Filip munu 3 - Kazambale lé Sebe Sauunu 1979

Kɛlɛle tegele bozen

¹ Yé sin, bwenu, ka gi ’é nana Mizan gi ma. We ’konu duo gyɛle ’ka ’naan an ma lo, yé é a wezin nya kazé nya.

² ’Ka yuɛ pa kabozen va blénnu lé we ma. ’Ka yuɛ pa kabozen va nyanama nyané pazannu lé we ma. ’Ka yuɛ pa kabozen va dabli ganedɔmunu lé we ma.

³ Naa, kaa lé kaa Kazambale bɔa Kazambale Léli nya, ’té kaabo ze vɔa Jézu Krist gi, ’té kaa bli ’ka voo mi kɛlɛwe lɛ monomono lo, kaa ɛ ke ganedɔmunu bozen nya.

⁴ Naa, maa é ziin, é a kɔɔn léé, an bli vo mikɛlɛwe lɛ duowo. Dé mi bɛ bli a mikɛlɛwe lɛoo, anzé mini ’bɛzan zé ta;

⁵ wo an gane dɔ an yi sɔraazan nya; wo an yaa Izraɛl mi nya, Bɛnjamɛn gɔnɔlazan nya, Ébru mi lé wa yaa Ébru mi ma, a nya; dé é a bélidɔwe zé nya, maa a Farizimi nya;

⁶ dé é a fuu dɔle mi ta nya, maa nyané pa léglizigimunu ta; ’té gun ’ka an ma bélidɔwe lé mi kɛlɛle tegele vazia lo.

⁷ Naa, Krist lé we ma, fɛnu lé maa tɔnɔ yé wo ma bɛ, maa wo ye boafɛnu nya.

⁸ Anzan Jézu Krist dɔɔle bozen lé we ma lé an fɛnu faa yé boafɛnu nya. É sɔ an lɛ léé, ’an Krist ye anzé nya yé an kɛlɛ a gi, aléwemalé an bli si fɛnu faa lɛ yé wa an yuɛ gi bélé bli zo.

⁹ Yé dé an kɛlɛ Krist gi, maa ’ka a gi kɛlɛle tegele lé éé sié bélidɔwe va, ’bɛ we ma lo, naa, maa a a gi kɛlɛle tegele lé éé sié blivole Jézu Krist lɛ va, a we ma. Kɛlɛle tegele ’ko, Bale a no blipale ma.

¹⁰ Maa a a va léé, maa Krist dɔɔ, yé plɛplɛ lé é Krist nwa gale va koo, nanale a va alé nyanéblelenu gi koo, maa a wo va. É sɔ an lɛ léé, an ga, bélé fɛan zo lé é ga, a zo,

¹¹ léé, é voéla, an bɔ nwale lɛ gamunu va, ’té dé an bɔalɛ.

Pɔl lé vlanburu we

¹² É ’ka kɛlɛ lɛ léé, maa vlanza kɛlɛle ma ban ye é kwakwa lo; é ’ka kɛlɛ lɛ léé, gun ’ka an ma lo lo, naa, maa a vlanburuna, a ma ban sile gla nya we ma. Maa é ziin, Jézu Krist an si gla nya, azama.

¹³ Bwenu, é ’ka an gi léé, maa a si é kwakwa lo, naa, maa we do kɛla; an gi éé saan an zuowe kyɛnnu faa ma ’té an yara dɔa an ’lɛ zia tegelee,

¹⁴ ’té an vlanburuwo a ’wuoplana zia, a ma ban lé é ke Kazambale lé an laale loru Jézu Krist lé we ma, a yele we gi.

¹⁵ Bɛwemalé, kaa faa lé kaa ke é tinle Kazambale lé we gi, bɔn‐in bɔrɔlenu ’ko zo ’é vo kaa gi ma. Yé dé ka a ka bɔn‐in bɔrɔna we bɛ ma, Kazambale é dan ka bɔn gi kini lɛ ’bɛ we ma é ziin.

¹⁶ Naa, é a lé kaa tawo we faa lé kaa a dɔɔ, a yɛrama.

¹⁷ Bwenu, ’ka kɛlɛ an zuosonazannu nya ma, yé munu lé woo tawoo kolé tawobɛ yɛrama, ’ka wo nagini.

¹⁸ Naa, mi kiɛre a tawona Krist lé yiliblan nyanézannu lé tawobɛ ma; maa wolé we fe ka lɛ gɔnɔ kiɛre, yé maa a a taa fena ka lɛ é ziin yuɛyi sole nya.

¹⁹ Wozé nyaana é dan kɛlɛ lɛ wo sanle nya; wolé Bale lé ke wo bɔn nya, yé we lé é ke yaragyɛwenu nya, a gi lé woo baama; yé tɛrɛlawenu saa ma lé woo bɔn‐in bɔrɔan.

²⁰ Naa, kaazé fla a la gi loru, fɛana lé Mizan Jézu Krist é dan si lɛ, ana. Yé kaa a Jézu dale lɛbɛnna, kaa Siéwegizan nya.

²¹ É dan kaa kɔlɛ ple tavɔɔ lɛ, plɛplɛ lé éé fɛnu faa plaan ’é wuo a nya bɛ, yee plɛplɛ duo nya, yé é kaa kɔlɛ kɛlɛ bélé ézé kɔlɛ bile planplan zo.