Ezidras 4 - Kazambale lé Sebe Sauunu 1979

Nwiinmunu dɔ Balebangikɔn dɔle ma

¹ Juda valé Bɛnjamɛn nyanézannu a ’ma aan wo léé, luugimunu a Gakelebale, Izraɛlnu lé Bale lé kɔn dɔna bɛ,

² wo da Zorobabɛl valé kɔnnwiinzannu va, yé wo lé wo lɛ léé: Kaa faa a dɔ, naa, ko a bélé ka zo; ko kalé Bale tɔ laan turu, yé é sia Asiri nwiinzan blɛn Ézaa‐Adɔn lé é da ko nya ’ko, a bléyi va, ko sarakanu boo yee Bale ɛ lɛ.

³ Naa, Zorobabɛl koo, Jozué koo, Izraɛl lé kɔn ’léézan bɛnu koo, wa zi pa wo lɛ léé: É ’ka lé ka valé konu é kolé Bale lé kɔn dɔ lo; ko dan a dɔ lɛ ko saa, Gakelebale Izraɛl lé Bale lɛ, Pɛɛs nwiinzan blɛn Sirus a fe ko lɛ fɛan zo, a zo.

⁴ Yé ’bɛna tɛrɛlamunu Juda munu fuu si ’wo ta; wo kana vɔ wo gi léé, té ’wo kɔn dɔ lo.

⁵ Wo gɔɔli nɔ we pla milɛzannu lɛ léé, ’wo kɔn dɔle yi ga munu lee. A zo lé wa kɛlɛ Pɛɛs nwiinzan blɛn Sirus lé tɛrɛla faa gi, fɔɔ yé é bɔ Pɛɛs nwiinzan blɛn Darius plale mi nwiin bléyi va.

⁶ Asuérus plale munu nwiin pélisia bléyi va, wo Jérusalɛm munu valé Juda munu ma sɛbɛ gyɛ.

⁷ Aatazɛɛsɛ bléyi va, Bisilam koo, Mitrɛdat koo, Tabéɛl koo, wo bɔluzannu koo, wo sɛbɛ gyɛ Pɛɛs nwiinzan blɛn Aatazɛɛsɛ lɛ. Wo sɛbɛ ’ko gyɛ Aramémunu lé sɛbɛgyɛbɛ yɛrama, Aramé dére gi.

⁸ Gbɔrɔnama Réum valé sɛbɛgyɛzan Simisai, wo sɛbɛ pa minwiinzan blɛn Aatazɛɛsɛ lɛ zia, Jérusalɛm tawe nya. Wo léma:

⁹ Gbɔrɔnama Réum valé sɛbɛgyɛzan Simisai koo, wo bɔlunu a Din munu koo, Aafaasatak munu koo, Taapɛl munu koo, Afaras munu koo, Érɛk munu koo, Babilɔn munu koo, Suz munu koo, Déa munu koo, Élam munu koo, wo nya,

¹⁰ wo valé bɛngɔnɔ bɛnu lé tɔzan blɛn Ɔznapaa da wo nya yé é wo nyana Samari valé yuu ma yirivɔnazia, ana . . . . yé é go a fele nya.

¹¹ Sɛbɛ lé wa gyɛ yé wa pa minwiinzan Aatazɛɛsɛ lɛ zia, wa gyɛ ’ko zo: I wuomunu lé ke yuu ma yirivɔnazia, wo we i va . . . yé é go a fele nya.

¹² Minwiinzan blɛn ’é we ’ko dɔɔ ma: Juifinu lé wo si ka va yé wo bɔ ko va Jérusalɛm, wa fla ple nyané pana é ziin, wa a gane vɔna yé wa zi gɔrɔnu bona é ziin.

¹³ Minwiinzan blɛn ’é we ’ko dɔɔ léé, dé wo fla ’ko pa, dé wa zi gɔrɔ bo, vagɔɔli koo, fɛnu ta banwo gɔɔli koo, zibanwo gɔɔli koo, wo ’ka dan wo banwo lɛ lo, yé minwiinzan blɛn lé gɔɔlipaikɛsu é dan vo lɛ é koro nya.

¹⁴ Ko minwiinzan blɛn leefɛ blé, amalé ko ’ka a a va léé, ko munu ’ko ye wo yuɛ vɔna minwiinzan blɛn zi lo. Bɛwemalé ko we ’konu pa bii minwiinzan blɛn lɛ zia.

¹⁵ Ka we ’ko nagini ka tranu lé weseledɔmigisɛbɛ gi ma. I dan a ye lɛ yé i dan a gi dɔɔ lɛ weseledɔmigisɛbɛ gi léé, fla ’ko a nwamima fla nya, ’té é a é nyané minwiinzan blɛn valé tɛrɛlamunu ma, yé é sia é kyɛn, fla ’ko tamunu woo nwaan ’wo nwiinzannu ma. Amalé wo fla ’ko sɛrɛ tata.

¹⁶ Ko we ’ko fé bii minwiinzan blɛn lɛ léé, dé wo fla ’ko pa é ziin, yé dé wa zi gɔrɔ bo, ilé fɛnu ’ka dan vo lɛ yuu ma yirivɔnazia é dɛrɛ lo.

¹⁷ A zi lé minwiinzan blɛn a pa gbɔrɔnama Réum koo, sɛbɛgyɛzan Simisai koo, wo bɔlunu lé woo nyanaan Samari valé fɛna bɛnu lé ke yuu zi koo, wo lɛ, yee lé ke ’ko: An we ka va . . . yé é go a fele nya.

¹⁸ Sɛbɛ lé ka pa ko lɛ zia, wa ta fe an lɛ tegele.

¹⁹ Maa lé munu lɛ léé, ’wo yee sɛbɛnu gi gini, yé wa ye léé, é sia é kyɛn ma, fla ’ko la munu woo nwaan ’wo nwiinzan blɛnnu ma yé woo dɔa wo ma yé woo péli vɔa wo ma.

²⁰ Minwiinzan blɛn plɛplɛnu kɛlɛ yuu zi, Jérusalɛm, ’té wa é plale tɛrɛ faa nwiin. Vagɔɔli koo, fɛnu ta banwo gɔɔli koo, zibanwo gɔɔli koo, ’té wa no wo lɛ.

²¹ Bɛwemalé, ’i yee fla pale yi ga wo lee, té wo fla ’ko pa lo, fɔɔ ’té maa fe é wo i lɛ.

²² ’Ka yuɛ pa kabozen va léé, té ka vuru a kɛlɛle ma lo. Mɛmalé weple gi éé gya yé minwiinzan blɛnnu é nyané blee?

²³ Sɛbɛ lé minwiinzan Aatazɛɛsɛ a gyɛ, Réum koo, sɛbɛgyɛzan Simisai koo, wo bɔlunu koo, wa ta fe tɔɔn, wo go Jérusalɛm Juifinu va é kele, yé wo wolé fla ’ko pale yi ga gla nya.

²⁴ A zo lé nyanama lé wa pana Bale lé kɔn ma Jérusalɛm, wa yi ga, yé wo ’ka a bɛ péli sia lɛ é ziin lo, fɔɔ, Pɛɛs nwiinzan blɛn Darius plale mi nwiin lɛɛ fiézan bɔ.