Ezidras 9 - Kazambale lé Sebe Sauunu 1979

Ezidras dɔ bɛnlomu sile ma

¹ We ’ko nyaale zuo, minwiinzannu da an va yé wo léé: Izraɛlnu koo, Balebanzannu koo, Lévinu koo, wo ’ka wo kan kini lɛ tɛrɛ ’ko la munu ma lo, yé wa wolé bozowe zuo sonana. Kanaannu koo, Étinu koo, Férézinu koo, Jébusinu koo, Amɔnnu koo, Moabnu koo, Éjipitinu koo, Amorénu koo, wa wolé bozowenu zuo sonana.

² Naa, wo koo, wo benu koo, wo wolé lomu si ’wo nanu nya, yé wo bɛn sauunnu vɔɔ tɛrɛ ’ko la munu nya, yé minwiinzannu valé we ’wuo?-?dɔzannu, wo kɛlɛ wenyané ’ko kɛlɛzan vininnu nya.

³ Maa we ’ko ’ma aan wo, maa anlé sɔnu valé anlé varɔ blɛn fia; maa an nwinnu valé an puomagunnu soowɔla, an nyana, yé tɛrɛla lɔrɔ nyaa an ma.

⁴ Yé munu faa lé wo ma éé nyɔɔn‐an Izraɛl lé Bale dére lee luugimunu lé wenyané ma, wo zén ékeva an punma; yé maa, yé an vo é nyanale, yé tɛrɛla lɔrɔ nyaa an ma, fɔɔ yé nyanadi saraka bobléyi bɔ.

⁵ Nyanadi saraka bobléyi va tɔɔn, an daan anlé bli kyɛ dɔle ma, ’té anlé sɔnu valé anlé varɔ blɛn a é fiale, yé an zun an powuo la, yé an bɛnu soi Gakelebale anlé Bale vazia,

⁶ yé maa léé: Anlé Bale, an gi blin an ma, yé oo, anlé Bale, yara an gya an yara nwale i vazia we ma; naa, kolé weplenu fan ko nwiin, yé ko nwiinwenu nwa fɔɔ la gi.

⁷ É sia ko tranu bléyi va, ko a weanwiinzan blɛnnu nya, fɔɔ yé é bɔ kyɔ, yé kolé weplenu lé we ma lé i ko pa minwiinzan blɛn bɛnu lee, yé wo ko gyɛ gwɔun nya, yé wo kolé fɛnu sia gla nya, yé wo go ko nya luu gi yé yara a ko ’wuo ma fɔɔ kyɔ, ko nwiinzannu valé kolé Balebanzannu koo, ko faa lé.

⁸ Naa, duowo, Gakelebale kolé Bale zin kɛlɛ ko lɛ yé ko va mi kenu si luu gi yé é yɔɔna nɔ ko lɛ élé fɛna sauun na, ko yuɛ fuole we gi yé é vole é yuɛma ke nɔ ko lɛ kolé luubale gi.

⁹ Ko a luunu nya, naa, duowo Bale ’ka daan lɛ ko ma kolé luubale gi lo. É ko kɛlɛ mi zinnu nya Pɛɛs minwiinzan blɛnnu yuɛ gi, ko vole é yuɛma we ma, léé, ko kolé Bale lé kɔn dɔ é ’bin ta, yé ko yɔɔna ’é kɛlɛ Juda valé Jérusalɛm nya.

¹⁰ Sin, oo kolé Bale, ko dan fe lɛ ’bɛ zuo nɔɔ? Naa, ko sɔn vɔ ilé bélidɔwenu ma,

¹¹ ’té bii a nɔ ko lɛ i wuozannu balelayezannu nya, a fele nya léé: Tɛrɛ lé ka dan go lɛ a ta, a kɛlɛle kazé nya we ma bɛ, munu a tiri dɔ we tiridɔlenu nya, é sia a glɛ do ma yé é bɔ a glɛ koɛ ma, wa fan bozowenu valé wolé we tiridɔlenu kɛlɛle nya.

¹² Amalé, té ka lunu nɔ wo benu lɛ lo, yé té ka wo lunu si ka benu nanu nya lo, yé té ka wolé fuablele valé we zin yele gi bɔrɔ pa monomono lo. ’Bɛ zo lé ka dan kɛlɛ lɛ plɛplɛ; ka dan tɛrɛ ’ko la nyɔnɔfɛnu ble lɛ, yé ka zara é dan vo lɛ ka benu zé nya lɛɛfaama.

¹³ Wenu lé wo bɔ ko ma, ko kɛlɛwe naanénu valé ko saanle blɛnnu lé we ma, oo kolé Bale, i ’ka we lɛdɔ lɛ ko gi ko kɛlɛwe ple yɛrama lo, yé sin, i ko luugimunu ke vo é yuɛma.

¹⁴ Mɛmalé sin ko dan ilé bélidɔwenu sɛrɛ lɛ yé ko péli vɔ bozowe kɛlɛmunu ’konu vaa? Ilé bliflile ’ka dan nwa lɛ ko ma fɔɔ yé é ko sɛrɛ tata, ’té kolé mi do kpen ’ka dan vo lɛ lo loo?

¹⁵ Gakelebale, Izraɛl lé Bale, i a tegele; ko a kyɔ luugimunu pɔnénu nya. Ko a i ’lɛ ’ko wegyɛmunu nya; ko dan vo lɛ é yuɛma i ’lɛ kaa?