Ezidras 1 - Kazambale lé Sebe Sauunu 1979

Sirus lé Juda munu lɛ léé, ’wo go wolé tɛrɛ la

¹ Sirus pla Pɛɛs munu nwiin lɛɛan nya, Gakelebale a nyunu léé, dére lé Gakelebale a fe Jérémi lɔlu nya, ’é a lɛ sɔɔ. Sirus a zana dɔɔ, ’té é a sɛbɛ paan zia élé tɛrɛ faa la, yé é léé:

² Pɛɛs munu nwiinzan blɛn Sirus léma: Gakelebale, lanu lé Bale tɛrɛ la fuatɛrɛ faa nɔ an lɛ yé é an bélidɔ léé, ’an kɔn dɔ Jérusalɛm, Juda tɛrɛ la.

³ Ka va mi kyɛn ɛ ke alé mi nyaa? Alé Bale ’é kɛlɛ a va ma, yé ’é go Jérusalɛm, Juda tɛrɛ la, yé ’é Izraɛlnu lé Bale, Gakelebale lé kɔn dɔ. Bale lé ke Jérusalɛm, yee lé.

⁴ Gakelebale lé munu lé wo vo, dé wa fɛofɛana, ’bɛna munu ’é fɛ nɔ wo lɛ, gɔɔlifu koo, kyan koo, fɛ bɛnu koo, winu koo, fɛnu lé wa no woboan koo, wo nya, Bale lé kɔn lé wo dan a dɔ lɛ Jérusalɛm, a dɔfɛ nya.

⁵ Juda valé Bɛnjamɛn kulunu nwiinzannu koo, Balebanzannu valé Lévinu koo, munu faa lé Bale wo nyunu koo, wo nwa yé wo go Jérusalɛm, Gakelebale lé kɔn dɔle we ma.

⁶ Wo zimunu faa fɛnu nɔ wo lɛ, gɔɔlifu fɛnu koo, kyan koo, fɛ bɛnu koo, winu koo, fɛwezannu koo, ’é valé fɛnu faa lé wa nɔ woboan koo, woo lé.

⁷ Gakelebale lé kɔn gi nyanamapafɛnu lé Nébukanɛsaa wo si Jérusalɛm yé é wo pla élé bale lé kɔn gi, minwiinzan blɛn Sirus wo nɔ wo lɛ é pa gi.

⁸ Pɛɛs minwiinzan blɛn Sirus wo bɛ pa gɔɔlitadɔzan Mitrɛdat lee, yé ’bɛ wo pa Judanu nwiinzan Sɛsibasaa lee.

⁹ Fɛnu lé wa nɔ bɛ, wo ’léé lé ke ’ko: Kyankana a yɔ do wɔlɛ vu; gɔɔlifukana a wuru soru, sɛnné a yɔ do wɔlɛ sɔraziɛn;

¹⁰ kyan ’yiminikana a yɔ do wɔlɛ vu; gɔɔlifu ’yiminikana a wuru fié é ta lé gɔɔlifukana vu, ’té ’bɛnu dɔbɛ a é yɛrama; kana bɛ a wuru soru; wo lé ke bɛ.

¹¹ Kyanfɛnu valé gɔɔlifufɛnu ’léé a baa fié wuru sɔrafié. Sɛsibasaa wo faa si Babilɔn yé é go wo nya Jérusalɛm, bléyian va lé luugizannu da wo pa gi, ’bɛ bléyi va.