Fwile 25 - Kazambale lé Sebe Sauunu 1979

Sɔkɔn dɔle lé we

¹ Gakelebale we fe Moizi lɛ ye é léma:

² Bé fe Izraɛl lé nénu lɛ léé, ’wo da an blan nya ma; bé si anzé nya mi faa lé wa nɔ bli zin nya, wo lee.

³ Fɛ lé i dan a si lɛ wo lee an blan nya, yee lé ke ’ko: kyan koo, gɔɔlifu koo, zéné koo,

⁴ glayivayou sɔnu valé galunaa sɔnu valé sɔ sɔɔnnu koo, lɛnsɔ zimanu koo, bolikyɛɛsɔnu koo,

⁵ ’blagɔné kɔlɛ lé wa tana zéri ’yi sɔɔn nya, ’bɛ valé dofɛn kɔlɛnu koo, akasiayilinu koo,

⁶ fintran nyɔnɔ koo, nyɔnɔ lé wa zén‐é mi ta, é valé zianbla ginzannu lé woo lasikɔrɔ kɛla wo nya koo,

⁷ ɔnisigɔlɛ valé gɔlɛwezan bɛnu lé woo éfɔdi valé golɛtafɛ ’lɛra wo nya, wo koo, woo lé.

⁸ Wo dan anlé kɔn dɔ lɛ yé maa dan nyana lɛ wo méléna.

⁹ Sɔkɔn koo, a gifɛnu koo, ka dan wo kɛlɛ lɛ a kɛlɛbɛ lé maa dan a gɔɔn lɛ i lɛ, a yɛrama.

Kyankɛsu — tablé — fintran

¹⁰ Wo dan kyankɛsu kɛlɛ lɛ akasiayili nya; a sangi é dan kɛlɛ lɛ mɛtrɛ do bɛlaa do, a ’wuola é dan kɛlɛ lɛ mɛtrɛ buu do bɛlaa do, a nwale loru é dan kɛlɛ lɛ mɛtrɛ buu do bɛlaa do.

¹¹ I dan kyan tegele ’yi gié lɛ a gi valé a lala, yé i dan kyanbale diri lɛ a lɔlu zi.

¹² I dan kyankpɔwɔlɛ ziɛn sele lɛ yé i dan wo vɔ lɛ a sun ziɛn ta, a fié a bɛ do la yé a fié a bɛ do la.

¹³ I dan a siyilinu kɛlɛ lɛ akasiayili nya yé i dan kyan ’yi gié lɛ wo ma.

¹⁴ I dan a siyilinu wɔra lɛ kpɔwɔlɛnu gi, kɛsu bɛ fié ta, kyankɛsu sile we ma.

¹⁵ A siyilinu é dan vo lɛ kyankɛsu ma kpɔwɔlɛnu gi, wo ’ka dan wo si lɛ a gi lo.

¹⁶ Wenayefɛ lé maa dan a nɔ lɛ i lɛ, i dan a pa lɛ kyankɛsu gi.

¹⁷ I dan nyanai zén mi la nyanana kɛlɛ lɛ kyan tegele nya; a sangi é dan kɛlɛ lɛ mɛtrɛ do bɛlaa do, a ’wuola é dan kɛlɛ lɛ mɛtrɛ buu do bɛlaa do.

¹⁸ I dan sérubɛn foto fié kɛlɛ lɛ kyan nya, nyanai zén mi la nyanana ’wuo fiénu ta; i dan wo kɛlɛ lɛ kyan lé wa gyɛ, a nya.

¹⁹ ’I sérubɛn do kɛlɛ a ’wuo do la yé ’i sérubɛn do kɛlɛ a ’wuo koɛ ta; sérubɛnnu koo, nyanai zén mi la nyanana koo, bé faa foli é ke ’léé do.

²⁰ Sérubɛnnu é dan wo bɛa soi lɛ a ta loru yé wo nyanai zén mi la nyanana ta bua a nya, ’té wa wo ke yara ma; sérubɛnnu é dan wo yara dɔ lɛ nyanai zén mi la nyanana ta.

²¹ I dan nyanai zén mi la nyanana dɔra lɛ kyankɛsu ta loru, yé wenaye fɛ lé maa dan a nɔ lɛ i lɛ, i dan a pa lɛ kyankɛsu gi.

