Ezidras 6 - Kazambale lé Sebe Sauunu 1979

Darius lé bélidɔwe

¹ A zuo minwiinzan blɛn Darius lé é vamunu lɛ léé, ’ka nagini sɛbɛpaikɔn gi, fɛana lé woo Babilɔn fuafɛnu tadɔa, ana.

² Yé wo sɛbɛ plinle do ye Médi fla blɛn Asimɛta ta, yé we sele dɔ migiwe lé wa gyɛ a ta, yee lé ke ’ko:

³ Sirus lé plale mi nwiin lɛɛ vininzan nya, minwiinzan blɛn Sirus lé munu lɛ Bale lé kɔn lé ke Jérusalɛm a mawe nya léé, ’wo kɔn ’ko dɔ é ziin ma, yé ’é kɛlɛ munu lé saraka bona nya, yé wa gane vɔ gligli ma. A nwale ’é kɛlɛ mɛtrɛ yɔ do wɔlɛ vu, yé a ’wuola ’é kɛlɛ mɛtrɛ yɔ do wɔlɛ vu.

⁴ ’Ka gɔlɛ manyaalenu bale dɔ yaa, yé ’ka yili dɛrɛ bale dɔ do. Minwiinzan blɛn é dan a banwo lɛ.

⁵ ’Bɛ ta loru, Bale lé kɔn gi kyan kananu valé gɔɔlifu kananu lé Nébukanɛsaa wo si Balebangikɔn gi Jérusalɛm yé é go wo nya Babilɔn, ’wo wo nɔ é ziin, yé ’wo go wo nya Jérusalɛm Balebangikɔn gi, fɛana lé wo ke é vinin, ana, yé ’wo wo dɔra Bale lé kɔn gi.

⁶ Amalé Darius sɛbɛ gyɛ wo lɛ léé: Sin, yuuzi gbɔrɔnama Tatnai, bii koo, Sétaa‐Boznai koo, ka bɔlunu lé ke Afaasak yuu zi bɛ koo, ’ka munu ’konu vo.

⁷ ’Ka zi nɔ wo lɛ léé, wo yara pa Bale lé kɔn ’ko lé nyanama pale ta; Juifinu lé gbɔrɔnama valé Juifinu segelenu, ’wa bɛ dɔ é dɔna vinin pa gi.

⁸ Dé é a Juifimi segelenu lé wo ke Bale lé kɔn ’ko dɔna, wolé we nya, ’wo gɔɔli si minwiinzan blɛn lé vagɔɔli lé wa banwo yuu zi, ’bɛ gɔɔli va, yé wa nɔ munu ’konu lɛ, gɔɔli lé wa sɛrɛ kɔn dɔle ma, a ’léé yɛrama ’té, té nyanama ’ko payi do é gié é ta lo we ma.

^9-10 Winu lé wa kyɛ blé lanu lé Bale lɛ, ’wa nɔ yi faa do do ma, Jérusalɛm lé Balebanzannu dére nya, té a yi do é gié a ta lo, léé, wo saraka gin nénénu bo lanu lé Bale lɛ yé ’wo bazoro minwiinzan blɛn valé é benu tɔ ma léé, ’wo vo é yuɛma. Fɛnu lé é a lé wa nɔ, wo lé ke ’ko: Diriboronénu koo, ’blagɔnénu valé ’blanénu koo, burupun zima koo, wɛ koo, nwɛ valé nyɔnɔ koo, woo lé.

¹¹ Dé miomian dére ’ko lɛgama, ’wo yili do so alé kɔn va, yé ’wa suru yé ’wa dun a ma, yé ’walé kɔn sɛrɛ yé ’wa kɛlɛ bli vulina nya.

¹² Dé é a minwiinzan blɛn do nyaoo, dé é a bɛn do nyaoo, dé é an dére lɛgama, dé é Bale lé kɔn ’ko sɛrɛ Jérusalɛm Bale lé é tɔ pa fɛkona ma, ’é ’bɛzan gyɛ ma. Maa, Darius, maa we ’ko fe. ’Wa lɛdɔma é kele.

¹³ We lé minwiinzan blɛn Darius a fe wo lɛ, gbɔrɔnama Tatnai lé ke é nyanale yuu zi yirivɔnazia koo, Sétaa‐Boznai koo, wo bɔlunu koo, wa lɛdɔma é kele.

¹⁴ Juifimi segelenu lé kɔn dɔle nyian wo, balelayezan Agajé valé Ido be Zakari lé balelawefele yɛrama; wo kɔn dɔ yé a lɛ sɔɔ, Izraɛl lé Bale koo, Sirus koo, Darius koo, Pɛɛs minwiinzan blɛn Aatazɛɛsɛ koo, wo dére ta.

¹⁵ Kɔn dɔle nyaa moné vu ta fiézan lé wa laama Adaa, alé yi yaazan nya, minwiinzan blɛn Darius plale mi nwiin lɛɛ suiɛdozan nya.

Wo Balebangikɔn pa é yɛrama

¹⁶ Izraɛlnu koo, Balebanzannu valé Lévinu koo, luugimunu pɔnénu koo, wo kɔn ’ko nɔ Bale lɛ ginanale nya.

¹⁷ Kɔn ’ko no Bale lɛ bléyi va, dirigɔné yɔ soru koo, ’blagɔné wuru do koo, ’blané wuru fié koo, wa nɔ; yé wo boligɔné vu ta fié nɔ Izraɛlnu faa lé wenyané ’yibofɛ nya Izraɛl bɛn ’léé yɛrama.

¹⁸ Wo Balebanmunu dɔ wo palu yɛrama palu yɛrama, yé wo Lévinu dɔ wo lɛ ma lɛ ma, Bale lé nyanama pale Jérusalɛm we ma, fɛan zo lé Moizi a gyɛ sɛbɛ gi, a zo.

¹⁹ A moné vininzan lé yi vu ta ziɛnzan nya, luugimunu Taboyi lé fɛti kɛlɛ.

²⁰ Balebanmunu valé Lévinu wobo kɛlɛ tegele bléyi do nya; wo faa wobo kɛlɛ tegele. Wo Taboyi lé trubɛnu gyɛ luugimunu faa koo, wo bwenu Balebanzannu koo, wobozen koo, wolé we ma.

²¹ Izraɛlnu lé wo si luu gi, wo Tabofɛ ble, wo valé munu faa lé wo sɔn vɔ tɛrɛ ’ko la bɛnnu lé weple kɛlɛle ma, yé wo péli vɔ wo va Gakelebale, Izraɛl lé Bale naginile we ma, wo nya.

²² Yi sɔrafié wuo, buru lé lévɛn ’ka a va lo, walé fɛti kɛlɛ yé wo gi nana. Naa, Gakelebale wo fan ginanale nya é baba; é Asirinu nwiinzan blɛn kɛlɛ wo ma é zima, yé é bɔ wo va Izraɛlnu lé Bale lé kɔn dɔ nyanama nya.