Fwile 15 - Kazambale lé Sebe Sauunu 1979

Wolé lɛrɛvɔle

¹ Yé Moizi valé Izraɛl lé nénu lɛrɛ ’ko vɔ Gakelebale lɛ: Wo léma: Maa dan lɛrɛ vɔ lɛ Gakelebale lɛ, naa, é ’élé plɛplɛ nagɔɔn wéiin: É wisoo valé étazan vuli wɛyi va.

² Gakelebale a anlé plɛplɛ nya, yé yee ɛ tɔ zin lé maa a fé; Yee ɛ an si we gi. É a anlé Bale nya; maa dan a kɛlɛ lɛ blɛn; É a an ti lé Bale nya; maa dan a tɔ bié lɛ.

³ Gakelebale a gulidanzan lé éé nyana woo, a nya; A tɔ lé Gakelebale.

⁴ É Faraɔn lé goronu valé élé sunyanu vuli wɛyi va; Wɛyi Sɔɔn alé gulidanzan zinzinnu mini.

⁵ Wɛyi nwalenu wo ta sɔɔla; Wo go wɛyi wɔlɛ ma bélé gɔlɛ zo.

⁶ Oo, Gakelebale, i bɛyibɛ ilé plɛplɛ nagɔɔn; Oo, Gakelebale, i bɛyibɛ ko nyanézan ’wii.

⁷ Ilé zevɔfɛ blɛnblɛnnu nya lé I mazannu yara bua; Ilé bliflile nwa wo ma Yé é wo ble bélé ’sapɛɛ zo.

⁸ I nyé lé fu fɛle we ma lé ’Yinu zun dɔ; ’Yiyoronu dɔ loru bélé kɔnguru zo Wɛyi nwale dɔ plɛplɛ wɛyi méléna.

⁹ Ko nyanézan léma: Maa dan go lɛ wo zuo, maa dan dɔ lɛ wo ma, Maa dan gulizarafɛ guli lɛ, Maa dan anlé we lɛgi pa lɛ wo ma fɔɔ yé an bli ma kɔn ’é si. Maa dan anlé gwɔun so lɛ é kɔlɛ gi, an bɛ é dan wo kulu ga lɛ.

¹⁰ I fu fɛ ilé flinle nya Wɛyi bua wo ta; Wo go ’yi wɔlɛ ma Bélé lɛɛ zo.

¹¹ Oo, Gakelebale, de ɛ ke bii zo balenu mélénaa? De ɛ ’lɛra sauun bélé bii zo, ’Té a tɔ bɔ yara lé, ’Té éé we blɛnblɛnnu kɛlaa?

¹² I bɛyi soi Tɛrɛ wo mini.

¹³ Ilé nyanai zénle nya lé i go munu ’ko nya, A nya lé i wo si we gi; Ilé plɛplɛ nya lé I nyanana sauun lé zi gɔɔn wo é lɛ.

¹⁴ Munu a maan yé wo kɔlɛ ma éé nyɔɔn‐an: Kana blɛn zén Filisiti munu gi;

¹⁵ Édom nwiinmunu gi nyɛ kini; Moab tɛrɛ lé gulidanzannu kɔlɛ ma nyɔɔn; Kanaan munu faa kɛlɛ tɔɔtɔɔ.

¹⁶ Kanale valé di kinile é dan bɔ lɛ wo ma fiaa; I bɛ lé plɛplɛ lé we ma lé Wo dan kinin lɛ bobogyɛzannu nya bélé gɔlɛ zo, Fɔɔ yé ilé munu é gié, oo, Gakelebale, Fɔɔ yé ilé munu lé i wo ye izé nya, Yé wo gié.

¹⁷ I dan go lɛ wo nya yé i dan wo nyana lɛ, gɔ lé i dan a nɔ lɛ wo lɛ wozé tɔnɔ nya, a nwiin, Fɛ lé bé na kɛlɛ i nyanana nya, ana, oo Gakelebale, Fɛna sauun lé bé kɛlɛ, ana, oo Mizan.

¹⁸ Gakelebale é dan pla lɛ munu nwiin lɛɛfaama, a glɛ ’ka lo.

¹⁹ Faraɔn lé wisoonu koo, alé goronu koo, alé wisootazannu koo, wo wɔra wɛyi va, Yé Gakelebale da wɛyi nya wo ta; Naa, Izraɛl lé nénu tawo wɛyi méléna tɛrɛ gale ta.

²⁰ Arɔn buru, balelayezan Mari yɔyɔ si, yé lomu faa da a zuo, yɔyɔnu nya wo lee, ’té woo nɛnɛ boo.

²¹ Mari we Izraɛl lé nénu lé lɛrɛ ma yé é léé: Gakelebale élé plɛplɛ nagɔɔn wéiin amalé ’ka lɛrɛ vɔ a lɛ; É wisoo valé étazan vuli wɛyi va.

Mara lé ’yinu

²² Moizi Izraɛl si Wɛyi Sɔɔn ma. Wo go Suré nyéné vazia; wo tawo yi yaa nyéné la aan wo, wo ’ka ’yi ye lɛ lo.

²³ Wo bɔ fɛ dona, wa laama Mara; naa, ’yi lé ke Mara é a é nyanale, amalé wo ’ka bɔa a minile lɛ lo. Bɛwemalé wo fɛkona laa Mara.

²⁴ Munu gun gyɛ Moizi ma yé wo léé: Mɛ lé ko dan a mini lɛɛ?

²⁵ Moizi siaa Gakelebale lɛ; yé Gakelebale yili do gɔɔn a lɛ yé é a vɔ ’yi va. Yé ’yi kɛlɛ néné. ’Bɛna lé Gakelebale ’é sɔnné valé élé bélidɔwenu nɔ munu lɛ, yé ’bɛna lé é wo gi dan.

²⁶ É léé: Dé i Gakelebale, ilé Bale dére ban i tɔné nya é zima, we lé ke tegele a yuɛ gi, dé bé kɛlɛ, dé i tɔné dɔ alé bélidɔwenu lɛ, dé i tawo a sɔnné faa yɛrama, gyɛnu lé maa Éjipiti munu gyɛ wo nya, maa ’ka dan i gyɛ lɛ a do kpen nya lo; maa a Gakelebale lé éé i bélié, a nya, azama.

²⁷ Wo bɔ Élim, fɛana lé ’yibɔna vu ta fié valé yɔyili yɔ yaa wɔlɛ vu ke, ana. Wo sɔkɔnnu dɔ ’bɛna, ’yi sɔnɔ.