Fwile 10 - Kazambale lé Sebe Sauunu 1979

Gangannu bɔra

¹ Gakelebale lé Moizi lɛ léé: ’I go Faraɔn va, naa, maa a bli valé a wuozannu bli kɛlɛ plɛplɛ, anlé tɔmasenu kɛlɛle wo méléna we ma;

² we lé maa kɛlɛ Éjipiti munu lɛ, é valé tɔmasenu lé maa a kɛlɛ wo méléna, yé ka wo zuo fe ka benu valé ka nénénu lɛ, ’bɛ lé we ma é ziin. Yé ka dan a gi dɔɔ lɛ léé, maa a Gakelebale nya.

³ Moizi valé Arɔn go Faraɔn va yé wo lé a lɛ léé: Gakelebale, Ébrunu lé Bale léma: I dan ibo kɛlɛ lɛ kiéné ’é ’lɛ mɛ yi laa? ’I daan ’élé munu ma, ’wo go ’é bɔ.

⁴ Dé i ’ka a nyi si lɛ léé, i daan ’élé munu ma lo, bé ye, tɛlɛ é dan da lɛ gangannu nya ilé tɛrɛ faa la.

⁵ Wo dan tɛrɛ ta sɔɔla lɛ ’té mi ’ka tɛrɛ yé é dɛrɛ lo; fɛnu lé goowɔlɛlɛɛ wo vo ka lee, gangannu é dan a pɔné ble lɛ; yilinu lé woo tin‐é kalé féi, wo dan wo faa ble lɛ;

⁶ ilé kɔnnu koo, i wuozannu faa lé kɔnnu koo, Éjipiti munu faa lé kɔnnu koo, wo dan wo fan lɛ. É sia bléyian va lé ka tinu valé ka tranu nyanale pélisia Éjipiti tɛrɛ la, a ma, fɔɔ kyɔ, wo ’ka tan ’bɛ zoɛ we ye lɛ lo. Moizi si Faraɔn va yé é bɔra.

⁷ Faraɔn wuozanu lé a lɛ léé: Mi ’ko, é dan kɛlɛ lɛ ko kunsan nya fɔɔ bléyi kyɛn vaa? ’I daan munu ’konu ma, ’wo go ’wolé Bale bɔ. I ’ka a yé léé, Éjipiti guru a zanana a gi loo?

⁸ Wo da Moizi valé Arɔn nya Faraɔn va é ziin. É lé wo lɛ léé: ’Ka go, ’ka Gakelebale, kalé Bale bɔ. De ɛ dan go lɛɛ?

⁹ Moizi léé: Ko dan go lɛ kolé nénu koo, kolé mi segelenu koo, ko benu valé ko lunu koo, kolé ’blanu valé kolé dirinu koo, wo nya; kolé Gakelebale tɔbɔ fɛti lé.

¹⁰ Faraɔn lé wo lɛ léé: Dé maa daan ka valé kalé nénu ma, Gakelebale ’é kɛlɛ ka va ma. ’Ka yuɛ pa kabozen va, we tɔntɔn a ka ’lɛ.

¹¹ Gbaoo gba! Ka lé ka ke gɔnénu nya, ’ka go Gakelebale bɔ, yee lé ka a laa an lee. Yé wo wo bin Faraɔn yara.

¹² Gakelebale lé Moizi lɛ léé: ’I bɛ soi Éjipiti tɛrɛ la, yé gangannu ’é da Éjipiti tɛrɛ la ma; wo dan tɛrɛ la féifɛnu faa ble lɛ, fɛnu faa lé goowɔlɛlɛɛ wo vo, wo lé.

¹³ Moizi élé tawomayili soi Éjipiti tɛrɛ la; yé Gakelebale yirinwanazia fu gié tɛrɛ ’ko la yiéyi bléyi faa valé béli bléyi faa va. Tu kini aan wo, ’té yirinwanazia fu da gangannu nya é kwakwa.

