛ wɛyili ziɛn lé, wo wo kɛlɛ akasiayili nya, ’té wo kyan gié wo ma, wo ’wuo ’léé; kyan’kɔblanénu é dan kɛlɛ lɛ wɛyilinu ma, yé wɛyilinu é dan dɔ lɛ ganevɔgi gɔɔlifu ziɛn gi.

³³ I dan sɔ vɔ lɛ nyawɛnnénu ’léé, yé i dan wenayefɛ pagikɛsu dɔra lɛ ’bɛna, sɔ zi; sɔ é dan fɛna sauun valé fɛna sauun tinle gi bɔi lɛ.

³⁴ I dan nyanai zén mi la nyanana dɔra lɛ wenayefɛ pagikɛsu ta, fɛna sauun tinle na.

³⁵ I dan tablé dɔra lɛ sɔ ’lɛzia, yé i dan fintran dɔra lɛ tablé yara sɔkɔn lé yirinwana bɛyilazia; yé i dan tablé dɔra lɛ yirinwana bɛbolazia.

³⁶ I dan sɔ do kɛlɛ lɛ sɔkɔn’léé zé nya, lɛnsɔ zima lé wa tan lɛn nénéle nya, ’té a yuɛɛ ke glayivayou valé galunaa valé sɔɔn nya; wo dan pɛɛ gyɛ lɛ a ta.

³⁷ I dan wɛyili soru kɛlɛ lɛ akasiayili nya, sɔkunfɛnu nya, yé i dan wo ma sɔɔla lɛ kyan nya; kyan’kɔblané é dan kɛlɛ lɛ wo ma, yé i dan zéné sele lɛ wo gane soru vɔna nya.