Filip munu 4 - Kazambale lé Sebe Sauunu 1979

Ka gi ’é nana Mizan gi

¹ Bɛwemalé, an sɔlɛbwenu, ka lé ka lɔrɔ ke an gyɛna, ka lé ka an gi nanaan, ka lé ka ke anlé tɔkoro nya, an blibɔmazannu, ’ka dɔ gligli Mizan gi.

² An we pla Évodi valé Sɛntik lɛ léé, wolé zanté, ’wo vo ékeva do Mizan gi ma.

³ Yé bii é ziin, an bɔluzan yarapawelazan, iin, ilé zanté, naa, lomu lé wo pa an va Wenéné fele lé guli danna bɛ, wo valé Kléman koo, an va nyanama pa béé bɛnu lé wo tɔ ke é gyɛle mi bélilenu tɔ gyɛlasɛbɛ gi koo, ’i bɔ wo va.

⁴ Ka gi ’é nana yifaama Mizan gi; Maa a taa fé léé, ka gi ’é nana ma.

⁵ Munu faa ’é ka dɔɔ bli drɔɔzannu nya ma. Mizan bɔ é pu.

⁶ Té ka we do kpen gi bɔrɔ pa lo, naa, we faa gi, ’ka ka mawenu fe Kazambale lɛ bazorole koo, zanté vɔlenu koo, bɔvɔlenu koo, wo nya.

⁷ Yé Kazambale lé vole drɔɔ lé, kalé bɔn‐in bɔrɔlenu ’ka sɔa a gi ’male lɛ lo, é dan ka bli valé kalé gibɔrɔlenu tabin lɛ ka kɛlɛle Jézu Krist gi we ma.

Krétiɛnnu lé bɔn‐in bɔrɔmawenu

⁸ Bwenu, a nyaala lé é ke ’ko: we?-?bozennu faa koo, wenu lé wa lɛdɔama koo, we tegelenu faa koo, we wéiinnu faa koo, we sɔkenu faa koo, wenu faa lé wo tɔbɔ yara lé koo, we nénénu faa koo, wenu faa lé wo tɔ zin fe yara lé koo, wo ɛ kɛlɛ ka ’wuogibɔrɔmawenu nya ma.

⁹ We lé maa a paa ka gi koo, we lé ka a ye an va koo, we lé ka a ’ma an ’léé koo, we lé ka an ye a kɛlɛna koo, ’ka wo ta tawo ma. Yé mi vo drɔɔ Bale é dan kɛlɛ lɛ ka va.

Pɔl wo bɔ vɔ wolé blɛ lé we ma

¹⁰ Sin, é voéla ’ko, maa a ye léé, an sele dɔ ka gi, amalé an gi éé nanaan Mizan gi é baba. É vinin an sele a ka gi webozen nya, naa, ka ’ka zi ye lɛ léé, ka blɛ kɛlɛ an lɛ lo.

¹¹ Maa ’ka we ’ko fena an mawenu lé we ma lo, naa, dé maa a bɛobɛan gi, ’bɛ anzé bɔ.

¹² An ke aan wo ’ko, an nyanéblele gi dɔɔ; yé an fuablele gi dɔɔ. Dé blefɛ a an leeoo, dé lɔrɔ a an gyɛnaoo, dé anlé fɛ anzé bɔa yé a ke é vooo, dé é ’ka anzé bɔa looo, ’bɛ sɔ an lɛ bɛ faa ma, fɛfaana.

¹³ Krist lé é an dɔ plɛplɛ, an bɔa we faa kɛlɛle lɛ alé plɛplɛ nya.

¹⁴ Naa, kalé nyanéblele an va a wezin nya duowo.

¹⁵ ’Kaa Filip munu, ka a gi dɔɔ kaboan léé, Wenéné fele pélisiana, bléyian va lé an si Masédɔane, léglizi bɛ do kpen ’ka we lɛ an zi gɔɔli lé wa ye, a nya lo. ’Kaa do kpen ɛ a kɛlɛ.

¹⁶ Naa, fɛnu lé an mawe ke wo gi, ka wo pa an lɛ zia é kwakwa Tɛsalɔnik gɔnɔ fié.

¹⁷ É ka kɛlɛ lɛ léé, maa a blɛnu ginina lo; naa, é sɔ an lɛ léé, ka tɔnɔ ye yé ka gooli ye a ma.

¹⁸ Maa fɛ faa ye; fɛnu a an lee di; anlé fuafɛnu lɛ a é sɔɔle, fɛnu lé ka wo pa Épafrodi lee yé é da wo nya an lɛ, wo nya. Wa bélé lasikɔrɔ gin néné zo, bélé saraka lé Kazambale a banfɛ blé, ’té é sɔ a lɛ bɛ, a zo.

¹⁹ Yé fɛnu faa lé ka mawe ke wo gi, anzé Bale é dan wo nɔ lɛ ka lɛ, alé fuafɛ tɔbɔlenu lé wo ke Jézu Krist gi, wo yɛrama.

²⁰ ’Wo kaa Ti Bale tɔ bɔ lɛɛfaama, té a glɛ é dɔ lo ma. Amɛɛn.

Weale voélazan

²¹ Kazambale lé munu faa lé wo ke Jézu Krist gi, an we wo va. Bwenu lé wo ke an va ’ko, wo we ka va.

²² Kazambale lé munu faa we ka va, yé é ziin, Kazambale lé munu lé wo ke Sézaa lé kɔn gi, wo we ka va é baba.

²³ Mizan Jézu Krist lé zin ’é kɛlɛ ka léli va ma.