¹⁴ Gangannu da Éjipiti tɛrɛ la, yé wo zana Éjipiti tɛrɛ faa la; ’bɛ zo gangan kiɛre ’ka tan da lɛ tɛrɛ la lo, yé ’bɛ zo gangan kiɛre ’ka dan da lɛ é ziin monomono lo.

¹⁵ Wo tɛrɛ ta sɔɔla, yé mi ’ka tɛrɛ yé é dɛrɛ lo. Tɛrɛ la féifɛnu koo, yiliporonu koo, fɛ faa lé goowɔlɛlɛɛ wo vo koo, wa faa ble; wo yililaa drɔɔdrɔɔnu valé féi lunu faa ble Éjipiti tɛrɛ faa la.

¹⁶ Faraɔn Moizi valé Arɔn laa é kele yé é léé: Maa wenyané kɛlɛ Gakelebale, kalé Bale valé ka ma.

¹⁷ Naa, ’i an ma we vo kyɔ yi do kpen ’ko nya; ’ka bazoro Gakelebale, kalé Bale lɛ léé, ’é dunuvɔmagyɛ ’ko si an ma é ziin.

¹⁸ Moizi si Faraɔn va yé é bazoro Gakelebale lɛ.

¹⁹ Gakelebale fu ’lɛ plɛplɛ si yirivɔnazia, yé é gangannu sia yé é wo zén Wɛyi Sɔɔn va. A wɔlɛ do kpen ’ka vo lɛ Éjipiti tɛrɛ faa ta lo.

²⁰ Gakelebale Faraɔn bli kɛlɛ plɛplɛ yé Faraɔn ’ka daan lɛ Izraɛl lé nénu ma léé, ’wo go lo.

Gunu dɔra

²¹ Gakelebale lé Moizi lɛ léé: ’I bɛ soi lai zia, yé gunu ’é dɔra Éjipiti tɛrɛ la ma, gunu tiritiri lé mi é bɔalɛ léé, é bɛ mane a ma, a nya.

²² Moizi é bɛ soi lai zia; yé gunu tiritiri dɔra Éjipiti tɛrɛ faa la fɔɔ yi yaa.

²³ Munu ’ka wo ke yé lo, yé mi do kpen ’ka nwa lɛ é nyanana lo fɔɔ yi yaa. Naa, fɛana lé Izraɛl lé nénu faa ke é nyanale, yee ɛ na ɛ ke fu.

²⁴ Faraɔn Moizi laa yé é léé: ’Ka go ’ka Gakelebale bɔ. Kalé ’blanu valé kalé dirinu saa é dan vo lɛ yé kalé nénu é bɔalɛ léé, ’wo go ka va.

²⁵ Moizi a zi pa léé: Fɛnu lé ko dan sarakanu bo lɛ wo nya, é valé winu lé ko dan wo kyɛ ble lɛ Gakelebale, kolé Bale lɛ, biibozen é dan wo nɔ lɛ ko lɛ.

²⁶ Kolé trubɛnu é dan go lɛ ko lee, ko sɔnéwɔlɛ do kpen ’ka dan vo lɛ ko zuo lo; naa, wo nya lé ko dan Gakelebale, kolé Bale bɔ lɛ; yé fɛ lé ko dan a si lɛ a va yé ko a nɔ Gakelebale lɛ, ko ’ka a gi dɔɔa lo fɔɔ ’té ko bɔ é wo ana mi.

²⁷ Gakelebale Faraɔn bli kɛlɛ plɛplɛ, yé Faraɔn ’ka a va léé, é daan wo ma lo.

²⁸ Faraɔn lé Moizi lɛ léé: ’Ka si an va. ’I yuɛ pa ibo va léé, té i da an va é dɛrɛ lo, naa, dé i da an va yian ma, i dan ga lɛ.

²⁹ Moizi léé: Yee lé bé fe bɛ. Maa ’ka dan da lɛ i va é dɛrɛ lo.