Fwile 20 - Kazambale lé Sebe Sauunu 1979

Bélidɔwe vu

¹ Yé Kazambale kun wefele ma, yé é léé:

² Gakelebale, ilé Bale lé é i si luu gi Éjipiti tɛrɛ la, maa a a nya.

³ Té i bale bɛnu pa an pa gi lo.

⁴ Té i miyili nyaa lo; fɛnu lé wo ke lanu gi koo, wo lé wo ke tɛrɛ la koo, wo lé wo ke ’yinu va tɛrɛ sɔnɔ mi koo, té i wo va fɛ do kpen foto kɛlɛ lo.

⁵ Té i dia i bli la wo ’lɛ lo, té i wo mawe kɛlɛ lo; naa, maa, Gakelebale, ilé Bale, maa a maawo Bale nya, yé maa munu lé weple ma ban dɔa wolé nénu nwiin, fɔɔ an zapamunu kulu yaazan valé wo kulu ziɛnzan nya,

⁶ yé munu lé an sɔ wo lɛ, ’té woo anlé bélidɔwenu kɛla, an nyanai éé zén‐é wo ta fɔɔ wo kulu wuru soru nya.

⁷ Té i Gakelebale, ilé Bale, tɔ fe é pla lo; mi lé é Gakelebale tɔ fe é pla, Gakelebale é dan ’é lɛdɔ lɛ ’bɛzan gi.

⁸ Flinyi sele ’é dɔ i gi ma, a pale é yɛrama we gi.

⁹ ’I nyanama pa yi suiɛdo yé ilé nyanama faa pa.

¹⁰ A yi sɔrafiézan a Gakelebale, ilé Bale lé flinyi nya; té i nyanama do kpen pa lo, bii koo, i be koo, i lu koo, i wuogɔné koo, i wuole koo, ilé wi koo, bɛn lé é ke ilé kɔn gi koo, té ’wo nyanama do kpen pa lo.

¹¹ Lanu valé é gifɛnu koo, tɛrɛ valé é tafɛnu koo, wɛyi valé é vafɛnu koo, Gakelebale wo kɛlɛ yi suiɛdo wuo, yé é flin a yi sɔrafiézan nya; bɛwemalé Gakelebale flinyi drɔɔ vo yé é a pa é yɛrama.

¹² I ti valé i bu lɛdɔma, ilé yinu kɛlɛle kiɛre we gi, tɛrɛ lé Gakelebale, ilé Bale a nɔ i lɛ, a ta.

¹³ Té i mi gyɛ lo.

¹⁴ Té i le bɛ gini lo, té i gɔné bɛ gini lo.

¹⁵ Té i kyeenwo lo.

¹⁶ Té i viéwo mi ma lo.

¹⁷ Té i bli é bɔ mi bɛ lé kɔn ma lo; té i bli é bɔ mi bɛ na ma lo; a wuogɔné koo, a wuole koo, alé diri koo, alé sokofale koo, alé fɛnu koo, té i bli é bɔ wo va fɛ do kpen ma lo.

¹⁸ Munu faa éé zagele banle valé béli fɛnle maan yé lɛɛ yuɛwuovɔle koo, kyɛgoi sɔɔlale gɔ ta koo, woo wo yé. Fɛ ’konu yele ma lé munu ma éé nyɔɔn‐an, ’té wa é dɔle baa.

¹⁹ Wo lé Moizi lɛ léé: Biibozen ’é we fe ko lɛ yé ko dan a ’ma lɛ; té Kazambale é we fe ko lɛ lo, dé ko da ga.

²⁰ Moizi lé munu lɛ léé: Té ka kana lo; ka gi danle koo, kanale Bale lee kɛlɛle ka gi yé ka ’ka wenyané kɛla lo koo, ’bɛ lé we ma lé Kazambale da.

²¹ Munu vo baa; naa, Moizi bié lati lé Kazambale ke a gi, a va.

²² Gakelebale lé Moizi lɛ léé: Bé fe Izraɛl lé nénu lɛ léma: Ka a ye léé, maa we fe ka lɛ lanu gi.

²³ Té ka gɔɔlifubalenu valé kyanbalenu kɛlɛ, wo pale an va we ma lo; té ka wo kɛlɛ monomono lo.

²⁴ ’I an banna kɛlɛ tɛrɛ nya, yé balebanwi lé wa kyɛ blé koo, ilé bɔvɔ sarakanu koo, ilé ’blanu koo, ilé dirinu koo, ’i an ban wo nya a ta. Dé maa an tɔ sele dɔ ka gi fɛofɛana, maa dan da lɛ i va ’bɛna, yé maa dan i drɔɔ vo lɛ.

²⁵ Dé i an banna kɛlɛ gɔlɛ nya, té bé kɛlɛ gɔlɛnu lé wa nyaa, wo nya lo; dé i zaané zun gɔlɛ ma, ’té i gɔlɛ sɛrɛ.

²⁶ Té i an banna nwa loru baa, yé bé gié sikalié nya lo, dé wo da i porole ye.