Fwile 1 - Kazambale lé Sebe Sauunu 1979

Izraɛl nyané ble Éjipiti tɛrɛ la

¹ Izraɛl benu lé wo go Éjipiti tɛrɛ la, wo tɔ lé ke ’ko. Wo go ’bɛna Jakɔb nya, ’té wo faa do do lé nénu valé wo nanu a wo va.

² Wa Rubɛn koo, Siméɔn koo, Lévi koo, Juda koo,

³ Isakaa koo, Zabulɔn koo, Bɛnjamɛn koo,

⁴ Dan koo, Néfitali koo, Gad koo, Azɛɛ koo, wo nya.

⁵ Munu lé wo si Jakɔb gi, wo faa ’léé a yɔ yaa wɔlɛ vu. ’Té Jozɛfu a é kyɛn Éjipiti tɛrɛ la.

⁶ Jozɛfu koo, a bwenu koo, ’bɛ bléyi va munu faa koo, wo ga.

⁷ Izraɛl lé nénu a néyaamunu nya, yé wo kɛlɛ kiɛre, yé wo ’léé gi gyɛ yé wolé plɛplɛ taa vo zénna a va. Yé wo fan tɛrɛ ’ko la.

⁸ Minwiinzan dɛrɛ do nwa Éjipiti tɛrɛ la yé ’bɛ ’ka Jozɛfu dɔɔa lo.

⁹ É lé élé munu lɛ léé: Ka yua, Izraɛl lé nénu a kɛlɛna kiɛre wo mini ko ta, ’té wo plɛplɛ mini ko ta.

¹⁰ Kaa go, kaa gikiniwe kɛlɛ wo vazia; kaa wo ’léé gi gyɛle yi ga, dé guli é da da yé wo péli vɔ ko nyanézannu va gulidanle ko va we ma yé wo ko bin tɛrɛ ’ko la.

¹¹ Yé wo nyanagɔɔnzannu dɔ wo zuo, glanyanama tɔntɔn nɔle wo lɛ we ma. ’Bɛ zo lé wo Pitom valé Ramzɛs pa, Faraɔn lé fɛtadɔ?-?flanu nya.

¹² Naa, dé wo nyanama tɔntɔn nɔ wo lɛ, ’bɛ kɛlɛ wo ’léé gi?-?gyɛwe valé wo fanwe nya; yé Éjipiti léa bo Izraɛl lé nénu ma.

¹³ Yé Éjipiti munu Izraɛl lé nénu zun fɔɔ yé wo kɛlɛ nyanama tɔntɔn pazannu nya.

¹⁴ Wo wolé tɛrɛla lɔrɔ nyaa wo ma, bɔtɛrɛ valé briki lé nyanama tɔntɔn nya, ’bɛ valé féi nyanama faa nya; yé wo nyanama ’konu faa nɔ wo lɛ ’wo gi pɔnpɔn nya.

¹⁵ Éjipiti mununwiinzan blɛn we fe é ziin Ébru munu lé dɔtrɔlomu lɛ; wa do laama Sifra, yé wa koɛ laama Pua.

¹⁶ É lé wo lɛ léé: Dé Ébru lomu vɔ lu zi yé ka ye léé, wa né yaana, dé gɔné lé, ’ka a gyɛ; dé le lé, ’ka a vo é yuɛma.

¹⁷ Naa, dɔtrɔlomu kana Kazambale lee yé wo ’ka Éjipiti mununwiinzan blɛn lɛdɔ lɛ a ma lo; wo nénu vo é yuɛma.

¹⁸ Éjipiti mununwiinzan blɛn dɔtrɔlomu laa yé é lé wo lɛ léé: Mɛmalé ka kɛlɛ ’bɛ zo yé ka nénu vo é yuɛmaa?

¹⁹ Dɔtrɔlomu a zi pa Faraɔn lɛ léé: Ébru lomu ’ka bélé Éjipiti lomu zo lo, ’bɛzama; wa le blila plɛplɛnu nya yé wo né yaan faa yé dɔtrɔle é da.

²⁰ Kazambale wezin kɛlɛ dɔtrɔlomu lɛ; yé munu ’léé gi gyɛ yé wo kɛlɛ kiɛre é baba.

²¹ Dɔtrɔlomu kana Kazambale lee, amalé Kazambale wolé kɔn gi munu drɔɔ vo.

²² Yé Faraɔn élé munu faa bélidɔ léé: Dé wo né yaa gɔné nya, ’ka a vuli yuu va, yé ’ka nélomu faa vo é yuɛma.