Ezidras 8 - Kazambale lé Sebe Sauunu 1979

Ezidras vamunu

¹ Munu lé wo si Babilɔn yé ko go wo nya minwiinzan blɛn Aatazɛɛsɛ plale mi nwiin bléyi va, wo gɔnɔlamunu zilɛzannu valé wo kulunu lé ke ’ko:

^2-3 Finé kulunu va, Gɛɛsɔn lé; Itamaa kulunu va, Daniɛl lé; David kulunu va, Sékania be Atus lé; Paréɔs kulunu va, Zakari lé; ’té gɔné yɔ sɔrafié wɔlɛ vu lé wo wo tɔ gyɛ tɔgyɛlasɛbɛ ta, wa ’bɛ va;

⁴ Pasat‐Moab kulunu va, Zéraja be Eljoénai lé; ’té gɔné wuru do a ’bɛ va;

⁵ Sékania kulunu va, Jakaziɛl be lé, ’té gɔné wuru do yɔ soru a ’bɛ va;

⁶ Adɛn kulunu va, Jonatan be Ébɛd lé, ’té gɔné yɔ fié wɔlɛ vu a ’bɛ va;

⁷ Élam kulunu va, Atalia be Ézai lé, ’té gɔné yɔ yaa wɔlɛ vu a ’bɛ va;

⁸ Séfatia kulunu va, Mikaɛl be Zébadia lé, ’té gɔné yɔ ziɛn a ’bɛ va;

⁹ Joab kulunu va, Jééiɛl be Abudias lé, ’té gɔné wuru do é ta lé gɔné vu ta sɔraa a ’bɛ va;

¹⁰ Sélomit kulunu va, Jozifia be lé, ’té gɔné yɔ sɔraa a ’bɛ va;

¹¹ Bébai benu va, Bébai be Zakari lé, ’té gɔné yɔ do wɔlɛ sɔraa a ’bɛ va.

¹² Azgad kulunu va, Akatan be Jokanan, ’té gɔné yɔ soru wɔlɛ vu a ’bɛ va;

¹³ a voélazannu lé ke Adonikam kulunu nya, wo tɔnu lé ke ’ko: Élifélɛt koo, Jéiɛl koo, Sémaéja koo, woo lé, ’té gɔné yɔ yaa a wo va;

¹⁴ Bigivai kulunu va, Utai valé Zabud lé, ’té gɔné yɔ yaa wɔlɛ vu a wo va.

¹⁵ Maa wo zén ékeva yuu lé éé yoroan Aava vazia, a sɔnɔ, yé ko yii ’bɛna bɛ yaa. An yuɛ vɔ munu valé Balebanzannu va, yé an ’ka Lévi kululazan do kpen ye lɛ wo va lo.

¹⁶ Yé an minwiinzannu laa: Éliézɛɛ koo, Ariɛl koo, Sémaéja koo, Elnatan koo, Jarib koo, Elnatan koo, Natan koo, Zakari koo, Mésulam koo, Jojarib valé Elnatan, ’té wo ke bélidɔwe?-?dɔɔzannu nya koo, woo lé.

¹⁷ Maa wo pa zia minwiinzan Ido va, ’té éé nyanaan Kazifia, yé maa we pa wo ’léé léé, ’wa fe Ido valé é bwenu lé ke Bale lé kɔn gi nyanamapazannu nya, ’té wo ke Kazifia, wo lɛ léé, ’wo da nyanamapamunu nya ko lɛ, kolé Bale lé kɔn lé we ma.

¹⁸ Yé kolé Bale bɛ zin ke aan wo é pale ko ta, wo da Izraɛl be Lévi be Makli be Sérébia lé, a ’wuo ke a ta, a nya; ’té a benu valé a bwenu a a va; wa mi vu ta sɔraa;

¹⁹ é ziin, Asabia koo, a bwenu valé wo benu koo, wo ’léé a yɔ do, ’té Mérari kululazan Ézai a wo va;

²⁰ yé munu lé David valé minwiinzannu a bɛ pa Lévinu lee, léé, ’wo Bale lé kɔn gi nyanama pa, wo ’léé a wuru do yɔ do, ’té wo wo faa laama wo tɔ ma do do.

Wo lɔrɔ sɔn yé wo bazoro zi siale ’lɛ

²¹ Aava yuu sɔnɔ bɛ, an mibo kɛlɛ kiéné lɔrɔsɔnle zana dɔɔ kolé Bale ’lɛ, léé, ko zanté vɔ a lɛ léé, ’é bɛ zin pa ko ta kolé tawole gi, ko koo, kolé nénu koo, fɛnu faa lé wo ke ko lee koo, ko ta.

