Fwile 23 - Kazambale lé Sebe Sauunu 1979

¹ Té i viéwe sɔɔla lo. Té i péli vɔ wenyanékɛlɛzan va vié wole nya mi ma lo.

² Té i go mi kiɛre zuo wenyané kɛlɛle we gi lo; dé i a wenayezan nya weblena, té i péli vɔ mi kiɛre va we tegele gi sɛrɛle we ma lo.

³ Té i dɔ nyanégyɛzan zuo é pla alé weblena lo.

⁴ Dé i nyanézan lé dirigɔné léé, dé alé sokofale léé, dé é san, dé bé ye, i dan go lɛ a nya a lɛ.

⁵ Dé i nyanézan lé sokofale ye, ’té é dia élé kɔné wuo, dé é dɔ i gi léé, i ’ka dan a kɔné si lɛ a punu lo, i dan bɔ lɛ a va a kɔné sina a punu duowo.

⁶ Dé wa nyanégyɛzan lé we blena, té i izé fe we tegele gi sɛrɛle we ma lo.

⁷ Té i weblele ’wuo pla weple nya lo, té i ga dɔ weanwiinlozan valé mi tegele nwiin lo, naa, maa ’ka dan wegyɛzan vo lɛ é pla lo.

⁸ Té i blɛ si lo; naa, blɛfɛnu sile éé yuɛ fuozan yuɛ ’wiié, yé éé mi tegelenu dére sɛra.

⁹ Té i yaa bɛn ta lo; ka a turu bɛnnu nya Éjipiti tɛrɛ la, amalé bɛn éé ’wuo dɔa wean wuo, ka a gi dɔɔ.

¹⁰ ’Ka féi pa lɛɛ suiɛdo yé ’ka ana fɛnu gyɛ.

¹¹ Naa, lɛɛ sɔrafiézan nya, i dan féi pale vo lɛ yé ana tɛrɛ é dan flin lɛ; ilé munu va nyanégyɛzannu gi é dan nana lɛ a ma, yé fɛ lé é vo, bwigiwinu é dan a ble lɛ. ’I yee duo kɛlɛ ilé dɔrɔféi valé ilé ɔliviyilinu lɛ.

¹² Ilé nyanama faa pa yi suiɛdo nya. Naa, a yi sɔrafiézan nya i dan flin lɛ, ilé diri valé ilé sokofale flinle we gi, ilé luu be valé bɛn flinle we gi.

¹³ We faa lé maa a fe ka lɛ, ka dan a kɛlɛ lɛ, yé té ka bale bɛnu tɔ fe lo; té wa ’ma boenwo ka ’léé monomono lo.

¹⁴ Lɛɛ do gɔnɔ yaa, ’ka fɛti kɛlɛ an tɔ bɔle we gi.

¹⁵ Buru lé lévɛn ’ka a va lo, ’ka ’bɛlé fɛti kɛlɛ; bléyi lé wa dɔ, ’sa sola moné nya, buru lé lévɛn ’ka a va lo, i dan a ble lɛ yi sɔrafié nya, maa i bélidɔ fɛan zo, a zo, moné ’ko gi lé ka fwi Éjipiti tɛrɛ la, azama; té wo da wo lee koro nya an yara lo.

¹⁶ I dan féifɛ vinin lé fɛti kɛlɛ lɛ, nyanama lé bé pa ilé féi, ana fɛ vinin nya; lɛɛ nyaa bléyi va, dé i nyaa ilé nyanama nya, i dan fɛ sile féi lé fɛti kɛlɛ lɛ.

¹⁷ Lɛɛ do gɔnɔ yaa gɔnénu faa é dan da lɛ Mizan, Gakelebale ’lɛ.

¹⁸ Buru lé lévɛn ke a va, té i saraka bo a nya, wi lé bé gyɛ an tɔbɔle we gi, a nyɛ va lo; té bé nyɔnɔ tadɔ é béli fɔɔ yé tu é kini a ma lo.

¹⁹ I lé féifɛ vinin lé ke é zima, i dan da lɛ a nya Gakelebale ilé Bale lé kɔn gi. Té i boliné dɔne é bu nyɔyi va lo.

²⁰ Bé ye, maa lanje do nwunvɔ i ’lɛ, i takuunle zia we gi, gole we gi i nya fɛana lé maa a ma’lɛrɛ, ana.

²¹ ’I yuɛ pa ibozen va a yara, yé ’i tɔné dɔ a dére lɛ, té i dɔ a ma plɛplɛ lo, naa, é ’ka dan ka ma we vo lɛ lo, an tɔ a a gi, ’bɛzama.

²² Naa, dé i tɔné dɔ a dére lɛ, yé we lé maa fe i lɛ, dé bé faa kɛlɛ, maa dan kɛlɛ lɛ i nyanézannu é nyanézan nya, maa dan kɛlɛ lɛ i mazannu é mazan nya.

²³ Anlé lanje é dan tawo lɛ i ’lɛ, yé é dan go lɛ i nya, Amorénu koo, Étinu koo, Férézinu koo, Kanaannu koo, Éévinu koo, Jébusinu koo, wo va, yé maa dan wo si lɛ tɛrɛ la tata.

²⁴ Té i dia i bli la wolé balenu ’lɛ lo, té i wo bɔ lo; té i wolé tawobɛ zuo sona lo, naa, ’i wo guru zana a gi, yé ’i wolé miyilinu yéli.

²⁵ Ka dan Gakelebale, kalé Bale bɔ lɛ, yé é dan kalé fɛblele valé kalé ’yi drɔɔ vo lɛ, yé maa dan gyɛ si lɛ ka méléna.

²⁶ Né sɛrɛzan valé sɔnzan ’ka dan kɛlɛ lɛ ilé tɛrɛ la lo. Maa dan ilé ’yinu fan lɛ.

²⁷ Maa dan an lee kanale zén lɛ wo gi ka ’lɛ, dé i bɔ munuan ma, maa dan wo bin lɛ, yé maa dan i nyanézannu faa lala dɔ lɛ i ta.

²⁸ Maa dan gyebenu nwunvɔ lɛ ka ’lɛ, yé Éévinu koo, Kanaannu koo, Étinu koo, yee gyebenu é dan wo bin lɛ i ma baa.

²⁹ Maa ’ka dan wo bin lɛ ka ma baa lɛɛ do kpen gi lo, dé tɛrɛ é da kɛlɛ bwii nya, yé bwigiwinu ’léé gi é gyɛ ka ma.

³⁰ Maa dan wo bin lɛ ka ma baa sɛnésɛné, fɔɔ yé ka ’léé gi é gyɛ yé ka bɔ tɛrɛ sile lɛ.

³¹ Maa dan ilé tɛrɛ glɛ dɔ lɛ, é sia Wɛyi Sɔɔn ma fɔɔ yé é bɔ Filisitinu lé wɛyi ma, yé é sia bwi ma fɔɔ yé é bɔ yuu ma; naa, maa dan ana tɛrɛlamunu pa lɛ ka lee, yé ka dan wo bin lɛ ka ’lɛ.

³² Té i gi pa do wo va lo, té i gi pa do wolé balenu va lo.

³³ Wo ’ka dan nyana lɛ ilé tɛrɛ la lo, dé wo da i nyunu léé, i wenyané kɛlɛ an ma; naa, dé i wolé balenu bɔ é dan kɛlɛ lɛ i kunsan nya.