Ezidras 3 - Kazambale lé Sebe Sauunu 1979

Wo balebanna dɔ ’é dɔna yé wo Bale lé kɔn gane vɔ é ziin

¹ A moné sɔrafié bɔ ’té Izraɛlnu a wolé flanu la. Yé munu faa zén ékeva do Jérusalɛm.

² Josadak be Jozué valé é bwenu Balebanzannu koo, Séaltiɛl be Zorobabɛl valé é bwenu koo, wo nwa yé wo Izraɛl lé Bale banna kɛlɛ, balebanwi lé wa kyɛ blé, a nɔle ana we ma, wean wa gyɛ Bale lé mi Moizi lé bélidɔwe gi, a yɛrama.

³ Wo balebanna dɔ é dɔna dɔlé ’té wa kanana ’bɛ tɛrɛlamunu lee. Yé wo Gakelebale ban, balebanwi lé wa kyɛ blé, a nya, bladi nyanadi.

⁴ Fɛti lé wa kɛla faa wuo, wo ’bɛ kɛlɛ, wean wa gyɛ sɛbɛ ta, a yɛrama. Balebanwi lé wa kyɛ blé, wa no yi faa do do ma, a ’léé lé wa fe yi faa do do zé nya, a yɛrama.

⁵ ’Bɛ zuo, balebanwi lé wa kyɛ blé, ’té a nɔle ’ka nyaan lo, wo ’bɛ nɔ, yé balebanwi lé wa kyɛ blé moné dɛrɛ bɔrale nya, wo ’bɛ nɔ; yé fɛnu faa lé woo Bale baan wo nya fɛti faa la, yee valé blɛ drɔɔ lé wa kɛla Gakelebale lɛ, wo ’bɛ nɔ.

⁶ A moné sɔrafiézan lé yi vininzan nya wo kun balebanwi lé wa kyɛ blé, a nɔle ma Gakelebale lɛ. Naa, duowo, ’bɛ bléyi va, ’té wo ’ka tan Gakelebale bangikɔn gane vɔ lɛ lo.

⁷ Wo gɔɔli nɔ gɔlɛmanyaamunu valé yilinyaazannu lɛ, yé fɛblele koo, fɛminile koo, nyɔnɔ koo, wa nɔ Sidɔn munu valé Tii munu lɛ léé, ’wo da Liban tɛrɛ la sɛdrɛyilinu nya wɛyi ta fɔɔ Jafo, se lé Pɛɛs munu nwiinzan blɛn Sirus a kɛlɛ wo lɛ, a yɛrama.

⁸ Wo bɔ Bale lé kɔn dɔna na Jérusalɛm, ’bɛ zuo lɛɛ fiézan lé moné fiézan nya, Séaltiɛl be Zorobabɛl koo, Josadak be Jozué koo, wo valé ’wo bwenu pɔnénu lé wo vo, ’té wa Balebanmunu valé Lévinu nya, wo koo, munu faa lé wo si luu gi yé wo da wo pa gi Jérusalɛm koo, wo nyanamapale péli sia. Yé Lévinu lé wo lɛɛ ke yɔ do yé wo lé wozé gié ’bɛ ta, wo wo dɔ Bale lé kɔn dɔ nyanama zilɛzannu nya, léé, ’wo nyanama tagini.

⁹ Yé Jozué valé é benu valé é bwenu koo, Kadimiɛl valé é benu, ’té wo ke Juda munu nya bɛ, wo koo, wo faa ’wo ma’lɛrɛ ékeva kɛlɛle Bale lé kɔn dɔ nyanama zilɛzannu nya we ma; Énadad benu koo, wo benu valé wo bwenu lé ke Lévinu nya, wo koo, wo pa wo va.

¹⁰ Nyanamapazannu a Gakelebale lé kɔn gane vɔna bléyian va, ’té Balebanmunu ana, wolé balebansɔ nya wo ta, wo koo, bélifɛnzannu koo, Lévinu koo, Azafa benu lé kɔanu ke wo lee, ’bɛnu koo, wo faa ana Gakelebale tɔ kɛlɛle blɛn we gi, Izraɛl nwiinzan blɛn David déretawenu yɛrama.

¹¹ Wo lɛrɛ vɔ yé wo Gakelebale tɔ kɛlɛ blɛn yé wa tɔ zin fe dére ’konu nya: Naa, é a é zin; naa, alé nyanai zénle Izraɛlnu ta éé voo ana yifaama. Yé munu faa Gakelebale tɔ kɛlɛ blɛn ginanale lé siaalenu nya léé, wa Gakelebale lé kɔn gane vɔna.

¹² Naa, Balebanmunu kiɛre koo, Lévinu koo, kɔnnwiinzannu kwanu koo, ’té ’bɛnu kɔn vininzan ye bɛ, bléyian va lé wa kɔn dɛrɛ ’ko gane vɔna wo yuɛ va, wo wuvɔ é baba. A lɛ do é ginanale gɔɔn siaale nya,

¹³ amalé wo ’ka ginanadére valé wuvɔdére vasina dɔɔa lo, naa, munu a siaana plɛplɛ yé wo dére bɔ baa, ’bɛzama.