Ezidras 7 - Kazambale lé Sebe Sauunu 1979

Aatazɛɛsɛ zi nɔ Juifinu lɛ léé, wo go Jérusalɛm

^1-5 We ’konu zuo, Pɛɛs nwiinzan blɛn Aatazɛɛsɛ plale mi nwiin bléyi va, Ezidras da. Balebanmunu ’lɛzan Arɔn be Éléazaa be Finé be Abisua be Buki be Uzi be Zéraja be Mérajɔt be Azaria be Amaria be Akitub be Sadɔk be Salum be Ilkija be Azaria be Séraja be lé Ezidras nya.

⁶ Ezidras ’ko si Babilɔn; é a sɛbɛgifezan do nya, yé bélidɔwe lé Izraɛl lé Bale, Gakelebale a nɔ Moizi lɛ, é a dɔɔ é zima. Gakelebale alé Bale bɛ a a ta, amalé fɛ faa lé é a ma laa, minwiinzan blɛn a nɔ a lɛ.

⁷ Izraɛlnu koo, Balebanzannu koo, Lévinu koo, lɛrɛvɔmunu koo, kɔn ta yuɛpazannu koo, Bale lé kɔn gi nyanamapamunu koo, wo va mi kiɛre da é ziin Jérusalɛm, minwiinzan blɛn Aatazɛɛsɛ plale mi nwiin lɛɛ sɔrafiézan nya.

⁸ Minwiinzan blɛn plale munu nwiin lɛɛ sɔrafiézan lé moné soruzan nya, Ezidras bɔ Jérusalɛm.

⁹ É si Babilɔn moné vininzan lé yi vininzan nya, yé é bɔ Jérusalɛm moné soruzan lé yi vininzan nya; alé Bale bɛ zin a é pale a ta, azama.

¹⁰ Naa, Ezidras Gakelebale lé bélidɔwe draan yé é a ta tawo é bli faa nya, yé é bélidɔwenu valé Bale déretawenu paa Izraɛlnu gi.

¹¹ Minwiinzan blɛn Aatazɛɛsɛ sɛbɛ nɔ Ezidras lɛ; é a Balebanzan valé sɛbɛgifezan nya, ’té éé Gakelebale lé bélidɔwe valé a sɔnnénu paan Izraɛlnu gi. A sɛbɛ gi lé ke ’ko:

¹² Minwiinzan blɛnnu nwiinzan Aatazɛɛsɛ, é sɛbɛ ’ko gyɛ Ezidras, Balebanzan valé sɛbɛgifezan lé ke wedɔɔzan nya lanu lé Bale lé bélidɔwe gi, a lɛ.

¹³ Munu faa lé wo ke Izraɛlnu nya, wolé Balebanzannu koo, wolé Lévinu koo, ’té wo ke anlé tɛrɛ la bɛ, ’té wa a va léé, wo go i va Jérusalɛm, maa zi nɔ wo lɛ léé, ’wo go.

¹⁴ Maa, minwiinzan blɛn valé an bɛgimunu sɔrafié, ko i pa zia Juda valé Jérusalɛm naginile we gi, ilé Bale lé bélidɔwe lé ke i lee, a yɛrama.

¹⁵ Gɔɔlifu valé kyan lé maa minwiinzan blɛn valé an bɛgizannu a nɔ ko bli faa nya Izraɛl lé Bale lé éé nyanaan Jérusalɛm, a lɛ, ’ka goan.

¹⁶ Gɔɔlifu valé kyan faa lé i dan a ye lɛ Babilɔn lé tɛrɛ faa la, fɛnu lé munu valé Balebanzannu a nɔ woboan, wolé Bale lé kɔn lé ke Jérusalɛm, a dɔle we ma, ’ka go ’bɛ nya.

