Fwile 13 - Kazambale lé Sebe Sauunu 1979

Taboyi valé né vininzannu lé we

¹ Gakelebale we fe Moizi lɛ yé é léé: ’I né vininnu faa pa é yɛrama anzé nya.

² Izraɛl lé né vininnu faa a anzé nya, ’bɛ valé winu lé né vininnu nya.

³ Moizi lé munu lɛ léé: Yi ’ko nya lé ka si luu gi Éjipiti tɛrɛ la, a sele ’é dɔ ka gi ma; Gakelebale bɛ plɛplɛ nya lé é ka si ana. Buru lé lévɛn ke a va, té ka a ble ’bɛ yi ’ko nya lo.

⁴ Ka fwi kyɔ ’sa solamoné nya.

⁵ Kanaan munu koo, Éti munu koo, Amoré munu koo, Éévi munu koo, Jébusinu koo, wolé tɛrɛ lé Gakelebale ébo ’nyɔɔn ka tranu lɛ léé, é dan a nɔ lɛ ka lɛ, dé ka wɔra yee tɛrɛ nyɔnɔzan ’ko ta, ka dan Gakelebale bɔ lɛ a bɔbɛ ’ko nya moné ’ko duo nya.

⁶ Yi sɔrafié nya, buru lé lévɛn ’ka a va lo, ka dan a ble lɛ, yé a yi sɔrafiézan nya wo dan fɛti kɛlɛ lɛ Gakelebale tɔbɔle we gi.

⁷ Buru lé lévɛn ’ka a va lo, ka dan a ble lɛ yi sɔrafié nya; buru lé lévɛn ke a va, té wa ye ka va lo, té wo lévɛn ye ka va lo, kalé tɛrɛ faa la.

⁸ I dan a fe lɛ i be lɛ léé: We lé Gakelebale a kɛlɛ ko lɛ, ko fwile Éjipiti tɛrɛ la bléyi va, a sele dɔ ko gi we lé.

⁹ É dan kɛlɛ lɛ i lɛ bélé tɔmase zo i bɛ ta, bélé weseledɔmigifɛ zo i yarapɛla, Gakelebale lé bélidɔwe kɛlɛle i ’léé we gi; naa, Gakelebale ka fwi Éjipiti tɛrɛ la é bɛ plɛplɛ nya.

¹⁰ I dan bélidɔwe ’ko kɛlɛ lɛ lɛɛ do do ma, bléyi lé wa dɔ, a nya.

¹¹ Dé Gakelebale ka wɔra Kanaan munu lé tɛrɛ la, ébo ’nyɔɔn ka valé ka tranu lɛ fɛan zo, a zo, dé é nyaa tɛrɛ nɔle nya ka lɛ,

¹² ka dan né vininnu faa pa lɛ é yɛrama Gakelebale zé nya, dé é a kalé winu lé né vininnu nyaoo, gɔnénu a Gakelebale zé nya.

¹³ Ka dan sokofale lé né vinin tabo lɛ ’blané nya, yé dé i ’ka a taboo lo, bé bɔrɔ yéli. Ka dan ka benu lé né vininzannu faa tabo lɛ é ziin.

¹⁴ Yé dé i be a laa i lee yi do nya léé, ’bɛ gi lé nɔɔ? i dan a fe lɛ a lɛ léé: Gakelebale ko fwi Éjipiti tɛrɛ la, é ko si luu gi é bɛ plɛplɛ nya;

¹⁵ yé Faraɔn ’ka aan wo daanna ko ma lo, amalé Gakelebale né vininnu faa gyɛ Éjipiti tɛrɛ la, é sia munu lé né vininnu ma fɔɔ yé é bɔ winu lé né vininnu ma. Né vininnu faa lé ke gɔné nya, wean ma lé ko wo no Gakelebale lɛ saraka nya yé ko ko benu lé né vininnu faa taboo, a gi lé ke bɛ.

¹⁶ We ’ko é dan kɛlɛ lɛ bélé tɔmase zo i bɛ ta, bélé pɔɔ zo i yarapɛla; Gakelebale ko si Éjipiti é bɛ plɛplɛ nya, ’bɛzama.

Wo zén tawole va

¹⁷ Faraɔn daan munu ma ’wo go aan wo, Kazambale ’ka go lɛ wo nya Filisitinu lé tɛrɛ la zi ta lo, dɔlé ’té ’bɛ a é pu; naa, Kazambale léé: Dé munu guli ye, dé wo bli é dan nɔla lɛ yé wo nɔla wo pa gi é ziin Éjipiti tɛrɛ laa?

¹⁸ Naa, Kazambale go wo nya bwi gi zia, Wɛyi Sɔɔn vazia. Izraɛl lé nénu si Éjipiti tɛrɛ la gulidanfɛnu nya wo lee.

¹⁹ Moizi go Jozɛfu wɔlɛnu nya é lee; naa, Jozɛfu lé Izraɛl lé nénu lɛ léé, ’wo bale ’nyɔɔn, a fele nya léé: Kazambale é dan bɔra lɛ ka va, yé dé ka fwi ’ko, ’ka go an wɔlɛnu nya fɛkona ma baa.

²⁰ Wo si Sukɔt yé wo nyana Étam, bwi glɛ mun la.

²¹ Gakelebale goo wo ’lɛ, yiéyi é a lati pɔrɔlɔ gi, zi gɔɔnle wo lɛ we gi, yé é béli é a kyɛ pɔrɔlɔ gi, wo va kinile we gi, wolé tawole é yiéyi valé é béli we ma.

²² Lati pɔrɔlɔ ’ka sié wo ’lɛ é yiéyi lo, yé kyɛ pɔrɔlɔ ’ka sié wo ’lɛ é béli lo.