Fwile 14 - Kazambale lé Sebe Sauunu 1979

Wo Wɛyi Sɔɔn kini

¹ Gakelebale we fe Moizi lɛ yé é léé:

² Bé fe Izraɛl lé nénu lɛ léé, ’wo nɔla yé ’wo nyana Pi‐Aairɔt, Migidɔl valé wɛyi méléna, Baal‐Séfɔn yara; fɛkona yara lé ka dan nyana lɛ, wɛyi sɔnɔ.

³ Faraɔn é dan a fe lɛ Izraɛl lé nénu ma léé, wa é saanle ana tɛrɛ la; bwi wo zi lɛ sɔɔ.

⁴ Maa dan Faraɔn bli kɛlɛ lɛ tɔntɔn, yé é dan go lɛ wo zuo; naa, maa dan anlé fuasan nagɔɔn lɛ Faraɔn valé élé sunyanu faa nya, yé Éjipiti munu é dan a gi dɔɔ lɛ léé, maa a Gakelebale nya. Yé Izraɛl lé nénu a kɛlɛ a zo.

⁵ Wa fe Éjipiti mununwiinzan blɛn lɛ léé, munu vlan buru. Yé Faraɔn valé é wuomunu bli nɔla munu lé we ma. Wo léé: Mɛ ɛ kɛlɛ ko lɛ yé ko daan Izraɛl ma, wo go, yé wo ’ka kolé nyanama paan é dɛrɛ loo?

⁶ Faraɔn élé goro ma’lɛrɛ yé é go élé munu nya é va.

⁷ É goro zima si wuru yaa, é valé Éjipiti lé goronu faa nya; gulidanmunu a wo faa gi.

⁸ Gakelebale Éjipiti mununwiinzan blɛn Faraɔn bli kɛlɛ tɔntɔn yé Faraɔn go Izraɛlnu zuo. Izraɛl lé nénu si wo va baale nya wo yuɛ gi.

⁹ Éjipiti munu go wo zuo; wisoonu faa koo, Faraɔn lé goronu koo, alé wisootazannu valé alé sunyanu koo, wo bɔ wo ma é nyanale wɛyi sɔnɔ, Pi‐Aairɔt vazia, Baal‐Séfɔn yara.

¹⁰ Faraɔn bié. Izraɛl lé nénu a nagini, yé wa ye léé, Éjipiti munu a dana ’wo zuo. Yé kana blɛn zén Izraɛl lé nénu gi, yé wo siaa Gakelebale lɛ.

¹¹ Wo lé Moizi lɛ léé: Mipana ’ka Éjipiti tɛrɛ la lo, bɛwemalé é a lé i da ko nya yé ko ga bwi gii? Mɛ lé bé kɛlɛ ko lɛ ko sile Éjipiti tɛrɛ la nya ’koo?

¹² Ko ’ka a fe lɛ i lɛ Éjipiti tɛrɛ la léé, ’i ko vo, ko nyanama pa Éjipiti munu lɛ loo? Naa, Éjipiti munu lé nyanama pale sɔ ko lɛ é mini gale bwi gi la. A zoan ko fe i lɛ loo?

¹³ Moizi lé munu lɛ léé: Té ka kana we do kpen lee lo, ’ka dɔ flee, yé Gakelebale é dan ka si lɛ we gi fɛan zo kyɔ, ka dan a ye lɛ; naa, Éjipiti munu lé ka wo yé kyɔ, ka ’ka dan wo ye lɛ é dɛrɛ monomono lo.

¹⁴ Gakelebale é dan ka ta guli dan lɛ; yé ’kaa, ’ka vo é tadɔle.

¹⁵ Gakelebale lé Moizi lɛ léé: Mɛmalé wa siaanaa? Bé fe Izraɛl lé nénu lɛ léé, ’wo tawo.

¹⁶ Bii, ’ilé tawomayili nwa, ’i bɛ soi wɛyi ta yé bé fén gyɛ; yé Izraɛl lé nénu é dan wɔra lɛ wɛyi méléna tɛrɛ gale ta.

