Fwile 11 - Kazambale lé Sebe Sauunu 1979

Moisi né vininzannu gale lɛ kini

¹ Gakelebale lé Moizi lɛ léé: Maa dan da lɛ dunuvɔmagyɛ do nya é ziin Faraɔn valé Éjipiti va. ’Bɛ zuo é dan daan lɛ ka ma yé ka si fɛkona. Dé é zi nɔ ka lɛ webozen nya, é dan ka bin lɛ boenwo.

² Bé fe munu lɛ léé, wo faa do do ’wo gɔɔlifubɔ valé kyanbɔ laa ’wo punmazan lee, gɔnénu a laa ’wo punma gɔné lee, yé lomu a laa ’wo punma le lee.

³ Gakelebale a kɛlɛ léé, wo kɛlɛ mi zin nya Éjipiti munu yuɛ gi; Moizi bozen tɔ a é bɔle Éjipiti tɛrɛ la, Faraɔn wuozannu valé munu yuɛ gi.

⁴ Moizi léé: Gakelebale léma: É béli tu la, é dan gié lɛ Éjipiti tɛrɛ la;

⁵ yé né vininnu faa é dan ga lɛ Éjipiti tɛrɛ la, é sia Faraɔn lé ke é nyanale élé fuablin ta, ’bɛlé né vinin ma yé é bɔ wuolomu lé wo ke é nyanale ’woli zi, ’bɛnu lé né vinin ma, fɔɔ yé é bɔ winu lé né vininnu faa ma.

⁶ Siaale plɛplɛnu é dan kɛlɛ lɛ Éjipiti tɛrɛ faa la, siaalenu lé wo vinin ’ka tan kɛlɛ lɛ lo, yé wo ’ka dan ’bɛ zoɛ siaa wo lɛ é ziin monomono lo, wo nya.

⁷ Naa, Izraɛl lé nénu méléna, é sia munu ma fɔɔ yé é bɔ winu ma, dé é a blén nyaoo, a do kpen ’ka dan we lɛ lo, kalé a gi dɔɔle we gi léé, yee Gakelebale glɛ dɔ Éjipiti valé Izraɛl gi.

⁸ Yé i wuozannu lé ke ’ko, wo faa dan da lɛ ’é va yé wo dan dia lɛ ’wo bli la ’é ’lɛ a fele nya léé: ’I go, bii valé i bɛmamunu faa nya. ’Bɛ zuo é dan go lɛ. Moizi si Faraɔn va, é bli flile baba nya.

⁹ Gakelebale lé Moizi lɛ léé: Faraɔn ’ka dan é tɔné dɔ lɛ ka lɛ lo, anlé gyɛzorowenu gi gyɛle Éjipiti tɛrɛ la we gi.

¹⁰ Moizi valé Arɔn gyɛzorowe ’konu faa kɛlɛ Faraɔn yuɛ va, yé Faraɔn ’ka daan lɛ Izraɛl lé nénu ma, léé, ’wo si élé tɛrɛ la lo.