Filip munu 2 - Kazambale lé Sebe Sauunu 1979

Krist kɛlɛle kiéné valé a kɛlɛle blɛn

¹ ’Kaa lé ka ke Krist gi, é ka tɔrɔ paa? Sɔlɛle ka fuu dɔ ka taa? Ka a é nanale Bale Léli nyaa? Ka a miwe ’namazannu valé nyanaizénzannu nyaa? Dé ka we ’konu yé Krist gi,

² kalé zanté, ’ka anlé ginanale lɛ sɔɔ ’ko zo: ka gibɔrɔle ’é kɛlɛ do; ’ka sɔ ka ke lɛ; ka bli ’é kɛlɛ do. Kalé blibɔmawe ’é kɛlɛ do.

³ Té ka we do kpen kɛlɛ zakɛlɛle valé kabozen ze vɔle nya lo, naa, ’kabo kɛlɛ kiéné yé ’ka mi bɛnu ye blɛn é mini kabozen ta.

⁴ Ka faa do do, té ka ka bɔn‐in bɔrɔ kabo saa lé zin yele ma lo; ’ka bɔn‐in bɔrɔ é ziin ka bɔlunu zé yele ma.

⁵ Bli lé é ke Jézu Krist gi, ’é kɛlɛ ka gi ma.

⁶ É ’ka ’yee valé Bale bɔle ékema ye lɛ é blibɔmawe nya lo, dɔlé ’té yee ɛ ke Kazambale dɔbɛ gi a pélisia bléyi va.

⁷ Naa, é ’élé fua si é ta, yé é wɔra mi wuozan dɔbɛ gi yé é kɛlɛ bélé mi zo.

⁸ Yé é ’ébozen kɛlɛ blami nya, yé é ’ébozen kɛlɛ kiéné, yé é kɛlɛ lɛdɔ?-?mazan nya fɔɔ yé é ga, yé é dunuzén?-?mita ga wo yiliblan ta.

⁹ Bɛwemalé Kazambale a nwa é ziin minwiinzan blɛɛn bozen nya, yé tɔ lé é ke é plale tɔ faa nwiin, é a nɔ a lɛ,

¹⁰ léé, lagi koo, tɛrɛla koo, tɛrɛ wuo koo, munu faa ’wo powuo zun wona Jézu tɔ nya,

¹¹ ’té nɛnɛ faa a fé léé, Jézu Krist a Mizan nya, Tibale tɔ bɔle we ma.

Krétiɛnnu a bélé kyɛbɔ zo tɛrɛ la

¹² An blibɔmamunu, ka an lɛdɔama yifaama fɛan zo é vinin bɛ, sin, é a lé ka nyanama pa ka bɔle ka sile we gi ’wuoplana we ma, kanale valé manyɔɔnle nya. Té ka a kɛlɛ an yuɛ va saawo lo; naa, sin, bléyian va lé maa ’ka ka va lo, kalé a kɛlɛle gi ’é gyɛ ma.

¹³ Naa, Kazambale a nyanama pana ka gi, é bɔn‐in danwe lɛsɔɔle we ma; éé ka gya a lɔrɔ nya yé éé a lɛsɔɔ plɛplɛ no ka lɛ.

¹⁴ Ka kɛlɛwenu faa gi, ’ka paa gun?-?gyɛle valé zavɔle ma,

¹⁵ ka kɛlɛle wéiin valé sauun we ma, ’té woo ka yé Kazambale lé nénu lé, gun ’ka wo ma lo, wo nya, bléyi ’ko vamunu naané vɔnle méléna, ’té ka bié tɛrɛ la gunutinu va bélé sonakyɛ zo, ’té ka mibélidére fé munu lɛ.

¹⁶ A zo lé Krist lé yi la, an gi é dan nana lɛ kalé we ma léé, maa ’ka vlan buru lɛ é pla lo, yé an ’ka nyanama pa lɛ é pla lo.

¹⁷ Dé wo kalé blipale nɔ Kazambale lɛ bélé saraka zo, dé a ta’yi kɛlɛ an nyɛ nyaoo, ’bɛ an gi nanaan, yé kaa faa gi ’é nana ékeva.

¹⁸ Ka é ziin, ka gi ’é nana ma, yé kaa gi ’é nana ékeva ma.

Timoté valé Épafrodi lé we

¹⁹ An bli a a lɛ léé, an dan Timoté pa lɛ ka lɛ zia é kele, ’té dé Mizan Jézu a nyi si. Dé an ka tawe ’ma, é dan an fuu dɔ lɛ an ta.

²⁰ Naa, mian a bli ke an bli zo, ’té kalé we ke blɛn a bli gi bɛ, dé é ’ka Timoté nya lo, a bɛ ’ka lo.

²¹ Munu faa a ’wobozen lé tɔnɔ naginina, wo ’ka Jézu Krist zé ginina lo.

²² Wo Timoté gi dan fɛan zo bɛ, ka a gi dɔɔ. Wenéné gi gyɛle we ma é nyanama pa an va bélé fɛan zo lé mi be éé nyanama paan é ti va, a zo.

²³ Anlé we é dan kɛlɛ lɛ fɛan zo bɛ, dé an ’bɛ ye faa, an bli a a lɛ léé, maa yee Timoté pa ka lɛ zia,

²⁴ yé é dɔ an gi léé, maabozen é dan go lɛ ka va é kele, ’té dé Mizan a nyi si.

²⁵ É dɔ an gi léé, é a lé maa an zuané Épafrodi pa ka lɛ zia. É a anlé nyanama pa béé nya, anlé gulidan béé nya; mian ka a pa an lɛ zia, fɛnu lé an mawe ke wo gi, wo nya é lee bɛ, yee lé.

²⁶ Ka yelɔrɔ a a gyɛna é baba, yé a bli kyɛ dɔ léé, ka a tawe ’ma léé, gyɛ a a ma.

²⁷ É gyɛ kɛlɛ webozen nya, fɔɔ yé é vo sɛ yé é ga; naa, Kazambale nyanai zén a ta. A ta saa‐an é nyanai zén lo; é nyanai zén an ta é ziin, té an bli gi kyɛ é dɔ é ke ta gɔnɔ fié lo we ma.

²⁸ Bɛwemalé maa a pa ka lɛ zia an bli faa nya léé, ka gi ’é nana a yele é ziin we ma, é valé maabozen bli gi kyɛ ke sile we gi.

²⁹ ’Ka a si kalé bɛn nya Mizan gi, gi nanale bozen nya, yé ’ka ’bɛ zo munu lɛdɔma.

³⁰ Naa, Krist lé nyanama lé we ma lé é vo sɛ yé é ga. Dé é kɛlɛ léé, ka ana, an mawenu lé kanɔ a kɛla, é bli si élé tɛrɛla lɛ, yé é wo kɛlɛ.