¹⁷ Yé maa, maa dan Éjipiti munu bli ta dɔ lɛ plɛplɛ, wo wɔrale ana ka zuo we gi; yé maa dan anlé plɛplɛ nagɔɔn lɛ Faraɔn valé élé sunyanu faa koo, alé goronu valé alé wisootazannu koo, wo nya.

¹⁸ Dé maa anlé plɛplɛ nagɔɔn, Faraɔn koo, alé goronu koo, alé wisootazannu koo, wo nya, ’té Éjipiti munu é dan a gi dɔɔ lɛ léé, maa a Gakelebale nya.

¹⁹ Kazambale lé lanje lé éé tawoo Izraɛl lé sɔkɔndɔna ’lɛ, é si ana yé é go wo zuo; yé lati pɔrɔlɔ lé éé goo wo ’lɛ, é si ana yé é dɔ wo zuo.

²⁰ É dɔ Éjipiti munu gu blɛn valé Izraɛl munu gu blɛn méléna. Lati ’ko bɛ do la a gunu nya, yé a bɛ do la a fɛna fu nya. Yé béli ’ko faa gi, mi gu blɛn fié ’ko ’ka bié lɛ wo ke sɔnɔ lo.

²¹ Moizi é bɛ soi wɛyi ta. Yé Gakelebale wɛyi gyɛ é zuo, yirinwanazia fu lé é gié plɛplɛ é béli bléyi faa va bɛ, a nya; é wɛyi guru gi ga yé a ’yinu fén gyɛ.

²² Izraɛl lé nénu wɔra wɛyi méléna tɛrɛ gale ta yé ’yinu kɛlɛ bélé kɔnguru zo wo bɛyila valé wo bɛbola.

²³ Éjipiti munu da wo zuo; Faraɔn lé wisoonu faa koo, alé goronu valé alé wisootazannu koo, wo wɔra wɛyi méléna wo zuo.

²⁴ Manegɔné we bléyi va, ’té Gakelebale a kyɛ pɔrɔlɔ valé lati pɔrɔlɔ méléna, yé é Éjipiti mi gu nagini, yé é wo vɔɔ é ke gi.

²⁵ É wolé goronu gane so, yé wolé tawole kɛlɛ tɔntɔn. Yé Éjipiti munu léé: Kaa vlan buru Izraɛl lee, naa, Gakelebale a Izraɛl ta guli danna Éjipiti munu va.

²⁶ Gakelebale lé Moizi lɛ léé: ’I bɛ soi wɛyi ta; yé ’yinu é dan zén lɛ Éjipiti munu koo, wolé goronu koo, wolé wisootazannu koo, wo ta.

²⁷ Moizi é bɛ soi wɛyi ta. Yé tu kini gunu va, wɛyi da é pa gi, yé Éjipiti munu vlan buru a lee; naa, Gakelebale Éjipiti munu vuli wɛyi méléna.

²⁸ ’Yinu da wo pai, yé goronu koo, wisootazannu koo, Faraɔn lé sunyanu faa lé wo wɔra wɛyi gi Izraɛl lé nénu zuo, wo koo, é wo ta sɔɔla; a do kpen ’ka so lɛ a lee lo.

²⁹ Naa, Izraɛl lé nénu tawo tɛrɛ gale ta wɛyi méléna, yé ’yinu kɛlɛ bélé kɔnguru zo wo bɛyila valé wo bɛbola.

³⁰ ’Bɛ yi ’ko nya, Gakelebale Izraɛl si Éjipiti munu lee; yé Izraɛl Éjipiti munu galenu ye wɛyi gɔ la.

³¹ Gakelebale bɛ plɛplɛ lé é we kɛlɛ Éjipiti munu lɛ a nya, Izraɛl a ye. Yé munu kanaan Gakelebale lee, yé wo bli vo Gakelebale valé é wuozan Moizi lɛ.