²² Ko a fe kɔɔn minwiinzan blɛn lɛ léé, Bale bɛ zin a é pale munu faa lé wa naginian, wo ta, we zin kɛlɛle wo lɛ we ma, naa, alé plɛplɛ valé alé bliflile a munu faa lé wo sɔn vɔ a ma, wo ma. Aléwemalé yara an gyɛ ganelasunyanu valé wisootasunyanu laale ma minwiinzan blɛn lee, léé, ’wo ko tabin ko nyanézannu lee zia.

²³ Bɛwemalé ko lɔrɔ sɔn yé ko kolé Bale tɔ laa. Yé é ko dére ’ma.

²⁴ Maa Balebanzannu segelenu si vu ta fié, Sérébia koo, Asabia koo, wo bwenu vu koo, woo lé.

²⁵ Minwiinzan blɛn koo, a bɛgizannu koo, alé mi segelenu koo, fɛnu lé wa nɔ blɛ nya kolé Bale lé kɔn lé we ma, gɔɔlifu koo, kyan koo, kɔn gi nyanamapafɛnu koo, maa wo dan kilo la Balebanzannu yuɛ va. Fɛnu lé Izraɛlnu a ye, maa wo dan kilo la é ziin,

²⁶ yé maa a faa bɛ pa Balebanzannu lee. Gɔɔlifu a talan wuru yaa yɔ fié wɔlɛ vu; kɔn gi nyanamapafɛnu lé ke gɔɔlifu nya, wa talan yɔ soru; kyan a talan yɔ soru;

²⁷ kyan ’yiminikana a yɔ do, ’té wo vlɛ a dariki gɔɔli wuru soru; kana lé wa foli zéné zima nya yé wo wo ma gɔrɔla, ’té wo we ke bélé kyan zo, wa fié.

²⁸ Yé maa lé yee Balebanzannu lɛ léé: Ka a é pale é yɛrama Gakelebale zé nya; nyanamapafɛnu ’ko, wa é pale é yɛrama Gakelebale zé nya, yé gɔɔlifu ’ko valé kyan ’ko, munu a nɔ Gakelebale, ka tranu lé Bale lɛ woboan.

²⁹ ’Ka yuɛ pa fɛnu ’ko va fɔɔ yé ka bɔ Jérusalɛm yé ka wo dan kilo la Balebanmunu segelenu valé Lévinu koo, Izraɛlnu bɛngɔnɔ nwiinzannu koo, wo yuɛ va Jérusalɛm, Gakelebale lé kɔnmi zi.

³⁰ Gɔɔlifu koo, kyan koo, kɔn gi nyanamapafɛnu koo, ’té maa wo dan kilo la wo yuɛ va bɛ, Balebanmunu valé Lévinu wo si, yé wo go wo nya Jérusalɛm, kolé Bale lé kɔn gi.

Ezidrasnu bɔ Jérusalɛm

³¹ A moné vininzan lé yi vu ta fiézan nya, ko zi sia Aava yuu ma, gole Jérusalɛm we gi. Kolé Bale bɛ zin vo é pale ko ta, yé é ko ta béli dɔ ko nyanézannu nwale ko ma lee, yee valé ko mavɔɔzannu lee, kolé tawole gi.

³² Ko bɔ Jérusalɛm yé ko flin ana yi yaa.

³³ A yi ziɛnzan nya, gɔɔlifu koo, kyan koo, kɔn gi nyanamapafɛnu koo, ko wo dan kilo la kolé Bale lé kɔn gi, yé ko wo nɔ Balebanzan Uri be Mérémɔt lɛ, ’té Finé be Éléazaa koo, Lévinu Jozué be Jozabad valé Binui be Noadia koo, ’té wana a va.

³⁴ Wa faa nɔnɔ yé wa dan kilo la yé wo bɛn ’léé a fɛan zo yé wa faa gyɛ sɛbɛ ta.

³⁵ Munu lé wo si luu gi yé wo da wo pa gi bɛ, winu lé wa kyɛ blé, wa nɔ Izraɛl lé Bale lɛ; dirigɔné vu ta fié a Izraɛl faa zé nya, wo valé ’blagɔné yɔ ziɛn wɔlɛ vu ta suiɛdo koo, ’blanénu yɔ yaa wɔlɛ vu ta sɔrafié koo, boligɔné vu ta fié lé ke wenyané ’yibofɛ nya koo, wa faa nɔ Gakelebale lɛ, winu lé wa kyɛ blé, wo nya.

³⁶ Wo minwiinzan blɛn lé bélidɔwenu fe é bɛgizannu valé gbɔrɔnamanu lé wo ke yuu ma yirivɔnazia, wo lɛ, yé wo bɔ Bale lé munu va yé wo Bale lé kɔn dɔle lɛ sɔɔ.