Ezidras 5 - Kazambale lé Sebe Sauunu 1979

Wo Balebangikɔn dɔle sia é ziin

¹ Balelayezan Agajé valé balelayezan Ido be Zakari, wo balelawe fe Juifinu lé ke Juda valé Jérusalɛm, wo lɛ, Izraɛl lé Bale tɔ gi.

² Yé Séaltiɛl be Zorobabɛl valé Josadak be Jozué nwa yé wo kun Bale lé kɔn dɔle ma Jérusalɛm. ’Té Bale lé balelayezannu a wo va, ’té ’bɛnu é bɔa wo va.

³ ’Bɛ bléyi duo nya, Tatnai lé ke yuu ma yirivɔnazia lé gbɔrɔnama nya koo, Sétaa‐Boznai koo, wo bɔlunu koo, wo da Juifinu va, yé wo lé wo lɛ léé: De ɛ se kɛlɛ ka lɛ léé, ka kɔn ’ko dɔ, ’té ka a gɔrɔ bo é ziin?

⁴ Yé wo lé wo lɛ é ziin léé, munu lé wa kɔn ’ko dɔna, wo tɔ lé nɔɔ?

⁵ Naa, Bale é yuɛ pa Juifi mi segelenu ta. Yé wo wo vo nyanama ’ko pana, fɔɔ yé wo we ’ko pa Darius lɛ zia sɛbɛ gi, yé ’bɛ a zi pa wo lɛ sɛbɛ gi.

⁶ Tatnai lé ke yuu ma yirivɔnazia gbɔrɔnama nya koo, Sétaa‐Boznai koo, wo bɔlunu lé wo ke é nyanale Afaasak yuu ma yirivɔnazia koo, sɛbɛ lé wa gyɛ minwiinzan blɛn Darius lɛ, yee lé ke ’ko:

⁷ Wo we zuo fe a lɛ léé: Minwiinzan blɛn Darius, ko we i va.

⁸ Bii, minwiinzan blɛn ’é we ’ko dɔɔ ma: ko da Juda tɛrɛ la, Bale blɛn lé kɔn dɔna. Wa dɔna gɔlɛ manyaale nya, yé wa gwa kɛlɛna. Nyanama ’ko a tawona fiéfié, yé a nyian a é wole wo lee.

⁹ Ko we laa mi segelenu lee léé, de ɛ a se kɛlɛ ka lɛ léé, ka kɔn ’ko dɔ yé ka a gɔrɔ boo?

¹⁰ É ziin, ko wo tɔ laa wo lee, léé, ko wo fe i lɛ, yé munu lé wo ke wo nwiinzannu nya, ko wo tɔ gyɛ sɛbɛ ta.

¹¹ Wa zi pa ko lɛ léé: Bale lé ke tɛrɛ valé la kɛlɛzan nya, ko a a wuozannu nya, yé kɔn lé wa dɔ a lɛɛ kiɛre lo, ko a yee ɛ bɛ dɔna é ziin. Kɔn lé Izraɛl minwiinzan blɛn do a dɔ, yee kɔn lé.

¹² Naa, ko tranu Lakɛlɛ?-?zan Bale blifliwe kɛlɛ, yé é wo vo Babilɔn nwiinzan blɛn Nébukanɛsaa, Kaldé mi lee, yé é kɔn ’ko sɛrɛ tata yé é go kolé munu nya luu gi Babilɔn.

¹³ Naa, Babilɔn nwiinzan blɛn Sirus plale mi nwiin lɛɛ vininzan nya, minwiinzan blɛn Sirus a fe kolé munu lɛ léé, ’wo Bale lé kɔn ’ko dɔ é ziin.

¹⁴ Kyan kananu valé gɔɔlifu kananu lé ke Bale lé kɔn gi Jérusalɛm, Nébukanɛsaa a si é kyɛn yé é go wo nya ézé miyili bangikɔn gi Babilɔn. Yé Sirus fɛ ’konu si yé é wo bɛ pa Sɛsibasaa lé é a dɔ gbɔrɔnama nya, a lee,

¹⁵ yé é lé ’bɛ lɛ léé: ’I kana ’konu si, ’i go wo dɔra Jérusalɛm Balebangikɔn gi, yé ’ka Bale lé kɔn dɔ é dɔna vinin pa gi.

¹⁶ Yé Sɛsibasaa ’ko da, yé Bale lé kɔn lé ke Jérusalɛm, é a gane vɔ; é sia ’bɛ bléyi va yé é bɔ kyɔ ma, wa a dɔna, naa, a dɔle ’ka tan nyaa lɛ lo.

¹⁷ Sin, dé é dɔ bii minwiinzan blɛn gi léé, é a é zima, ’i go a nagini Babilɔn nwiinzan blɛn Sirus pai sɛbɛnu gi, dé Sirus a fe léé, wo Bale lé kɔn ’ko dɔ Jérusalɛm weboen nyaa? ’Bɛ zuo, dé wean é sɔ bii minwiinzan blɛn lɛ we ’ko gi, bé zuo fe ko lɛ ma.