Fwile 2 - Kazambale lé Sebe Sauunu 1979

Moizi yaale

¹ Lévi kululami do le si Lévi kululale do nya.

² Le ’ko bɔn si yé é né yaa gɔné nya. É a ye léé, é a nɔnɔmi, yé é a yɔɔ moné yaa wuo.

³ É ’ka bɔa a yɔɔle lɛ é dɛrɛ lo yé é vlekyɛɛ si yé é gyaleyɔɔ valé yilibrɔn wo a ma; é né pa a gi, yé é a dɔra gyannu méléna yuu gɔɔn ma.

⁴ Né buru dɔ ana baa sɛ, we lé é dan kɛlɛ lɛ a lɛ, a yele we gi.

⁵ Faraɔn lu go zuru lɛ yuu bai, yé a pamunu vo dɔwona yuu gɔ la. É kyɛɛné ye gyannu méléna yé é wuole nwunvɔ a sina.

⁶ É a lɛ so yé é né ye; négɔnéné lé ke wuvɔna, yee lé. A nyanai zén a ta yé é léé: Ébrunu lé né do lé.

⁷ Yé né buru lé Faraɔn lu lɛ léé: É sɔ i lɛ léé, ’an go népazan nagini Ébru lomu va, nyɔ dɔle né ’ko ’léé we gii?

⁸ Faraɔn lu léé: ’I go. Yé blɛnné go né bu laa lɛ.

⁹ Faraɔn lu lé né bu lɛ léé: ’I né ’ko si, ’i nyɔ dɔ a ’léé an lɛ; maa dan i gooli pa lɛ. Lezan né si yé é vo nyɔ dɔna a ’léé.

¹⁰ É tin aan wo é go a nya Faraɔn lu va yé é kɛlɛ a be nya. É tɔ pa a ma Moizi; é léé: Maa a si ’yi va, azama.

Moizi vɔ fli gi yé é go Madian tɛrɛ la

¹¹ Moizi kɛlɛ segele bléyian va, é go é bwenu va yé é wolé nyanama tɔntɔn ye. É Éjipiti mi do ye é bwe Ébru mi do blana.

¹² É zi faa nagini yé é ’ka mi do kpen ye lɛ lo yé é Éjipiti mi gyɛ yé é a yɔɔ nyéné wuo.

¹³ ’Bɛ é tu kini é bɔra é ziin; yé bé ye, Ébru mi fié a guli danna. É lé wegyɛzan lɛ léé: Mɛmalé i a i bɔluzan blanaa?

¹⁴ Yé mi ’ko a zi pa léé: De ɛ bii dɔ ko nwiinzan valé kolé weblezan nyaa? É dɔ i gi léé, i dan maa gyɛ lɛ, i Éjipiti mi gyɛ fɛan zo, a zoo? Kana zén Moizi gi yé é léé: Weboen lé, wo we ’ko dɔɔ.

¹⁵ We lé é kɛlɛ, Faraɔn a ’ma, yé é a kwa kulina léé, ’é Moizi gyɛ. Naa, Moizi vlan buru baa Faraɔn lee, yé é go Madian tɛrɛ la, yé é dɔ ’yiguru do ta.

¹⁶ Madian balebanzan lunu a sɔrafié. Wo da ’yi tɔ lɛ yé wa zén winu lé ’yiminifɛ gi wo ti lé trubɛnu lé ’yi minile we ma.

¹⁷ ’Blatabinzannu da yé wo wo bin. Yé Moizi nwa yé é dɔ lomu zuo yé é ’yi nɔ wolé trubɛnu lɛ.

¹⁸ Wo nɔla ’wo ti Réuɛl va aan wo, é léé: Mɛmalé ka da é kele kyɔɔ?

¹⁹ Wo léé: Éjipiti mi do ko si ’blatabinzannu lee, yé ’bɛ ta loru é ’yi tɔ ko lɛ yé é ’yiminile nɔ trubɛ lɛ.

²⁰ Yé Réuɛl lé é lunu lɛ léé: É a kyɛɛn? Mɛmalé ka gɔné ’ko vo ana mii? ’Ka a laa, ’é da fɛ ble.

²¹ É dɔ Moizi gi léé, ’é nyanaan gɔné ’ko va, yé é nyana a va. Yé ’bɛ é lu Séfora nɔ a lɛ a na nya.

²² É né yaa gɔné nya, yé é tɔ pa a ma Gɛɛsom; é léé: Maa nyana bɛn tɛrɛ la, azama.

²³ ’Bɛ zuo namɔn yé Éjipiti mununwiinzan blɛn ga, ’té Izraɛl lé nénu éé dunnuan é ziin plale mi wuo we ma, ’té woo siaan. Siaa lé wa wona kɛlɛle luu gi we ma, wo nwa fɔɔ yé wo bɔ Kazambale va.

²⁴ Kazambale wolé dunnule ’ma yé gipawe lé é a kɛlɛ Abraam koo, Izak koo, Jakɔb koo, wo va, a sele dɔ a gi.

²⁵ Kazambale yuɛ vɔ Izraɛl lé nénu ta, yé a nyanai zén wo ta.