Ézékiɛl 3 - Kazambale lé Sebe Sauunu 1979

¹ É lé an lɛ léé: Blami be, fɛ lé bé yé, bé ble. ’I sɛbɛ plinle ’ko ble, yé ’i go we fe Izraɛlnu lɛ.

² Maa ’léé fuo, yé gɔnézan sɛbɛ plinle ’ko wɔra an ’léé yé maa ble.

³ É lé an lɛ léé: Blami be, sɛbɛ plinle ’ko lé maa a nɔ i lɛ, ’é kɛlɛ fɛblele nya i bɔn gi, yé ’é i bun‐annu fan. Maa a ble, yé é kɛlɛ an ’léé néné bélé zɔrɔnyɔnɔ zo.

⁴ É lé an lɛ léé: Blami be, ’i go Izraɛlnu va, yé ’i an dérenu fe wo lɛ.

⁵ Naa, munu lé wo dére ke tɔntɔn, ’té mi ’ka a maan lo, maa ’ka i pa lɛ zia ’bɛnu va lo; maa i pa zia Izraɛl munu va.

⁶ Munu ’léé kiɛre lé wo dére ke tɔntɔn, ’té mi ’ka a maan lo, maa ’ka i pa lɛ zia ’bɛnu va lo. Dé é kɛlɛ kɔɔn lé maa i pa zia wo va, ’té woo tɔné dɔa i lɛ.

⁷ Naa, Izraɛlnu ’ka a nyi sié léé, wo tɔné dɔ i lɛ lo; wo ’ka a nyi si lɛ léé, wo tɔné dɔ an lɛ lo, azama. Naa, Izraɛlnu faa a yara plɛplɛzannu valé bli plɛplɛzannu nya.

⁸ Bé ye, maa dan i yara kɛlɛ lɛ plɛplɛ, léé, i dɔ wo ’lɛ. Maa dan i kɛlɛ lɛ wemaplɛplɛzan nya yé i dɔ wo yara.

⁹ Maa dan i yara kɛlɛ lɛ plɛplɛ bélé diamangɔlɛ lé a plɛplɛ mini gɔlɛ ta, a zo. Té i kana wo lee lo, dɔlé ’té wa tɔné gi plɛplɛ gɔnɔ nya.

¹⁰ É lé an lɛ léé: Blami be, dérenu faa lé maa dan wo fe lɛ i lɛ, bé ’ma ma, ’é vo i bli gi ma.

¹¹ ’I go luugimunu va, ilé munu Izraɛlnu va. ’I we fe wo lɛ. Yé dé wo ’wo tɔné dɔoo, dé wo ’ka ’wo tɔné dɔ lɛ looo, bé fe wo lɛ léma: A zo lé Mizan Gakelebale a fe.

¹² Yé Léli an nwa, yé an vun gi wele blɛn do ’ma an zuo. Wo léé: Gakelebale lé fuasan drɔɔ ’é vo é nyanana mi.

¹³ Maa fɛyuɛmalenu bɛanu vun wele ékema ’ma, yé ganenu lé wo ke bélé goroganenu zo, ’té wo vun éé wé wo sɔnɔ, maa ’ma; yé an vun wele blɛn gi ’ma.

¹⁴ Léli an nwa yé é go an nya. An go, ’té an bli a é flile babané. Yé Gakelebale bɛ a é nyunule an ta plɛplɛ.

¹⁵ An bɔ Tɛl‐Abib, lulamunu lé woo nyanaan Kébaa yuu sɔnɔ, wo va, fɛana lé wo ke, ana. Yé an yi sɔrafié kɛlɛ ’bɛna, ’té kwa a é vɔle an ta.

Bale Ézékiɛl dɔ Izraɛl taginizan nya

¹⁶ Yi sɔrafié giéle zuo, Gakelebale we fe an lɛ yé é léé:

¹⁷ Blami be, maa i dɔ Izraɛlnu taginizan nya. ’I tɔné dɔ an dére lɛ, yé i dan we lɛ kini lɛ wo lɛ an dére nya.

¹⁸ Dé maa a fe wenyanékɛlɛzan lɛ léé: I dan ga lɛ, dé i ’ka we lɛ kini lɛ a lɛ lo, dé i ’ka we fe lɛ wenyanékɛlɛzan lɛ léé, ’é si élé wenaané kɛlɛle zuo yé ’é vo é yuɛma lo, wenyanékɛlɛzan ’ko é dan ga lɛ élé weple nya é lee, yé maa dan a gawe dɔ lɛ i nwiin.

¹⁹ Naa, dé i we lɛ kini wenyanékɛlɛzan lɛ, dé é ’ka si lɛ élé wenyané kɛlɛle valé élé wenaané kɛlɛle zuo lo, é dan ga lɛ élé weple nya é lee, ’té a gawe ’ka i nwiin lo.

²⁰ Dé mi tegele do si élé we tegele kɛlɛle zuo yé é wenaané kɛlɛ, maa dan san pla lɛ a ’lɛ, yé é dan ga lɛ; i ’ka we lɛ kini lɛ a lɛ lo, amalé é dan ga lɛ élé wenyané nya é lee. Alé we tegele lé é a kɛlɛ, wo ’ka dan ’bɛ fe lɛ é dɛrɛ lo, yé maa dan a gawe dɔ lɛ i nwiin.

²¹ Naa, dé i we lɛ kini mi tegele lɛ léé, té é wenyané kɛlɛ lo, yé é ’ka wenyané kɛlɛ lɛ lo, é dan vo lɛ é yuɛma. I we lɛ kini a lɛ yé é a nyi si, azama. Té we ’ka i nwiin lo.

Ézékiɛl é dan kɛlɛ lɛ bobogyɛzan nya

²² ’Bɛna é ziin, Gakelebale bɛ a é nyunule an ta, yé é lé an lɛ léé: ’I nwa; ’i go gɔnu worona, ana lé an dan we fe lɛ i lɛ.

²³ Maa nwa yé an go gɔnu worona, yé bé ye, Gakelebale lé fuasan bɔra an va bélé fɛan zo lé maa a ye Kébaa yuu sɔnɔ, a zo. Yé an dia an bli la.

²⁴ Léli an kun yé é an dɔ an gane ta. Yé Gakelebale lé an lɛ léma: ’I go; ’i wɔra ilé kɔn gi, bé lɛ tan.

²⁵ Blami be, bé ye, wo dan balenu vɔ lɛ i ma yé wo dan i yere lɛ wo nya, léé, té i gié wo méléna lo.

²⁶ Maa dan i nɛnɛ kua lɛ i lagolo ma, i kɛlɛle bobogyɛzan nya we ma, té i we pla wo lɛ lo we gi. Naa, migɔnɔ ’ko a tɔné gi plɛplɛ gɔnɔ nya.

²⁷ Naa, dé an we fe i lɛ bléyian va, maa dan i ’léé fuo lɛ, léé, bé fe wo lɛ léé: Mizan Gakelebale léma: Mian é a a va léé, é tɔné dɔ, ’bɛzan ’é tɔné dɔ ma. Yé mian é ’ka a va léé, ’é tɔné dɔ lo, té é tɔné dɔ lo ma; naa, wa tɔné gi plɛplɛ gɔnɔ nya.