Fwile 24 - Kazambale lé Sebe Sauunu 1979

Moizi go Sinai gɔ nwiin

¹ Kazambale lé Moizi lɛ léé: ’I da Gakelebale vazia, bii valé Arɔn koo, Nadab valé Abiu koo, Izraɛl mi segelenu yɔ yaa wɔlɛ vu koo, wo nya, yé ka dan dia lɛ ka bli la baa.

² Té wo faa bié Gakelebale sɔnɔ lo; té munu é gɔ gié Moizi va lo; Moizi do kpen é dan bié lɛ Gakelebale sɔnɔ.

³ Moizi da Gakelebale dére faa valé bélidɔwenu faa zuo fe lɛ munu lɛ. Munu faa a zi pa dére do nya léé: We faa lé Gakelebale a fe, ko dan a kɛlɛ lɛ.

⁴ Moizi Gakelebale dérenu faa gyɛ. ’Bɛ zuo é nwa bladi tutu; é balebanna kɛlɛ gɔ nyana ma yé é gɔlɛ vu ta fié pla é ke la Izraɛl bɛn vu ta fié zé nya.

⁵ É Izraɛlnu va pɛniɛnu nwunvɔ Gakelebale banle we gi, balebanwi lé wa kyɛ blé, a nya, ’bɛ valé bɔvɔ sarakanu bole dirigɔnénu nya we gi.

⁶ Moizi a nyɛ gi bɔi fié, yé é a lɛ do zén kananu gi, yé é a koɛ zana balebanna ta.

⁷ É gipawe sɛbɛ si yé é a ta fe munu faa tɔné gi. Munu léé: We faa lé Gakelebale a fe, ko dan a kɛlɛ lɛ, yé ko dan a lɛdɔ lɛ a ma.

⁸ Moizi nyɛ si yé é a nwɛɛn munu ta a fele nya léé: Gipawe lé Gakelebale a kɛlɛ ka va dére ’konu faa yɛrama, a dɔ plɛplɛ nyɛ lé ke ’ko.

⁹ Moizi gɔ gié Arɔn koo, Nadab valé Abiu koo, Izraɛl lé mi segelenu yɔ yaa wɔlɛ vu koo, wo nya ’é va.

¹⁰ Wo Izraɛl lé Bale ye; a gane wuofɛ a bélé safiigɔlɛ wezan lé woo yɛrɛ yé a zi, a zo; a gi a é bɔle bélé la boen zo.

¹¹ É ’ka é bɛ nwa lɛ Izraɛl lé nénu va mi vabole ma lo. Wo Kazambale ye yé wo fɛ ble yé wo ’yi mini.

¹² Gakelebale lé Moizi lɛ léé: ’I gɔ gié an vazia, yé ’i vo ’ko; maa dan gɔlɛfénnu nɔ lɛ i lɛ, bélidɔwenu valé an sɔnnénu lé maa wo gyɛ we paale wo gi we ma, wo nya.

¹³ Moizi nwa, ’té Jozué lé, ’bɛ alé nyanama paan, ’té ’bɛ a a va, yé Moizi Kazambale lé gɔ gié.

¹⁴ É lé mi segelenu lɛ léé: ’Ka ko lɛbɛn ’ko, fɔɔ yé ko da ka va é ziin. Arɔn valé Uru lo; wo dan vo lɛ ka va; dé we do bɔ mian ma, wo lɛ lé azan é dan a fe lɛ.

¹⁵ Moizi gɔ gié yé lati bua gɔ ta.

¹⁶ Gakelebale lé fuasan nyana Sinai gɔ nwiin, yé lati bua a ta yi suiɛdo. Yi sɔrafiézan nya, Gakelebale Moizi laa lati méléna.

¹⁷ Gakelebale lé fuasan lé ke gɔ nwiin, é a Izraɛl lé nénu yuɛ gi bélé kyɛ lé, éé fɛnu blé, a zo.

¹⁸ Moizi wɔra lati méléna yé é gɔ gié. Moizi vo gɔ nwiin yi yɔ fié, bladi nyanadi.