Filip munu 1 - Kazambale lé Sebe Sauunu 1979

Weale lé

¹ ’Kaa Kazambale lé munu faa lé ke Jézu Krist gi Filip, é valé léglizi tabinzannu koo, léglizigimunu wuozannu koo, ko we ka va. Maa Pɔl valé Timoté, Jézu Krist wuozannu, ko ɛ ke sɛbɛ ’ko gyɛna ka lɛ.

² Kaa Ti Bale valé Mizan Jézu Krist ’wo zin kɛlɛ ka lɛ yé ’wo ka vo drɔɔ ma.

Wenu lé Pɔl a laan Bale lee wozé nya

³ Dé ka sele dɔ an gi béli vu, maa anzé Bale bɔ vɔa kalé we ma.

^4-5 É sia yian nya lé ka Wenéné ’ma é vinin fɔɔ kyɔ, ka bɔ ko va Kazambale lé Wenéné nwɛɛnna. Amalé, dé maa a bazorona ka faa tɔ ma, an bazoroan yifaama gi nanale nya.

⁶ Mian é kun nyanama zin pale ma ka gi bɛ, é dan go lɛ a lɛsɔɔle nya fɔɔ yé Jézu Krist lé yi é bɔ, maa a é pale ’bɛ ta.

⁷ An pale a ta yara lé; ka sɔ an lɛ, dé maa a bokɔngi gɔgɔbale nya an maoo, dé an lɔlu dɔ Wenéné gi plɛplɛoo, dé maa a Wenéné suni wɔranaoo, zin lé Bale a kɛlɛ an lɛ nyanama ’konu pale nya, yee zin duo lé Bale a kɛlɛ ka lɛ, amalé an pale a ta yara lé.

⁸ Naa, Kazambale a anlé wenayezan nya léé, an bli a é bɔle ka faa ma bélé Jézu Krist bli bɔle ka ma zo.

⁹ Yé wean maa a ma laan kazé nya, yee lé é ke léé, kalé sɔlɛle gi ’é go gyɛle nya, wedɔɔle valé gikinile gɔnɔ faa nya,

¹⁰ léé, ’ka we va sile dɔɔ. A zo lé dé Krist lé yi bɔ ka dan kɛlɛ lɛ sauun valé wéiin,

¹¹ yé we tegele kɛlɛle ma tɔnɔ lé éé sié Jézu Krist va, yé kazé ’é kɛlɛ kiɛre, Kazambale tɔ bɔle valé a tɔ zin fele we ma.

Krist a anlé vole é yuɛma nya

¹² Bwenu, é sɔ an lɛ léé, ka a gi dɔɔ léé, we lé é bɔ an ma, é Wenéné gi gyɛ webozen nya.

¹³ Sézaa lé kɔn ta bin sunyanu faa a gi dɔɔ léé, Krist lé we ma lé an ke bokɔngizan nya. Yé flamunu ’bɛ gi dɔɔ é ziin.

¹⁴ Yé bwenu va mi kiɛre fuu dɔ wo ta Mizan gi yé wo bli ta dɔ plɛplɛ é baba anlé gɔgɔbale lé we ma, ’té woo Bale dére fé, ’té kana ’ka wo gi lo.

¹⁵ Webozen lé, mi kenu éé Krist lé we fé maawobli valé zakɛlɛbli nya, naa, mi kenu a fé é ziin bli zin nya.

¹⁶ Blizinmunu a fé an va sɔlɛle we ma; wa gi dɔɔ léé, Kazambale an lɔlu dɔ plɛplɛ Wenéné fele gi.

¹⁷ Naa, zakɛlɛmunu woo Krist lé we fé zakɛlɛbli nya, wo ’ka a fé wo bli tegele nya lo, naa, é sɔ wo lɛ léé, wo an fuu si an ta.

¹⁸ ’Bɛ éé mɛ we kɛla an lɛɛ? Woo Krist lé we fé bɛ faa ma; dé wa fé zakɛlɛbli nyaoo, dé wa fé ’wo bli tegele nyaoo, woo Krist lé we fé duowo, yé an gi éé nanaan ’bɛ ma. Yé an gi a nanana we do ma é ziin.

¹⁹ Yee lé ke léé, ka a bazorona anlé we ma, ’té Jézu Krist Léli éé bɔa an va, amalé maa a gi dɔɔ léé, we ’ko lɛ é dan sɔɔ lɛ an sile we gi nya.

²⁰ A zo lé wean an bli ke a lɛ, ’té maa a é pale a ta é baba bɛ, a lɛ é dan sɔɔ lɛ. Yee lé ke lé, té yara an gyɛ we do kpen ma lo. Naa, an dan Krist tɔ bɔ lɛ an kɔlɛ nya bli ta plɛplɛ nya, dé an vo é yuɛmaoo, dé an gaoo, maa dan a tɔ bɔ lɛ an kɔlɛ nya bélé fɛan zo lé maa a kɛla yifaama, a zo.

²¹ Naa, Krist a anlé vole é yuɛma nya, yé ga a anlé tɔnɔyémafɛ nya.

²² Naa, anlé nyanama ’ko gigyɛle we ma, dé an vo an kɔlɛ gi é yuɛma, dé ’bɛ a é zimaa? Dé a kyɛnzan lé maa sié a vaa? Maa ’ka a gi dɔɔa lo.

²³ An bli a bɛ fié la. É sɔ an lɛ léé, ’an go yé an kɛlɛ Krist va. ’Bɛ fila vɔ é baba.

²⁴ Naa, kazé we ma, é a lé an vo an kɔlɛ gi.

²⁵ An gi dan tirilii, yé maa a ma kunna ye, yé maa a gi dɔɔ léé, maa dan vo lɛ ana, yé an kɛlɛ ka faa va, léé, an bɔ ka va yé ka bɔ baa Bale lé we gi, ’té ka gi éé nanaan.

²⁶ ’Bɛ zo lé, dé an go ka va é ziin, yé ka dan kabo zevɔmawe ye lɛ é ziin anlé we ma, Jézu Krist zama.

²⁷ Naa, munu lé wo bli ke Krist lé Wenéné lɛ, é a lé wo tawo fɛan zo bɛ, ’ka tawo ’bɛ zo léé, dé an da ka vaoo, dé an ’ka da lɛ ka va looo, yé maa ka tawe ’ma léé, ka a é dɔle gligli bli do nya, ’té blipale lé éé sié Wenéné va bɛ, ’té ka a ta guli daan bli do nya,

²⁸ ’té di ’ka kinié ka gi ka nyanézannu lé we ma monomono lo. We ’ko, Bale a nɔ tɔmase nya ka nyanézannu lɛ léé, wa é sanle; naa, é a tɔmase nya léé, ka a é sile we gi.

²⁹ Naa, Bale blɛ kɛlɛ ka lɛ Krist pli zi, léé, ka bli ’é vo Krist lɛ, yé ’bɛ saa kaan lo; ’bɛ ta loru, é blɛ kɛlɛ ka lɛ léé, ka nyané ble Krist lé we ma.

³⁰ Guli lé ka an ye a danna yé ka a ’ma léé, maa a yee guli duo danna duowo, ka é ziin, ka a yee guli duo danna.