Fwile 18 - Kazambale lé Sebe Sauunu 1979

Jétro da Moizi va

¹ We faa lé Kazambale a kɛlɛ Moizi valé alé munu Izraɛl pli zi, Madian lé balebanzan, Jétro, Moizi na ti a ’ma; é a ’ma léé, Gakelebale Izraɛl munu si Éjipiti tɛrɛ la.

² Moizi na Séfora lé é a pa zia, Moizi na ti Jétro a si,

³ yé é Séfora be fiénu si é ziin; wa do laan Gɛɛsom, naa, Moizi léé: Maa nyanaan bɛntɛrɛ la;

⁴ wa koɛ laan Éliézɛɛ, naa, Moizi léé: An ti lé Bale bɔ an va yé é an so Faraɔn lé gwɔun lee.

⁵ Moizi na ti Jétro koo, Moizi benu valé a na koo, wo da fɛana lé wo ke é nyanale bwi gi, ana, Kazambale lé gɔ wuo.

⁶ Yé é we pa Moizi lɛ zia léé: Maa, i na ti Jétro, maa a dana i va, ko valé i na valé é be fiénu nya.

⁷ Moizi go é na ti si lɛ zia, yé é dia é bli la, yé é a tuu gyɛ. Wo wo ke sina laa, yé wo wɔra Moizi lé sɔkɔn wuo.

⁸ We faa lé Gakelebale a kɛlɛ Faraɔn valé Éjipiti munu lɛ Izraɛl pli zi koo, nyanénu lé wa ble zia koo, Gakelebale wo si we gi fɛan zo koo, Moizi a zuo faa fe é na ti lɛ.

⁹ Wezin faa lé Gakelebale a kɛlɛ Izraɛl lɛ, Jétro gi nana a we ma, yé a gi nana léé, Gakelebale Izraɛl si Éjipiti munu lee.

¹⁰ Yé Jétro léé: Gakelebale lé é ka si Éjipiti munu valé Faraɔn lee, yee lé é munu si Éjipiti munu lee, ’wa drɔɔ vo ma.

¹¹ Maa gi dɔɔ sin léé, Gakelebale a blɛn é mini balenu faa ta; naa, Éjipiti munu lé wenaané dia wobo la.

¹² Moizi na ti Jétro Bale ban, balebanwi lé wa kyɛ blé, a nya, yé é saraka bo Kazambale lɛ. Arɔn valé Izraɛl lé mi segelenu faa da a banwi ble lɛ Moizi na ti va, Kazambale yuɛ va.

Jétro we pla Moizi lɛ

¹³ ’Bɛ é tu kini, Moizi nyana munu lé we blele we gi, yé munu dɔ a ’lɛ, é sia bladi fɔɔ yé nyanadi pa.

¹⁴ We faa lé Moizi ke a kɛlɛna munu lɛ, Moizi na ti a ye, yé é léé: Mɛ lé bé kɛlɛ munu ’ko lɛɛ? Mɛmalé i nyana i do yé munu faa dɔ i ’lɛ, é sia bladi fɔɔ yé nyanadi pa a zoo?

¹⁵ Moizi lé é na ti lɛ léé: Munu éé dan maa va we laale Kazambale lee we gi.

¹⁶ Dé we bɔ wo méléna, woo dan maa va; yé maa wolé we blé yé maa wo bɔn‐in kinié Kazambale lé bélidɔwenu valé a sɔnnénu ma.

¹⁷ A na ti lé a lɛ léé: We lé i ke a kɛlɛna, é ’ka zima lo.

¹⁸ I dan fuu si lɛ ibo ta; yé i dan munu ’ko fuu si lɛ ’wo ta é ziin; naa, we ’ko mini ilé plɛplɛ ta; i ’ka bɔa we ’ko faa kɛlɛle lɛ i do lo.

¹⁹ Sin, ’i tɔné dɔ an lɛ; maa dan we do pla lɛ i lɛ, yé Kazambale ’é kɛlɛ i va ma. ’I danamla kɛlɛ munu lɛ Kazambale yara yé ’i go wolé we nya Kazambale va.

²⁰ ’I Bale sɔnnénu valé alé bélidɔwenu paa munu gi; zi lé é a lé wo a ta tawo, ’bɛ valé we lé é a lé wa kɛlɛ, ’i wo bɔn‐in kini a nya.

²¹ ’I munu vabo, yé munu lé woo we kɛla ’wo zua, ’té woo kanaan Kazambale lee, ’té wa mi wéiinnu nya, ’té wo bli bɔle fɛ ma za paan, ’i wo si munu va; ’i wo dɔ munu wuru soru soru koo, mi yɔ soru soru koo, mi yɔ fié wɔlɛ vu vu koo, mi vu vu koo, wo nwiinzannu nya.

²² ’Wo munu lé we ble yifaama ma; ’wo da we blɛnnu nya i va ma, yé ’wo we kiénénu ble ’woboan, yé ilé kɔné bɛn ke ’é si wo bɔle i va nya.

²³ ’I ’bɛ kɛlɛ, yé dé Kazambale we do fe i lɛ yé i bɛ ’é sɔ ’bɛ kɛlɛle nya yé munu ’ko é dan bɔ lɛ ’wo gona gi nanale nya.

²⁴ Moizi é tɔné dɔ é na ti dére lɛ, yé we lé é a fe a lɛ é a faa kɛlɛ.

²⁵ Yé munu lé a yara a wo yara léé, wo wo dɔ minwiinzanu nya, Moizi wo si Izraɛl faa va, yé é wo dɔ mi wuru soru soru nwiinzannu koo, mi yɔ soru soru nwiinzannu koo, mi yɔ fié wɔlɛ vu vu nwiinzannu koo, mi vu vu nwiinzannu koo, wo nya.

²⁶ Woo munu lé we blé yifaama; woo dan we plɛplɛnu nya Moizi va, ’té woo we kiénénu blé ’woboan.

²⁷ Moizi zi nɔ é na ti Jétro lɛ, yé é go élé tɛrɛ la.