²² ’Bɛna lé ko dan kee lɛ i nya; maa dan anlé bélidɔwenu faa nɔ lɛ i lɛ Izraɛl lé nénu zé nya, nyanai zé mi la nyanana ta loru, sérubɛnnu lé i wo dɔ wenayefɛ pagikɛsu ta, wo méléna.

²³ I dan tablé do kɛlɛ lɛ akasiayili nya; a sangi é dan kɛlɛ lɛ mɛtrɛ do, a ’wuola é dan kɛlɛ lɛ mɛtrɛ buu nya, yé a wuo vɔle é dan kɛlɛ lɛ mɛtrɛ buu do bɛlaa do.

²⁴ I dan kyan tegele ’yi gié lɛ a ma yé i dan kyanbale diri lɛ a lɔlu zi.

²⁵ I dan tablé lɔlu dɔ lɛ é ta loru, bɛnwɔlɛ ziɛn pale ékema zo, yé i dan kyanbale diri lɛ é ziin ’bɛ zi.

²⁶ I dan kyankpɔwɔlɛ ziɛn kɛlɛ lɛ tablé zé nya, yé i dan kyankpɔwɔlɛ vɔ lɛ a sun ziɛn lé ke a gane ziɛn yɛrama, wo ta.

²⁷ Kyankpɔwɔlɛ é dan kɛlɛ lɛ tablé lɔlu ma, yé wo dan tablé siyilinu wɔra lɛ wo gi.

²⁸ I dan a siyilinu kɛlɛ lɛ akasiayili nya, yé i dan kyan gié lɛ wo ma; wo dan kɛlɛ lɛ tablé sifɛ nya.

²⁹ Alé planu koo, alé gaannénu koo, alé bééné bɔnu koo, alé palaganeanénu koo, ’i wo kɛlɛ saraka bo’yi we ma; i dan wo kɛlɛ lɛ kyan tegele nya.

³⁰ I dan an ’lɛburu dɔra lɛ tablé ta yifaama an ’lɛ.

³¹ I dan fintran kɛlɛ lɛ kyan tegele nya. ’I dan fintran ’ko kɛlɛ lɛ kyan gyɛle nya; a gane koo, a pun koo, a bɔnu koo, a ma gininu koo, a vwinu koo, wo faa ’é kɛlɛ é ke ’léé do.

³² A blan suiɛdo ’é kɛlɛ a sannu ta, fintran blan yaa ’é kɛlɛ a bɛ do la, yé fintran blan yaa ’é kɛlɛ a san koɛ la.

³³ Bɔ yaa lé ke bélé amandé wɔlɛ zo, é dan kɛlɛ lɛ a blan do ma, é ma gini do do valé vwi do do nya, bɔ yaa lé ke bélé amandé wɔlɛ zo é dan kɛlɛ lɛ a blan fiézan ma, é ma gini do do valé vwi do do nya; a blan suiɛdo lé é kɛlɛ fintran ma, a zo duo lé é dan kɛlɛ lɛ wo faa zé nya.

³⁴ Bɔ ziɛn lé ke bélé amandé wɔlɛ zo, é dan kɛlɛ lɛ fintran pun ma, é ma gini do do valé vwi do do nya.

³⁵ A blan fié lé é bɔra fintran pun gi, a ma gini do ’é kɛlɛ wo wuo, a ma gini do ’é kɛlɛ a blan fié koɛ wuo, yé a ma gini do ’é kɛlɛ a blan fié pɔné wuo; blan suiɛdo lé wo bɔra fintran gi, wo dan kɛlɛ lɛ yee ɛ zo.

³⁶ Fintran ma gininu valé é blannu wo dan kɛlɛ lɛ é ke ’léé do; a faa é dan kɛlɛ lɛ kyan gyɛle nya, kyan tegele nya.

³⁷ I dan a fintran bɔné sɔrafié kɛlɛ lɛ, yé i wo dɔra wo ’léé fɛan zo, léé, a san é bɔra a ’lɛzia.

³⁸ A dirifɛnu valé a yeezéngifɛ é dan kɛlɛ lɛ kyan tegele nya.

³⁹ Kyan tegele talan do é dan fintran valé é ma nyanamapafɛnu faa kɛlɛ lɛ.

⁴⁰ ’I yuɛ pa ibo va, ’i wo kɛlɛ a kɛlɛbɛ lé maa a gɔɔn i lɛ gɔ nwiin, a yɛrama.