¹⁷ ’Bɛ lé we ma lé dirigɔnénu koo, ’blagɔnénu koo, ’blanénu koo, fɛnu faa lé wo ma we ke wo gi balebanfɛnu valé baleban’yinu nya bɛ, ’i wo lɔ gɔɔli ’ko nya tegele, yé ’i wo pla kalé Bale lé ke Jérusalɛm, alé kɔn gi balebanna ta.

¹⁸ Gɔɔlifu valé kyan lé é vo, fɛ lé é sɔ ka valé i bwenu lɛ léé, ka kɛlɛ wo nya, ’ka a kɛlɛ ma, kalé Bale lé blibɔmale yɛrama.

¹⁹ Nyanamapafɛnu lé maa nɔ ilé Bale lé kɔn gi nyanamapafɛnu nya, ’i wo dɔra Jérusalɛm lé Bale ’lɛ.

²⁰ Gɔɔli lé ka dan we bɛ kɛlɛ lɛ a nya ilé Bale lé kɔn lé we ma, bé si minwiinzan blɛn lé gɔɔlikɔn gi.

²¹ Maa, minwiinzan blɛn Aatazɛɛsɛ, maa lé gɔɔlitadɔzannu faa lé ke yuu zi bɛ, wo lɛ léé: Ezidras, Balebanzan valé sɛbɛgifezan lé ke wedɔɔzan nya lanu lé Bale lé bélidɔwe gi, fɛ faa lé é dan a laa lɛ ka lee,

²² ’ka a nɔ a lɛ, fɔɔ yé é bɔ gɔɔlifu talan yɔ soru koo, buruwɔlɛ vlekyɛɛ nya wuru soru koo, nwɛ litré baa do wuru soru koo, nyɔnɔ litré baa do wuru soru koo, a ma, yé ka wɛ nɔ, é sɔ ka lɛ fɛan zo, a zo.

²³ Wenu faa lé lanu lé Bale a fe élé kɔn lé we ma, a lɛ ’é sɔɔ é kele léé, té a bli é fli tɛrɛ koo, maa, a nwiinzan blɛn koo, an benu koo, ko ma lo.

²⁴ Vagɔɔli koo, fɛnu ta banwo gɔɔli koo, zi banwo gɔɔli koo, té ka a si Balebanzannu koo, Lévinu koo, lɛrɛvɔmunu koo, kɔn ta yuɛpamunu koo, Bale lé kɔn ’ko nyanamapamunu koo, wo va mi do kpen lee lo. Maa ɛ fe ka lɛ.

²⁵ Yé bii, Ezidras, ’i weblezannu valé wewuodɔzannu dɔ, wedɔɔle lé Bale a nɔ i lɛ, a yɛrama, yé munu faa lé wo ke yuu zi, ’wo wolé wenu ble, munu faa lé wo ilé Bale lé bélidɔwenu dɔɔ, wo lé; yé munu lé wo ’ka wo dɔɔa lo, bé paa wo gi.

²⁶ Dé miomian ’ka ilé Bale lé bélidɔwe valé minwiinzan blɛn lé bélidɔwe ta tawo lɛ é nya do lo, ’wa gyɛ, dé ’bɛ kaan lo, ’wa bin, dé ’bɛ kaan lo, ’wo ban dɔ a nwiin, dé ’bɛ kaan lo, ’wa vɔ bokɔn gi. Aatazɛɛsɛ lé sɛbɛ ’wuoplana lé ke bɛ.

²⁷ Gakelebale, ko tranu lé Bale drɔɔ ’é vo ma. Yee ɛ we fe minwiinzan blɛn bli gi léé, Gakelebale lé kɔn lé ke Jérusalɛm, ’é a tɔ kɛlɛ blɛn.

²⁸ Yee ɛ zin kɛlɛ an lɛ yé minwiinzan blɛn koo, a bɛgizannu koo, alé minwiinzan plɛplɛnu faa koo, wo we zin kɛlɛ an lɛ. Anlé Bale Gakelebale bɛ zin lé ke an ta, é an dɔ plɛplɛ, yé maa Izraɛlnu nwiinzannu zén ékeva, léé, ’ko go wo nya.